| | قصة رومانسية (همس الروح) |  |
|
+21فوفا نانسى نوسه شيماء زيزى ريهام دعيبس خالد بزوكا reem احمد بوياسر بنت من شوبرا عطعوط بسانت سيد على على قاهر الحب anoja عاشقة القمر ندا NANO همس النجوم 25 مشترك |
|
| كاتب الموضوع | رسالة |
|---|
نوسه
عدد الرسائل : 18
العمر : 45
البــلـد : مصر
تاريخ التسجيل : 22/09/2009
| موضوع: رد: قصة رومانسية (همس الروح)  الخميس مارس 18, 2010 11:55 am | |
| يا هموسه المنتدى كان مأفول بقاله شهرين ومش عارفه ادخل عليه خالص ولسه مفتوح النهارده ويا رب ما يتأفلش تانى بأه | |
|
| | |
نانسى
عدد الرسائل : 57
العمر : 38
البــلـد : لبـنان
تاريخ التسجيل : 04/08/2008
| | موضوع: رد: قصة رومانسية (همس الروح) الخميس مارس 18, 2010 12:08 pm | |
| المنتدى ضل مقفل الو ثلاثة اشهر وما ندرى ليش هيك ؟ يا رب يضل مفتوح تنتمكن من متابعة ها الاصة الحلوى
تنضل نحبك يا همس | |
|
| | |
عطعوط
عدد الرسائل : 47
العمر : 51
البــلـد : مصر
تاريخ التسجيل : 07/10/2008
| | موضوع: رد: قصة رومانسية (همس الروح) الخميس مارس 18, 2010 12:13 pm | |
| انتى يا ست همس انتى هو انتى عشان مش عارفه تكملى القصة البايخه بتاعتك دى تقومى تقفللنا ام المنتدى تلت شهور
هو لعب عيال ولا ايه؟ | |
|
| | |
ندا
عدد الرسائل : 60
العمر : 38
البــلـد : مصر
تاريخ التسجيل : 31/07/2008
| | موضوع: رد: قصة رومانسية (همس الروح) الخميس مارس 18, 2010 12:19 pm | |
| السقصة جميله جدا ومش بايخه ولا حجه واكيد المنتدى كان مقفول لاسباب فنيه
وده قصر ديل يا ظفلوط افندى
وكلنا بنحبك يا هموووووووووووووووووووووسه
| |
|
| | |
همس النجوم
عضوه نشطه
عدد الرسائل : 60
العمر : 32
البــلـد : مصر
تاريخ التسجيل : 25/09/2009
| |
| | |
همس النجوم
عضوه نشطه
عدد الرسائل : 60
العمر : 32
البــلـد : مصر
تاريخ التسجيل : 25/09/2009
| | موضوع: رد: قصة رومانسية (همس الروح) الخميس مارس 18, 2010 3:29 pm | |
| الحلقه واحد و عشرين
رجع سيف لحنين و ايمان قرب عليهم بابتسامه
سيف : ها اتفقتوا علي ايه ؟
حنين : و الله انا ريقي نشف علشان تقتنع و برده مفيش فايده
سيف : ليه كده بس يا ايمان و الله انا طيب و مبعضش؟
ايمان بابتسامه : سوري يا دكتور غصب عني بجد مينفعش اتاخر عليهم في البيت هما عارفين كل مواعيدي
سيف : اتصلي بيهم و قوليلهم هتغدي مع حنين صاحبتي فيها ايه دي ؟
ايمان : صعب اوي يوافقوا صدقني انا عرفاهم .. خليها فرصه تانيه اكون معرفهام من قبلها اني هتاخر
سيف : خلاص مدام قلتي فرصه تانيه يبقي ان شاء الله نحدد ميعاد تاني نتغدي فيه سوي احنا التلاته اوك
ايمان باستغراب : اوك
حنين واقفه بتتفرج من غير ما تنطق مبسوطه جدا من الحوار اللي داير بينهم
خرجت حنين مع سيف و راحوا مطعم يتغدوا فيه
سيف : هي ايمان صاحبتك دي خجوله كده علي طول؟
حنين : لا عادي بس هي بطبعها هاديه شويه
سيف : طب تفتكري لو فكرت اعزمها و بلغتها قبلها علشان تستاذن من اهلها هتوافق؟
حنين بخبث : انا عارفه يا اخويا و بعدين مالك مهتم بيها كده ليه مش من عادتك يعني تهتم ببنت كده ؟
سيف : بسال عادي فيها ايه يعني ..
حنين ضحكت
سيف : بطلي شغل السوس ده
حنين : هههههههه طب اعتبر كلامك ده انك وقعت من اول نظره
سيف : اتلمي يا بت انتي .. انتي ناسيه اني اخوكي الكبير و لا ايه ؟
حنين : يا عم اخويا الكبير ايه بقي ما هو مرسوم علي وشك اهه
سيف : فزي قومي يا حنين
حنين : علي فين ؟
سيف : خساره فيكي العزومه يلا فزي
حنين : لا و حياه ايمان خلاص ههههههههه
سيف بغضب مع ابتسامه : بت
حنين بابتسامه : خلاص بقي
سيف سرح في كلامها و هو مبتسم جدا و بعدين انتبهه لما الاكل جيه
سيف : اتنيلي كلي يلا بسرعه
حنين : ههههههههه حاضر
في البيت روح خالد بعد الساعه 7 مكنش حد لسه اتغدي
دخل لقي ندي قاعده بتقري في شويه مجلات
خالد : مساء الخير يا ماما
ندي : مساء النور يا خالد .. اطلع غير هدومك عقبال ما يحضروا الغدي
خالد : اوك
مشي خطوتين و رجع تاني
خالد : هي همس اتغدت ؟
ندي : لا لسه ابقي ناديها و انت نازل
خالد : انا .. لالالا خلي داده تناديها
ندي : طيب اطلع غير و انا هقول لداده تطلع تناديها
خالد : اوك يا ماما
طلع علي اوضته و في طريقه مر علي اوضه همس بص علي باباها المقفول و كان نفسه يخبط و يدخل يطمن عليها زي كل يوم لكن مقدرش
خالد بصوت واطي اوي : وحشتيني
و راح علي اوضته غير و نزل ملقاش غير ندي و مصطفي علي السفره
سلم علي باباه و قعد و هو محتار و باله مشغول بيها و بسبب عدم نزولها للغدي
خالد بحيره و صوت مهزوز : امال همس منزلتش ليه يا ماما ؟
ندي : بعتلها داده لكن لقتها نايمه صحتها علشان تنزل قالتلها ملهاش نفس و انها تعبانه و هتنام
خالد بقلق : تعبانه ازاي يعني؟
بصت ندي لمصطفي نظره استغراب من رد فعل خالد
مصطفي : متقلقش يا خالد تعبانه عايزه تنام يعني من الارهاق طول النهار
خالد : اه .. اوك
حاول ياكل لكن مكملش خمس دقايق علي السفره و طبعا مكالش حاجه و قام
خالد : الحمد لله انا طالع اوضتي
مصطفي : ما تقعد معانا شويه يا ابني
خالد : معلش يا بابا النهارده كان يوم طويل و محتاج استريح
ندي : طب عدي علي همس في طريقك يا خالد احسن تكون تعبانه بجد و لا حاجه
كلام ندي قلق خالد اكتر و خلاه يرتبك جامد
خالد بقلق : هي اشتكت من حاجه ؟
ندي : لا مشتكتش بس اطمن عليها يعني هتخسر ايه ؟
خالد بعد نفس طويل : حاضر يا ماما بعد اذنكوا
طلع علي فوق و برده في طريقه عدي علي اوضه همس وقف قدام الاوضه يفكر يدخل و لالا و بعد ثواني قرر يروح علي اوضته من غير ما يدخلها و حجته كانت انها اكيد نايمه
راح علي اوضته قعد علي المكتب فتح كتاب قدامه و قعد سرحان
و بعد دقيقتين قفل الكتاب و قام بسرعه
وقف قدام اوضتها و خبط علي الباب بتردد.. مردتش عليه قلق ...خبط تاني برده مردتش و قرر اخيرا انه يدخل
دخل لقاها نايمه قرب منها في هدوء ووقف جنب السرير يبصلها اوي فضل ثواني علي الحال ده و بعدها مد ايده علي راسها يشوفها سخنه او حاجه ساعتها همس حست بيه و فتحت عنيها
همس : خالد
خالد بارتباك : انا اسف اني صحيتك بس اصل داده قالت انك تعبانه قلت اطمن عليكي .. انتي كويسه ؟
همس بحزن : الحمد لله
خالد : طب بعد اذنك
مشي خطوتين و نادت عليه
همس : استني يا خالد
خالد و هو مديها ضهره : عاوز استريح شويه لاني خارج باليل
قامت من السرير و مشيت ناحيته لحد لما بقت قدامه عنيها اللي اتملت بالدموع في عنيه و هي ساكته
مقدرش خالد يبص في عنيها نزل وشه في الارض و استاذن تاني انه يمشي
همس : خالد سامحني علشان خاطري انا اسفه
خالد : الكلام في الموضوع ده خلص خلاص
همس : لا مخلصش و الدليل اهه انك مش عاوز تسامحني
خالد : انتي قلتي كل اللي عندك و سمعته و انا كمان قلت اللي عندي يبقي خلاص خلصنا
همس : يعني ايه ؟؟؟ اول غلطه اغلطها في حقك هتكون سبب في ان حبنا يقف لحد كده
بصلها بسرعه و هو بيسالها بعنيه ازاي تقولي كده لكن متكلمش
همس و خلاص عيطت جامد و الدموع غرقت خدودها : انا عارفه اني غلطت و غلطه كبيره اوي بس عقابك ليا في الكام ساعه دول كان كفيل انه يعرفني غلطي و يخليني اتعلم منه و مكرروش تاني
بصتله باستعطاف و برده هو ساكت .. سكوت نار بتولع في قلبه...نار القلق عليها و علي حالتها و هي منهاره في العياط قدامه و نار تانيه بتقوله متضعفش يا خالد سيبها تتعلم من غلطها و تعرف انها جرحت كرامتك
كملت كلامها و هي بتزيد اكتر في العياط : عمرك ما كنت قاسي عليا كده .. ليه يا خالد ليه ده حرام و الله العظيم حرام ...
و ودت وشها الناحيه التانيه و عيطتت اكتر بصوت عالي
خالد و هو خلاص مش قادر يتحمل منظرها : كفايه كده بقي يا همس انا .. انا ماشي
و لسه جاي بيفتح باب الاوضه سمع وقعتها علي الارض مغمي عليها
بص وراه لقاها مرميه علي الارض غرقانه في دموعها جري بسرعه ناحيتها شالها نيمها علي السرير و حاول يفوق فيها بميه و البرفان اللي كان علي التسريحه لحد لما فاقت
خالد بقلق : حبيبتي انتي كويسه ؟
همس مسمعتش غير كلمه حبيبتي و كأن روحها كانت مسحوبه منها و رجعتلها تاني بكلمه حبيبتي .. فضلت تبصله اوي و هي بتعيط دموع الفرحه و القلق
خالد : حاسه بحاجه ..؟ ردي عليا يا حبيبتي علشان خاطري
الروح بتتردلها واحده واحده بقلقه.. و الخوف اللي مالي عيونه بيرجعها من جديد للحياه.. حياه الحب و الامل اللي اتولد في قلبها من جديد لكن برده ساكته
خالد : لا انا هروح اجيب السماعه و جهاز الضغط انتي مش طبيعيه ابدا
و لسه هيقوم
همس : انا كويسه اوي يا حبيبي
رجع تاني لمكانه
خالد : متاكده انك كويسه
همس : اوي اوي
خالد : قلقتيني عليكي
همس و لسه دموعها علي خدها : انا اسفه
مد ايده يمسح دموعها
خالد : قلتلك مش عاوز اشوفهم تاني
همس : غصب عني علشان بحبك
خالد : و انا كمان بحبك اوي .. سامحيني اني وصلتك للدرجه دي انا اسف
همس : انا اللي اسفه علشان غلطت في ...
و لسه هتكمل حط ايده علي بقها
خالد : خلاص قفلي علي الموضوع ده كانه محصلش
همس بابتسامه فرحه ملت عنيها : بجد يا حبيبي
خالد : بجد يا عيون حبيبك ...انا عارف ان رد فعلي كان قاسي اوي عليكي بس ده برده غصب عني كان نفسي احس اني فعلا كل حاجه بالنسبالك مينفعش تخبي عني اي حاجه مهما كانت كبيره او صغيره
همس : انت فعلا كل حاجه في حياتي يا خالد و انا عمري ما خبيت عليك حاجه بس المره دي خبيت عليك علشان ....
خالد : علشان ايه ؟
همس : علشان خاطر سما و مش هقول اكتر من كده
خالد : و ايه دخل سما بالموضوع ؟
همس : مقدرش اقول اكتر من كده
خالد بحزن :برده يا همس هتخبي عليا
همس : لا ..يا حبيبي انا مقصدش اخبي عليك بس الموضوع لا يخصني و لا يخصك ده يخص سما لوحدها
خالد : و ايه دخل سما بموضوعك مع اللي اسمه مؤمن ده
همس : حبيبي علشان خاطري متضغطش عليا بجد مينفعش اقول دي صحبتي
خالد : اللي يريحك .. المهم عندي اخد منك وعد دلوقتي انك متكرريش اللي عملتيه ده تاني و اوعي اوعي يا همس اشوفك او اعرف انك وقفتي مع اللي اسمه مؤمن ده تاني و لو حصل و رذل عليكي تعاليلي و انا هتصرف معاه
همس و هي وشها في الارض : حاضر
رفع وشها بايده
خالد : اكيد الاغماءه دي سببها انك مكلتيش حاجه من الصبح مش كده ؟
همس : عرفت ازاي؟
خالد : علشان انا خالد نص همس التاني لازم اعرف من غير ما حد يقولي
همس بابتسامه : مقدرتش اكل حاجه و انت زعلان مني
خالد : انا كمان مكلتش حاجه ... و سكت ثواني و بعدين كمل . بحبك.... اوي
همس : و انا بحبك اوي اوي اوي و الله العظيم بحبك
خالد بابتسامه : هنزل اقول لداداه تحضرلنا اكل و تجيبه علي هنا
همس : ماشي يا حبيبي .. متتاخرش عليا
خالد : مقدرش اتاخر عليكي ابدا يا حبيبتي
نزل قال لداده ( اللي هي الست الخدامه بس مخصوص لهمس و خالد و عمر ) تجيب غدي علي اوضه همس
رجعلها تاني و حكلها علي الحوار اللي دار بينه و بين باباه و قعدوا بتكلموا شويه و بعد كده رجع علي اوضته و سابها تذاكر
تاني يوم في الجامعه
عمر راح لامنيه الكليه بعد ما حاول كذا مره يكلمها و مردتش عليه
سال عليها و طبعا مشهوره جدا و كل الكليه عرفاها عرف مكانها و هو في طريقه ليها قابل حنين
عمر في سره * يا دي النيله انا بحاول استخبي عشان متشوفنيش
حنين اتفاجات بوجوده في الكليه و فرحت اوي من جواها ظنا منها انه جاي عشانها قربت ناحيته بسرعه و سابت ايمان اللي كانت ماشيه معاها لوحدها
حنين بفرحه و استغراب : ازيك يا عمر بتعمل ايه هنا ؟
عمر بلخبطه : تمام يا حنون ازيك انتي عامله ايه ؟
حنين : الحمد لله مقلتليش ايه اللي جابك هنا
عمر : ها .. لا كنت معدي قلت اجي اسلم عليكي
حنين و الابتسامه و الفرحه في عنيها : بجد
عمر : اها طبعا بجد ... ا ا ا . سيف عامل ايه واحشني اوي الواد ده ؟
حنين : الحمد لله كان هنا امبارح
عمر : ايه ده و الله بيعمل ايه ؟
حنين : كان عازمني علي الغدي و جيه ياخدني
عمر و هو بيلتفت حواليه : اها تمام تمام
حنين : بتدور علي حد؟
عمر : انا لا ابدا
من بعيد امنيه جايه ووقفت فاجاه اول ما لمحتهم واقفين سوي
امنيه * الله الله جاي في كليتي و واقف معاها كمان .. البت دي عملت ايه لا تكون قالتله انها بتحبه .. لالالا مش ممكن دي هبله هي بتعرف تنطق اساسا .. اكيد هو جاي عشاني.. و يمكن جاي يغظيني بيها... ايه يغيظني؟؟.... بقي كده ماشي يا عمر انا هربيك انت و الست حنين بتاعتك
قربت ناحيتهم و بمنتهي الخبث
امنيه : عمووووووور وحشتني يا واد طبعا جاي تشوفني وحشتك مش كده
عمر : ها اها لا
حنين : هو في ايه انتي تعرفيه منين؟
امنيه : حنون ازيك يا حبي معلش مخدتش بالي منك اصل عمر كان واحشني اوي انتي عامله ايه ؟
حنين : بقولك تعرفي عمر منين ؟
امنيه : ايه يا حنونتي مش انتي اللي عرفتيني عليه السنه اللي فاتت من يومها و احنا صحاب خالص لا صحاب ده ايه احنا حبايب مش كده يا عمرتي
عمر في ربع هدومه منطقش
حنين : حبايب !!!!!!!
امنيه : ايوه طبعا و هو جاي النهارده يصالحني اصل حصلت مشكله صغيره كده ما بينا صح و لا ايه يا عمر
عمر قرر ينسحب بعد ما بقي موقفه وحش اوي قدام حنين : بعد اذنكوا
امنيه : استني خدني معاك
و مشيت وراه و حنين واقفه مش قادره تستوعب اي حاجه من اللي حصلت قدامها
قربت ناحيتها ايمان
ايمان : في ايه ايه اللي وقف البت دي معاكوا ؟
حنين ساكته و الدموع في عنيها
ايمان : في ايه يا حنين مالك يا حبيبتي؟
حنين بشبه توهان : صحاب لا حبايب ووحشته و جاي يشوفها
ايمان : ايه اللي بتقوليه ده انا مش فاهمه حاجه
حنين علي نفس الحاله : عمر بيحب امنيه يا ايمان .. ملقاش غير امنيه و يحبها
ايمان و علامات التعجب علي وشها : هو اللي قالك كده ؟
حنين : هي قالت كده و هو منطقش يعني بياكد كلامها ملقاش غير امنيه ... امنيه يا عمر طب ليه
ايمان : اهدي يا حبيبتي دول ميستاهلوش اللي انتي عملاه في نفسك ده
حنين : بس انا بحبه .. بحبه اوي
ايمان : ميستاهلش و الله العظيم ما يستاهل
حنين : ............... ...........
ايمان : ............... ........
في كليه تانيه مع ناس تانيه
كليه العلوم
سال عليها ووصل للمكان اللي هي موجوده فيه و من بعيد نده عليها من وسط زمايلها
خالد : سما ممكن ثواني ؟
سما باستغراب :دكتور خالد
قربت ناحيته و في دماغها مليون سؤال
سما : خير يا دكتور ؟
خالد : كنت عاوز اتكلم معاكي شويه ممكن؟
سما : ممكن طبعا اتفضل نقعد هنا
خالد : اوك
راحوا علي اقرب مكان جنبهم و قعدوا
خالد : همس حكتلي علي كل اللي حصل بخصوص حوار مؤمن
سما بقلق : اه قالتلي
خالد بجديه : كويس خالص ... بس في حاجه في كلامها كانت ناقصه و فهمت من كلامها ان الحاجه الناقصه دي تخصك
سما بقلق بيزيد : تخصني انا ؟؟؟
خالد : ايوه تخصك انتي .. انا طبعا ماليش اني ادخل في خصوصياتك بس الموضوع مدام قرب ناحيه همس يبقي لازم اقلق و اخاف و اعرف ايه الحكايه بالظبط ممكن يا سما ؟؟
سما بخوف و لخبطه : بس يا دكتور .. انا .. انا مش هينفع اقولك حاجه صعب اوي
خالد : انتي كده بتقلقيني اكتر
سما : صدقني الموضوع مالوش علاقه بهمس
خالد : ازاي مالوش علاقه بيها و كلام اللي اسمه مؤمن عن انه بيحبها و بعدين تيجي تقولي انا وقفت معاه علشان سما مش علشاني دي حاجه مش مفهومه محتاجه تفسير و التفسير معاكي انتي
سما و خلاص علي وشك انها تعيط : و مسالتهاش هي ليه ؟
خالد : مرضيتش تقولي حاجه قالتلي الموضوع يخص سما و انا مش هقدر اتكلم فيه و لا اقول اكتر من كده
سما مقدرتش تخبي دموعها و عيطت في هدوء من غير ما تتكلم
خالد و بدأ يهدي : انا خايف علي همس اوي يا سما و كمان انتي زي اختي احكيلي يمكن اقدر اساعدك
سما : انا هقولك علي كل حاجه علشان دماغك مترحش لبعيد ...
حاولت تهدي و بدات تحكي .. مؤمن بيحب همس اوي من و احنا في ثانوي و ده كان باين اوي عليه .. من كتر ما حاول يقرب مننا علشان خاطرها... انا ... انا اتعلقت بيه .. و حبيته لكن هو طبعا كل تفكيره كان في همس وهي دايما كانت بتصده و لو فكر يتكلم معانا كانت بتكلمه بطريقه سخيفه علشان يبعد عننا .. كل يوم كنت بتعلق بيه اكتر من اليوم اللي قبله حبيت فيه كل حاجه حتي حبه لهمس مع اني كنت بتمني الاقي منه و لو حتي نصه ليا ... لما جيه يعترف لهمس بحبه همس صدته كالعاده لكن هو كان ناويها و كان مصر انه يوصلها حبه و فعلا وقفني بعد ما مشيت و سابتني واقفه معاه و قالي علي كل حاجه و طلب مني ابلغها و ابلغه ردها ساعتها حسيت بنار في قلبي لكن تماسكت و وافقت و لما وقفت قدامها كل دموعي اللي كنت مخبياها عن عنيه مقدرتش تستخبي قدام همس .. ساعتها عرفت و اتاكدت من حبي ليه و هو ده السبب اللي خلاها تقف معاه علشان تقوله انها مش بتحبه و تلمحله من بعيد ان في حد تاني بيحبه ....هي دي كل الحكايه
خالد بلخبطه : انا اسف اوي يا سما مكنتش اعرف ان الموضوع كده خالص بجد مش عارف اقولك ايه
سما :متقولش حاجه يادكتور كل اللي لازم تعرفه ان همس بتحبك اوي ومتقدرش تعمل حاجه تزعلك و لو كانت حصلت مشكله بسبب الموضوع ده فانا اسفه سامحني علي اني كنت السبب في اول مشكله تحصل ما بينكوا
خالد : لا يا سما متتاسفيش .. انتي كمان بتحبي همس و سرح و هو بيبص في ناحيه تانيه و هي كمان بتحبك اوي ... ربنا يخليكوا لبعض ...... اسيبك انا لمحاضراتك و انا اسف مره تانيه علي تدخلي في الموضوع ده .. ربنا يوفقك
سما : و لا يهمك يا دكتور .. حصل خير .. بعد اذنك
خالد : اتفضلي
سابته ومشيت و راح هو علي كليته
ماشيه معاه بتقل عامله نفسها زعلانه من منظره مع حنين و هو هيتجنن منها و من اللي عملته
عمر : ممكن اعرف ايه اللي انتي هببتيه ده ؟
امنيه بنرفزه هاديه : ممكن انا اعرف ايه المنظر البديع اللي انا شفته ده ؟
عمر : متهربيش من السؤال و ردي عليا
امنيه : ارد اقول ايه ... حقي و خدته
عمر : حق ايه يا ام حق جاك كسر حوقك ال حق ال .. انتي فضحتيني قدام بنت عمي .. انا بحبك انتي ليه هما البنات المحترمه خلصوا من البلد !!!
امنيه بنظره استحقار: انا محترمه غصب عنك و بكره هعرفك مين هي امنيه يا سي المحترم و الست جوليت بتاعتك انا هربيها و هعرفها مقامها كويس
عمر : جوليت ايه و تربي مين انتي اتجننتي ؟
امنيه : اتجننت ليه يا سي روميو مش حضرتك واقف مع الست حنين هانم تعضوها عن سنين الحب و العذاب اللي عيشتهم فيها .. فاكر انك بكده هتغظني لا يا حبيبي فووووق مش انا .. انا امنيه عارف يعني ايه امنيه و مش هسمحلك تاخدني لحم و ترميني عضم ابدا .. انسي يا .....متر
عمر باستغراب : حب ... حب ايه ؟ انا مش فاهم حاجه من التخاريف اللي بتقوليها دي
امنيه : و الله... اعملي فيها عبيط بقي
عمر : امنيه احترمي نفسك و اتكلمي عدل .. حب ايه اللي انتي بتتكلمي فيه مين اللي بيحب مين ؟
امنيه : يعني مش عارف
عمر : اخلصي بقي انتي هتنقطيني
امنيه * هو مش عارف بجد و لا بيستهبل دي باينه اوي يعني
امنيه : الست حنين هانم
عمر : مالها حنين .. بتحب مين اوعي يكون حد من الطايشين اللي انتي تعرفيهم و الله ادبحه و ادبحك معاه الا حنين دي ملاك
امنيه : ههههههههه اول مره اعرف انك عبيط ... حنين بتحبك انت يا متر بتموت فيك و من و انتوا صغيرين
عمر بدهشه : انا ... حنين بتحبني انا مش ممكن و تحبني علي ايه اساسا ده انا كل يوم مع بنت و هي عارفه كده كويس
امنيه : اهه اللي حصل بقي
عمر : معقول حنين
امنيه : روح بقي طبطب عليها و امسحلها الدمعتين اللي اكيد مغرقين وشها دلوقتي
عمر : متتكلميش عن بنت عمي بالطريقه دي احسنلك و مالكيش دعوه بيها و من النهارده اعتبري كل اللي ما بيني و بينك انتهي انتي فاهمه
امنيه : لا مش فاهمه و مش هسيبك يا عمر
عمر : هو بالعافيه انا مش بحبك و لا عمري حبيتك زي ماانتي فاكره .. انا بتاعي يا ماما و عمري ما هكون بتاع حد ابدا
امنيه : و الله .. و الست حنين ؟
عمر و هو سرحان : و لا حتي حنين ... انا ماشي
و مشي و سابها
امنيه : ماشي يا عمر بس مسيرك هترجعلي و تبوس ايدي كمان
راح خالد علي كليته دخل مكتبه لقي فيه معيد زميله استني لما خرج علي محاضرته و اتصل علي همس علشان تجيله
خبطت علي الباب و سمحلها بالدخول و قام بسرعه قرب ناحيتها
خالد و عنيه كلها حب و سعاده : وحشتيني اوي
همس بنفس النظره : و انت كمان وحشتني اوي يا حبيبي
خالد : عامله ايه .. اوعي تكوني تعبتي تاني ؟
همس : لا الحمد لله انا كويسه طول ماانتي بتحبني
خالد : تعالي نقعد
قعدوا علي المكتب علي الكرسين اللي قصاد بعض
همس : بس غريبه انك تطلبني اجيلك مكتبك
خالد : اصلك وحشتيني اوي و كان لازم اشوف اجمل ملاك خلقه ربنا علشان يسعد الناس كلها و يفرح قلوبهم
همس : ايه الكلام الكبير ده انا مش قده
خالد : انتي قده و اكبر منه كمان ... انا بحبك اوي يا اجمل همسه حصلتلي في حياتي
همس ساكته سايبه عنيها اللي مليانه فرحه ترد عليه و هو بيكمل
خالد : انا هستاذن بدري النهارده هعزمك علي احلي غدي في اشيك مطعم في اسكندريه عاوز اتكلم معاكي كتير اوي
همس : انا مش فاهمه حاجه خالص انت امبارح في نفس المكان و الوقت ده كنت تقريبا هتضربني و دلوقتي بتحب فيا بلسانك و قلبك و عنيك ايه اللي اتغير؟
خالد : متجبيش سيره امبارح ده تاني ... ده خلاص انتهي و راح لحاله احنا في النهارده و بكره و بعده و كل ايامنا اللي جايه مع بعض ... عارفه انا هكلم بابا تاني في موضوعنا ما هو لازم يتم قريب بقي انا خلاص مش قادر تبقي جنبي و مش جنبي
همس بفرحه : بجد انا اسعد انسانه في الدنيا طول ماانت جنبي و بتحبني الحب ده ربنا يخليك ليا يا حبيبي يا اغلي من عنيا
خالد : و يخليكي ليا يا عمري يا اجمل بنت مش قادره عيني تشوف غيرها
همس بابتسامه : بحبك اوي يا خالد
خالد : و انا بعشقك يا قلب خالد ... روحي دلوقتي لصحابك او لو عندك محاضره احضريها و لما نخلصي اتصلي بيا هستاذن و اجيلك
همس : هتوحشني
خالد : انتي وحشاني حتي و انتي معايا
قامت همس علشان تمشي وقفها و هي في الطريق للباب
خالد : همس
بصت وراها بابتسامه من غير ما ترد
خالد : خلي بالك من نفسك علشان انا بحبها اوي
همس : حاضر يا حبيبي و انت كمان خلي بالك من خالد علشان انا بحبه بجنون
رد عليها خالد بابتسامه و بعدين مشيت
في مكالمه تليفونيه بعد محاوله فاشله انه يقابلها في شغلها
احمد اخيرا اتصل بميرنا
احمد بصوت متردد : ازيك يا ميرنا
ميرنا : الصوت ده مش غريب عليا احساسي بيقولي انك ... لا مش ممكن انت مين... مين معايا
احمد : احساسك مبيكدبش عليكي ....انا احمد
ميرنا : يااااااااااه احمد بجد مش قادره اصدق
احمد : ممكن اقابلك بره شويه
ميرنا : ليه ؟
احمد باستغراب : ليه!!!!
ميرنا : يعني هنتكلم في ايه مش انت خلاص خلصت كل الكلام المره اللي فاتت
احمد : يمكن يكون في كلام جديد لازم نتكلم فيه .. ممكن يا ميرنا
ميرنا بخيبه امل : يمكن ها ... و بعد نفس طويل .. ممكن يا احمد
احمد : الساعه 5 كويس؟
ميرنا : حاضر الساعه 5 هكون في النادي ان شاء الله
احمد : ان شاء الله
عمر ماشي مع نفسه حيران قلقان خايف علي حنين منه و كمان من امنيه اللي اكيد هتنتقم منه فيها
عمر* معقوله يا حنبن بتحبيني طب بتحبيني علي ايه و ليه ؟ ده انا عمري ما فكرت فيكي و لا لمحتلك اي تلميح اني بحبك او حتي علي وشك اني احبك ....مش يمكن تكون امنيه بتضحك عليا علشان تتوهني ... يا سلام و مش لاقيه غير الطريقه دي تتوهك بيها دي تعبان تتوه بلد بالف طريقه بمنتهي الذكاء ... يعني هي بتحبني بجد ... اكيد مش شفت حالها انقلب ازاي لما امنيه قالت اننا حبايب ... يمكن من الصدمه مش مصدقه اني احب من النوعيه القزره دي... صدمه ايه يا عمر انت هتعيشلي الدور ما انت عارف ان امنيه دي هي نفس نوعيتك ... بس حنين دي ملاك و من السهل ينضحك عليها و امنيه هددتني انها هتنتقم منها ... و المصحف اولع فيها ... لالالا اهدي و ركز و فكر كده بالعقل امنيه دي متتاخدش قفش كده ... امال تتاخد ازاي لازم يكون ليها حل دي بنت عمي و ملهاش ذنب في اي حاجه لازم تتصرف يا عمر حتي لو هتيجي علي نفسك بس المهم تنقذ حنين من الحقيره اللي اسمها امنيه دي... لازم
خلص شغله بدري او بمعني اصح زوغ بدري علشان يروح لحنين تؤ تؤ الحقيقه هي انه عاوز يشوف ايمان
وصل كليه الاداب و قبل ما يتصل بحنين فكر يروح علي المكان اللي كانوا قاعدين فيه اخر مره كان عندهم و بالفعل لقاهم قرب ناحيتهم و طبعا حاله حنين وحشه جدا
سيف : ازيكوا يا قمرات
حنين بلخبطه و هي بتحاول تمسح دموعها : سيف !!!
سيف خد باله من دموعها اللي بتحاول تخبيها : مالك يا حنين في ايه ؟
حنين : مفيش حاجه يا سيف انا كويسه
سيف : مفيش ازاي و انتي عنيكي مليانه دموع كده... ما تفهميني انتي يا ايمان ايه اللي حصل ؟
ايمان : مفيش يا دكتور هي بس تعبانه شويه
سيف بقلق : تعبانه مالها ... مالك يا حنين حاسه بايه يا حبيبتي ؟
حنين : مفيش يا سيف شويه تعب بسيطه
سيف : و تعب يخليكي تعيطي كده
ايمان : الصداع ... اه هو الصداع كان عندها صداع من الصبح و لما زاد عليها مقدرتش تستحمل عيطت
سيف : و متصلتيش بيا ليه اجي اخدك و لا جتيلي المستشفي اكشف عليكي و اشوف مالك
ايمان : مش مستاهله يا دكتور دول شويه صداع
سيف : طب قوموا معايا
حنين : علي فين؟
سيف : هرجع بيكي المستشفي تاني مانا لازم اعرف فيكي ايه ده مش حوار صداع خالص
حنين بقلق و خوف : لالالا مستشفي ايه بس يا سيف انا كويسه و الله دول شويه صداع و خلاص خفوا
ايمان و هي تحاول تلطف الجو : مش توصل لدرجه مستشفي يا دكتور و لا انت مشتاق للكشف و المستشفي
سيف : لازم اطمن عليها دي اختي و شكلها تعبان جدا
حنين : متقلقش يا حبيبي انا هروح معاك دلوقتي هنام و ابقي كويسه و كويس انك جيت علشان تروحني معاك
سيف و نظرات الشك في عنيه : اه اوك يلا بينا
ايمان : طب انا هبقي اتصل بيكي باليل بقي يا حنون علشان اطمن عليكي يا حبيبتي عاوزه حاجه ؟
سيف : علي فين انا هوصلك معانا
ايمان : لا توصلني ازاي يعني مينفعش
سيف : مش كل مره مينفعش المره دي ملكيش حجه انا هوصلك و انت راكبه مع صحبتك اللي تعبانه ايه بقي اللي فيها دي؟
ايمان : بس ...
حنين بنبره هاديه : علشان خاطري يا ايمان
ايمان : يا حنين صدقيني...
سيف : قالتلك علشان خاطرها يرضيكي تكسفيها و هي تعبانه كده ؟
ايمان : ..............
سيف : يلا يلا انا راكن العربيه هناك هروح اجيبها و اجي استنوني هنا
حنين : حاضر
سيف و هو في الطريق للعربيه * الحوار مش حوار صداع و لا تعب في حاجه تانيه و انا لازم اعرفها .... بس البت ايمان دي عسل اوي يخربيت رقتها هتجنني ... انت وقعت بجد و لا ايه يا سيف ... مش عارف شكلي كده طبيت زي ما بيقولوا من اول نظره.... و ابتسم ابتسامه خفيفه مع نفسه
اما حنين و ايمان
حنين : انا خايفه اوي يا ايمان نظره سيف ليا الاخيره دي بتقول انه شك في حاجه
ايمان : هيشك في ايه بس يا حنين متقلقيش كده
حنين : مقلقش ازاي بس.. انا حاسه انه هيستفرد بيا و يستجوبني
ايمان : انتي مش بتقولي انه صاحبك و بيحب يتكلم معاكي
حنين : ايوه بس ده ايه دخله بالموضوع ده ؟
ايمان : امممممممممم قوليله
حنين : اقوله ايه انتي بتقولي ايه يا ايمان مستحيل
ايمان : صدقيني هو الوحيد اللي هتلاقي منه النصيحه الصح في موضوعك ده و مش هيضربك و لا هيين مشاعرك لانك علي كلامك هو بيحبك اوي و بيقدرك و بيعتبرك صاحبته
حنين : لالالا مقدرش صاحبته في حاجات تانيه دي لا ... مستحيل
ايمان : اللي تشوفيه صح اعمليه بس انا شايفه انه اكتر واحد هيقف جنبك معايا طبعا انا عمري ما هتخلي عنك بس هو عنده خبره اكبر من خبرتي و خبرتك و اكيد هيفيدك
حنين سكتت و سرحت في كلامها و في الوقت ده جيه سيف بالعربيه
خلاص نازلين علي فين الحلقه خلصت
اشوفكم الحلقه الجايه | |
|
| | |
همس النجوم
عضوه نشطه
عدد الرسائل : 60
العمر : 32
البــلـد : مصر
تاريخ التسجيل : 25/09/2009
| | موضوع: رد: قصة رومانسية (همس الروح) الخميس مارس 18, 2010 3:39 pm | |
| الحلقه الثانية والعشرين
في النادي راحت ميرنا في ميعادها تقابل احمد و هي جواها الف سؤال هيقتلوها ده غير حزن مالوش اول من اخر لما افتكرت كل اللي حصل بينهم من يوم ما اتجوزت غيره و كمان خوف من المقابله الغريبه اللي مش لاقيلها اي تفسير
دخلت النادي و قربت من المكان اللي هيتقابلوا فيه و هي بتقدم رجل و بتاخر عشره لكن في النهايه قررت تتماسك و تقرب بهدوء و حاولت تداري كل علامات الاستفهام اللي كانت مرسومه علي وشها
قربت منه لما لمحته من بعيد كان مستنيها من بدري
ميرنا : مساء الخير
احمد : مساء النور اتفضلي
ميرنا : ميرسي
قعدت و منطقتش و لا كلمه
احمد : تشربي ايه ؟
ميرنا : لا ميرسي .....
نادي علي الجرسون من غير اي اهتمام بكلامها و طلب عصير برتقان
احمد : لسه بتحبيه زي زمان و لا خلاص كرهتي زمان باللي فيه؟
ميرنا ساكته تعبانه اوي من جواها عنيها في عنيه مليانه لوم و عتاب و حزن و تعب
احمد : ساكته ليه يا ميرنا ؟
ميرنا : انا قلت كل اللي عندي خلاص يا احمد الدور عليك انت اللي طلبت تقابلني المره دي مش انا
احمد بعد تنهيده : اه عندك حق
بدأ ياخد نفسه و يتكلم
احمد : ميرنا انا عارف اني كنت قاسي اوي في ردي عليكي اخر مره اتقابلنا ... بس صدقيني و لو اني عارف انك عارفه ان كل كلمه قلتها كانت بتقطع فيا اكتر ما بتقطع فيكي
ميرنا بدأت تنتبه للكلام اوي
احمد : انا منكرش اني لسه بحبك و عمري ما حبيت و لا فكرت و لا هفكر احب حد غيرك بس جرحك ليا كان صعب اوي .. جيتي عليا في اكتر وقت محتاجلك فيه .. وقت كنت بفقد فيه حبايبي كلهم واحد وره التاني .. بدل ما تحسي بالنار اللي في قلبي و تخففيها زودتيها اكتر بجرح اكبر من اي جرح تاني لما اتجوزتي و بعتي حبي في لحظه
ميرنا : احمد انا ....
احمد : سبيني اكمل لو سمحتي ... لما اتجوزتي الدنيا اتسدت في وشي حسيت بعجز شديد عمري ما حسيته قبل كده فكرت اقتلك و اقتله مكنتش هماني حياتي ساعتها كل اللي كان يهمني انتقم لقلبي اللي انجرح جرح قاسي من اقرب حد ليا في الدنيا .... انتي يا ميرنا ... اللي هداني هي امي وجودها جنبي كان بيهون عليا كل اللي بيحصلي و لما ماتت و همس بعدتت حسيت بانكسار من جديد انكسار اشد ..عجز و قله حيله و تعب و ضياع .... ضياع كل شئ امي و اختي و اعز صديق ليا و همس و كمان حبيبتي .. يااااااااه كانت ايام صعبه اوي بجد
بدات عنيه تدمع لكن كمل كلامه
احمد : لما جيتي و قولتي انك اطلقتي منكرش اني من جوايا فرحت و فكرت ارجعلك بس رجعت و لقيت رجوعي ليكي هيبقي غلطه .. بصراحه خفت منك بعد ما بقيت اخاف من كل حاجه و علي كل حاجه ... خفت بعد ما تبقي ملكي تبعدي من جديد بقيت اشك اني نحس و مش هيجيي عليا يوم ابدا افرح فيه و ان اي شئ هيفرحني مسيره هيضيع مني ... بس دلوقتي و بعد ما في الفتره الاخيره قربت من ربنا اكتر بدأت احس اني اتولدت من جديد و بدات اشوف الدنيا بعيون جديده عيون كلها امل في بكره و بعده حتي لو مش هعيشهم يمكن يكونوا ايام حلوه علي ولادي اللي متمنتش في يوم يكون ليهم ام غيرك انتي يا ميرنا
ميرنا بفرحه : يعــ يعني ايه مش فاهمه ؟
احمد : يعني انا بعرض عليكي الجواز ... موافقه ؟
ميرنا و هي خلاص هتطير من الفرحه مش مصدقه : انت بتقول ايه .. احمد اللي بتقول ده بجد و لا انا بحلم ؟
احمد : لا مبتحلميش يا ميرنا انا عاوز اتجوزك ها موافقه يا حبيبتي؟
ميرنا : ياااااااااااااا اااااااااااااه مش ممكن لا مستحيل اخيرا انا بجد مش مصدقه نفسي وحشتني وحشتني اوي يا احمد
احمد بعيون مليانه فرحه و سعاده لسعادتها : موافقه و لا ايه ؟
ميرنا : طبعا موافقه و موافقه جدا كمان
احمد : طب ايه رايك الخميس الجي؟
ميرنا : دلوقتي لو تحب
احمد : بجد ينفع دلوقتي ؟
ميرنا : ينفع و نص انا خلاص بقيت وليه امر نفسي احنا عجزنا خلاص يا حبيبي
احمد : انتي طول عمرك هتفضلي في نظري ملكه جمال العالم ده كله يا اجمل حب في حياتي
ميرنا : بحبك ..
احمد : و انا بموت فيكي .... يلا بينا
و قام شدها من ايدها
ميرنا : علي فين ؟
احمد : علي المأذون يا حياتي
بعد ما خلصت همس محاضراتها علي الساعه 4 اتصلت بخالد و استاذن و راحلها
ركبت معاه العربيه و في نص الطريق ركن علي جنب ووقف
همس : وقفت ليه يا حبيبي؟
خالد : هجيب حاجه و اجي
همس : طيب متتاخرش عليا
خالد : مقدرش اتاخر علي القمر
نزل و راح اشتري الحاجه و جيه مخبي ايده وره ضهره و فتح باب العربيه و هو لسه مخبي ايده
خالد : اتفضلي يا اجمل برنسيسه
طلع من وره ضهره بوكيه ورد احمر في منتهي الشياكه
همس : واااااااااااااا او ده جميل اوووي يا خالد
خالد : مش اجمل من همس يا عيون خالد
همس بصت اوي لبوكيه الورد و بعدها شالت عيونها من عليه علشان تبص في عيون خالد بابتسامه جميله بتقول احلي كلام يغني عن كلمات الشكر اللي ممكن تتقال و خالد مندمج معاها و الاتنين بقوا في دنيا تانيه من السرحان و التقاء العيون بالعيون
و بعد حوالي 3 دقايق
همس : بحبك اوي
خالد رد عليها بابتسامه و بعدين دور العربيه و كمل طريقه للمطعم
اتصل عمر بامنيه و طلب انه يقابلها في مكان بره
و في المقابله
جايه امنيه من بعيد و نظرات الشر في عنيها قربت منه و من غير ما تنطق قعدت و فضلت ساكته
عمر بغيظ مستخبي : هتفضلي ساكته كده كتير ؟
امنيه ودت وشها الناحيه التانيه و نفس النظره في عنيها من غير كلام
عمر بابتسامه وراها خنقه كبيره اوي : طب انا اسف
بصتله امنيه بانتصار : علي ايه ؟
امنيه * كنت متاكده انك هتيجي زي الجردل و تركع كمان قدامي
عمر : علي الكلام اللي قلته معلش كنت سخيف شويه معاكي
امنيه : اممممممم بس مش غريبه ؟
عمر : هي ايه اللي غريبه ؟
امنيه : انك تطلب تقابلني علشاني تعتذرلي .. انا ابقي ايه في حياتك يعني علشان تقولي اسف لا حبيبتك و لا خطيبتك و لا ها بنت عمك زي حنين هانم
عمر * اللهم طولك يا روح
عمر : مين قال انك مش حبيبتي؟
امنيه و بدأت تحس في كلامه بحاجه مش مظبوطه : و الله ؟
عمر : علشان قلتها في لحظه عصبيه و زعل خلاص هتصدقيها
امنيه * مش عارفه ليه حاسه انك بتاكلني الاونطه ... عموما انا مش خسرانه حاجه بالعكس كسبانه في كل الاحوال لكن و حياتك عندي يا عمر لو كنت فعلا بتاكلني الاونطه لاربيك و اعلمك الادب و اخلي سمعه بنت عمك اللي اتحمقت اوي عشانها دي في التراب
عمر : هنقضي اليوم كله سكوت و لا ايه ما تقولي حاجه و لا عامله زعلانه؟
امنيه و بتحاول تفرد وشها : لا هو بعد ما دنجوان الجامعه اعتذرلي و كمان قالي بحبك اقدر ازعل
عمر بابتسامه : انتي كده حبيبتي بجد ... يلا بينا
امنيه : علي فين ؟
عمر : نعمل حفله صغيره في المكتب عندي بالمناسبه دي
امنيه : ها شكلك عاوز جردل ميه المره دي
عمر : لالالا مش اللي جيه في بالك خالص ... احنا هنقعد بادبنا نرقص نغني نشرب و لو عيزاني اعزملك اصحابنا يجيوا معنديش مانع علشان تطمني
امنيه : لا و علي ايه انا بميه راجل و اقدر احمي نفسي من عشره زيك
عمر : طب يلا يا ست الرجاله
امنيه : يلا
نرجع تاني للمطعم مع خالد و همس
همس : مقلتليش الرومانسيه دي كلها علشان تعبت شويه امبارح ؟
خالد و عينه في عنيها و ماسك ايدها : لا علشان بحبك
همس : طب ماانا كمان بحبك و اوي كمان ... بس عايزه افهم
خالد : تفهمي ايه يا حبيبتي؟
همس : ايه السبب لده كله ؟
خالد : هو انا اول مره اقولك بحبك ؟
همس : لا طبعا
خالد : طب و اول مره اعزمك بره علي الغدي ؟
همس : برده لا ... بس بوكيه الورد ده
خالد : ايه اول مره ؟
همس : لا تاني مره بس الاولي كانت لما نجحت في الثانوي و جبتلي معاه السلسله دي
سلسله فيها حرف K و H و ايه الكرسي جبهالها هديه يوم ما نجحت في الثانوي دايما لبساها لكن بتخبيها طول ما هي في البيت علشان محدش ياخد باله من حرف K و كان معاها بوكيه ورد
همس : المره دي بقي اكيد في سبب برده مش كده ؟
خالد : السبب هو اني ظلمتك و قسيت عليكي من غير ما افهم اصل الحكايه و خليتك تتعبي و دموعك اللي وعدتك انها مش هتنزل تاني ابدا نزلت و كمان بسببي و عشاني كل ده ميستاهلش بوكيه ورد ؟
همس بلخبطه: ظلمتني ازاي يعني و حكايه ايه اللي عرفت اصلها ؟
خالد : بصراحه علشان لازم تعرفي و مني مش من حد تاني ... انا ... رحت لسما الكليه النهارده
اتقلبت الفرحه اللي علي وشها لحزن و زعل و دموع علي وشك الانفجار
خالد : سامحيني يا همس بس كان لازم اطمن عليكي
نزلت دمعه علي خدها بهدوء و هي بتبصله اوي
خالد : لا يا همس علشان خاطري بلاش دموع و حياه خالد و غلاوته عندك
مسحت دمعتها و بدات تتكلم
همس : للدرجادي مش واثق فيا يا خالد ؟
خالد : لا .. لا و الله الموضوع مش كده خالص انا خفت عليكي خفت يكون في حاجه كبيره ممكن تضرك و انتي مخبياها عليا
همس : انا قلتلك ان الموضوع ميخصنيش و انه يخص سما.. يعني انا كدابه من امته و انا بكدب عليك علشان متصدقنيش و تشك في كلامي
خالد : لا يا همس انا معملتش كده لانك كدابه و لا عمري شكيت فيكي او في كلامك كل اللي حصل ان كلامك قلقني و حسيت فيه بحاجه مريحتنيش و كان لازم استريح و اطمن عليكي
همس : يعني تطمن عليا و تستريح و تتعب ناس تانيه ... ذنبها ايه سما تعمل فيها كده .. اكيد حكتلك علي كل حاجه ... و اكيد حالتها وحشه اوي دلوقتي
خالد : اقسملك اني ما كنت قاصد حاجه من دي و لا كنت عارف ان الموضوع ممكن يكون كده ابدا انا اتصدمت و اعتذرتلها و هي قبلت اعتذاري
همس : بس انا مش قابله اعتذارك ليها يا خالد ... لو سمحت وديني عندها دلوقتي
و قامت وقفت
خالد : همس اقعدي لو سمحتي الامور متتاخدش كده
و شدها من ايدها قعدها
همس : امال تتاخد ازاي يعني ندوس علي مشاعر الناس علشان نريح نفسنا
خالد بعصبيه هاديه : قلتلك مقصدتش كده انتي اللي غلطتي من الاول لما محاولتيش تفهميني الحكايه و لا حتي تلمحيلي من بعيد ايه اللي بيحصل كان فيها ايه يعني لو كنتي عرفتيني بدل ما حطيت نفسي و حطيتك و حطتها في الموقف ده
همس بصوت بدأ يعلي : انت مش من حقك انك تعرف حاجه زي دي
خالد باستغراب من اسلوب الرد : انتي ازاي بتعلي صوتك عليا ؟
همس :.............. ..
خالد بنظره عتاب و زعل : قومي يا همس نمشي
قامت و هي مربعه ايدها و مشيت بسرعه اوي قدامه من غير و لا كلمه
ركبوا العربيه و هما في حاله سكوت تام و خالد واخد طريقه للبيت
همس : لو سمحت انا عايزه اروح لسما
بمنتهي العصبيه زاد من سرعه العربيه من غير ما يرد عليها
همس بصوت عالي للمره التانيه : بقولك عايزه اروح لسما
خالد بصوت اعلي من صوتها : اخرسي بقي
وصلوا البيت و كل واحد دخل لوحده و بوكيه الورد سابته همس في العربيه و طلعت بسرعه علي اوضتها و هي بتعيط بعد ما رمت السلام بسرعه و من غير ما تستني رد علي الموجودين ( ندي و مصطفي )
دخل خالد وراها بعد ما ركن العربيه و بيحاول يهدي علشان محدش ياخد باله
خالد : السلام عليكم
ندي و مصطفي : و عليكم السلام
ندي : ايه يا خالد همس مالها؟
خالد : ملهاش كويسه
مصطفي : كويسه ازاي دي داخله بتعيط
خالد : كانت عايزه تروح لصاحبتها دلوقتي و انا مرضتش
ندي : و مرضتش ليه يا خالد دي لسه مبقتش مراتك علشان تتحكم فيها؟
بصلها باستغراب و بص لمصطفي
مصطفي : انا قلت لامك علي طلبك و هي هتبتدي تقول لجدتك واحده واحده
خالد : ان شاء الله بعد اذنكوا
ندي : بالراحه عليها شويه يا خالد دي لسه صغيره
خالد بصلها من غير ما يتكلم و طلع علي اوضته
في بيت سيف و حنين
باليل راح سيف لحنين علي اوضتها بعد ما اداها دوا للصداع اللي ادعت انها بتشتكي منه و فيه منوم لعده ساعات
خبط علي الباب قبل ما يدخل علشان لو كانت لسه نايمه .. لكن كانت صحيت و سمحتله بالدخول
سيف : الجميل عامل ايه دلوقتي ؟
حنين : الحمد لله
و اشوفكم الحلقه الجايه | |
|
| | |
دعيبس
عدد الرسائل : 16
العمر : 51
البــلـد : مصر
تاريخ التسجيل : 21/09/2009
| | موضوع: رد: قصة رومانسية (همس الروح) الخميس مارس 18, 2010 5:11 pm | |
| | |
|
| | |
سيد
عدد الرسائل : 32
العمر : 48
البــلـد : ام الدنيا ( مصر )
تاريخ التسجيل : 20/09/2009
| | موضوع: رد: قصة رومانسية (همس الروح) الخميس مارس 18, 2010 7:51 pm | |
| بجد انتى جامده قوى يا همس | |
|
| | |
بسانت
عدد الرسائل : 41
العمر : 53
البــلـد : السعودية
تاريخ التسجيل : 19/09/2009
| | موضوع: رد: قصة رومانسية (همس الروح) الخميس مارس 18, 2010 8:03 pm | |
| ياخواتى عليكى
يعطيك الف عافيه | |
|
| | |
بنت من شوبرا
عدد الرسائل : 27
العمر : 49
البــلـد : egypt
تاريخ التسجيل : 22/09/2009
| | موضوع: رد: قصة رومانسية (همس الروح) الجمعة مارس 19, 2010 12:57 pm | |
| ايه الحلاوة دى كلها يا همس فينك من زمان | |
|
| | |
همس النجوم
عضوه نشطه
عدد الرسائل : 60
العمر : 32
البــلـد : مصر
تاريخ التسجيل : 25/09/2009
| | موضوع: رد: قصة رومانسية (همس الروح) السبت مارس 20, 2010 5:38 am | |
| الحلقه الثالثة و العشرين
في بيت سيف و حنين
باليل راح سيف لحنين علي اوضتها بعد ما اداها دوا للصداع اللي ادعت انها بتشتكي
منه و فيه منوم لعده ساعات
خبط علي الباب قبل ما يدخل علشان لو كانت لسه نايمه .. لكن كانت صحيت و سمحتله بالدخول
سيف : الجميل عامل ايه دلوقتي ؟
حنين : الحمد لله
سيف بعد نظره طويله لحنين اربكتها : مش هتقوليلي مالك ؟
حنين : ما.. مالي ازاي يع يعني انا كويسه و الصداع راح خلاص
سيف : انا مقصدش الصداع انا اقصد السبب اللي سبب الصداع ده لو كان فيه صداع من اصله
حنين بلخبطه : ايه ؟؟ انا مش فاهمه تقصد ايه؟
سيف : لا انتي فاهمه قصدي و عارفه انا بتكلم عن ايه
حنين حطت وشها في الارض و كانت علي وشك تنفجر مره تانيه في العياط
سيف بعد تنهيده : انا مش هضغط عليكي و هسيبك براحتك بس لازم تعرفي اني اكتر واحد بيخاف عليكي و علي مصلحتك ... لو حبيتي تتكلمي انا مستنيكي
و خرج و سابها
فضلت تعيط جامد لوحدها ( محتاجه تتكلم معاه و لسانها مش قادر يطاوعها خوف منه او قلق من رد فعله للاسف متعرفش )
اتصلت همس بسما تعتذر عن اللي عمله خالد
همس : انا اسفه اوي يا سما
سما : اسفه علي ايه يا همس؟
همس : يعني اللي عمله خالد و كده بجد انا اتصدمت و اتخانقت معاه بسبب الحوار ده
سما : ليه كده بس يا همس خالد بيحبك و معملش كده غير بسبب قلقه عليكي
همس : قلقه عليا و لا شكه و عدم ثقته فيا ..... سكتت ثواني و كملت المهم انتي عامله ايه دلوقتي ؟
سما : انا بخير الحمد لله .. انتي لازم تصالحي خالد يا همس صدقيني انا شفت في عنيه نظره حب و قلق عليكي جميله اوي.. هو كل اللي يهمه انتي و بعدين هو اكيد لو يعرف ان الحوار كده مكنش جالي و طلب مني احكيله
همس : انا عارفه يا سما كل اللي بتقوليه ده و متاكده منه بس انا فهمته ان الموضوع مالوش علاقه بيا و هو مصدقنيش و شك في كلامي علي الرغم انه عارف كويس اني عمري ما كدبت عليه في اي حاجه ...
سما : لا هو مقصدش كده خالص هو صدقك لكن كان عاوز يعرف اصل الموضوع علشان يطمن مش اكتر ... روحي صالحيه يا همس خالد بيحبك اوي
همس بعد تنهيده : ان شاء الله
بعد انهيار دام حوالي ربع ساعه خلاص مبقتش قادره حاسه ان دماغها هتنفجر من التفكير قررت تروحله و تتكلم معاه ..في ايه لحد لما دخلت و قعدت معاه هي متعرفش !!
خبطت و اذنلها بالدخول قعدت و هي دموعها علي خدها و عنيها منتفخه .... فضل يبصلها جامد من غير كلام و هو في حاله زهول من منظرها و بعد كده بدأ يتكلم بجديه
سيف : لسه برده مصره ان الحوار حوار صداع ؟
حنين بصتله اوي و قامت باندفاع رمت نفسها في حضنه
بدأ يملس علي شعرها و بهدوء يهدي فيها
خرجها من حضنه و مسح دموعها و استناها تحكي لوحدها من غير ما يطلب منها
اما عنها كانت متردده تردد غير عادي لامت نفسها علي انها حطت نفسها في الموقف ده و اتمنت لو فكرت تاني قبل ما تندفع و تروحله لكن مكنش قدامها مخرج غير انها تحكيله علي كل حاجه لان بعد اللي شافه بعنيه مينفعش تخبي اي حاجه
بدات تهدي و تتكلم و هو ساكت بيبصلها في عيونه القلق و الحنيه و الخوف من اللي هيسمعه
حنين : حبيته اوي .. من زمان من و احنا صغيرين و انا كل يوم بتعلق بيه اكتر من اليوم اللي قبله ... ياما حلمت بنظره حب في عنيه بس عمري ما شفت غير نظره الاخوه او الصداقه مش فارقه كتير
بدأ يستنتج بقيه الحكايه و توقع يكون يا اما خالد يا اما عمر و لكنه لسه صامت و بيسمعها
حنين بتكمل : النهارده بالصدفه شفته في الكليه استغربت و فرحت و لما قربت ناحيته حسيته ارتبك لكن عملت نفسي مش واخده بالي من ارتباكه........ .............
حكت كل اللي حصلها مع عمر بالتفصيل زي ما حصلها و كانها كانت متبنجه او بتحكي لنفسها و ده بسبب سكوت سيف طول ما هي بتحكي بيسمعها بانتباه مفاقتش غير علي صوته اخيرا
سيف : عمر مش كده؟
حنين بصتله اوي و عيطت تاني بعد ما هزت راسها بمعني ايوه هو
سيف قرب منها و مسح دموعها و بدأ يتكلم : من و احنا صغيرين و انا بخاف عليكي منه كنت حاسس انك هتحبيه او بتحبيه فعلا .. لما كنتي بتطلبي مني اخدك معايا و انا رايح هناك كنت بتهرب منك و احاول علي قد مااقدر اقلل احتكاكك بيه ... بس لما كبرنا قلت خلاص العيله الصغيره كبرت عقلها هيمنع قلبها انه يفكر في واحد زي عمر .. كل يوم مع واحده ده غير انه فاشل مالوش هدف ... بس واضح اني غلطت او استهونت بقدره القلب في السيطره علي العقل.......
بص في عنيها اللي مليانه دموع و اهات و كمل : الحب يمكن مبنقدرش نمنعه يدخل قلوبنا لكن نقدر ندفنه و نردم عليه خصوصا لو مكنش يستاهل صحيح ده صعب و متعب و مؤلم بس مش مستحيل .... بطلي تفكري فيه امنعي قلبك من حبه باي طريقه يا حنين امنعيه ..فكري في نفسك انتي احسن منه مليون مره شوفي انتي ايه و هو ايه ... شوفي انتي قد ايه جميله مش بس شكلا لا باخلاقك و احترامك و ذكائك و رقتك كل الحاجات دي بيتمناها الف شاب احسن من عمر... اكيد هتلاقي فيهم واحد يقدر القلب ده بكميه المشاعر الجميله اللي جواه........
اوعي تفتكري ان عمر بيحب البنت دي لا ... دي زي اي بنت عرفها هو يمكن استفذه غرورها لكن محبهاش ... اللي زي عمر مش هيعرف معني الحب الا لو داق من مرارته ... انسيه يا حنين ... انا عارف ان طلبي صعب و مش هيحصل بسهوله بس لو حاولتي هتقدري مش كده يا حبيبتي ؟
حاولت تهدي و تمسح دموعها
حنين : هحاول
سيف : و هتقدري ....ان شاء الله هتقدري
حنين : يارب
قاعد في اوضته زعلان اوي منها مش مصدق ان اسلوبها معاه في الكلام وصل لدرجه انها تعلي صوتها عليه قدام الناس ... كل لحظه بتعدي عليه كانت نار بتزيد في قلبه ... مستني خبطه الباب ... و كلمه الاعتذار .... و نظره الحب لكن للاسف......
اما هي فحالتها نفس حالته مستغربه من شكه فيها .. طول عمره واثق فيها حتي من قبل ما يعرف بحبها ليه ازاي قدر يدوس علي سما بالطريقه دي هو ده خالد اللي عايشه طول عمرها بحنيته عليها فضلت قاعده حزينه مستنيه كلمه اسف ... نظره ندم ... حضن يدفيها لكن برده للاسف.....
و يبقي الحال علي ما هو عليه كل واحد شايف التاني غلط في حقه و المفروض يعتذر للتاني و بعد شويه تقل و زعل هيرجع لحضن حبيبه .. لكن خلاص الوقت عدي و جيه تاني يوم
في الجامعه
كان عنده محاضره ليها فكر يعتذر عنها لكن بثبات دخل و شرح حاول يبعد بعينه عنها لكن هيبعد ازاي قلبه عن التفكير فيها
في نهايه المحاضره قرب منه مجموعه من الشباب و البنات يسالوه اسئله في المحاضره
فضلت هي في مكانها متسمره قلقانه و خايفه عليه
همس* شكله تعبان اوي واضح انه منامش و لا حتي دقيقه ... طب و هتسبيه كده يا همس ... اعمل ايه يعني مقدرش اعتذرله ... بس سما عندها حق يعني ده جزاته انه قلقان عليكي... لا ده شك مش قلق ... متضحكيش علي نفسك انتي عارفه ان خالد بطبعه قلوق و مش شكاك ... برده انا مش عيله صغيره علشان يعمل معايا كده ... لا صغيره ... مش صغيره و مش هعتذر
قاطع شرودها واحد وقف فاجاه قدامها
مؤمن : ازيك يا همس
همس بلخبطه بعد ما بصت بسرعه علي خالد : مؤمن
لاحظ خالد اللي كان غصب عنه ما بين لحظه و التانيه يبص لهمس مؤمن و هو واقف معاها و بنرفزه هاديه اعتذر للطلبه اللي معاه و خرج من المدرج
مؤمن : انا قلت اطمن عليكي
بصتله باحتكار
همس : تطمن عليا و لا عاوز توقع بيني و بينه؟
مؤمن : لا طبعا يا همس مقصدش كده خالص و الله
همس : بعد اذنك
و جريت بسرعه بره المدرج
في كليه الاداب و حنين قاعده مع ايمان بتحكيله علي اللي حصل مع سيف فاجاه لمحت عمر جي من بعيد
لمحها عمر و قرب منها و مع كل خطوه بيخطيها مليون دقه قلب بتقطع في حنين
ايمان : يلا نمشي قبل ما يجيي
حنين : لا ... مش عيزاه يحس بحاجه لازم ابان طبيعيه و كمان لو سالني عليها هرد بمنتهي البرود
ايمان : ايوه صح عندك حق .. بس اوعي تضعفي
حنين : متخافيش عليا الضربه اللي مبتقتلش بتقوي
بصتلها ايمان بابتسامه و حست انها بدات تعمل بكلام سيف بعدت شويه عنها و سابتها منها ليه بعد ما اطمنت عليها
قرب عمر نحايتها قابلته بابتسامه وراها مليون اه اما هو فكان داخل جد اوي
عمر : ازيك يا حنين
حنين : تمام اوي ازيك انت يا عمر
عمر : الحمد لله ... ممكن بعد اذنك نتكلم لوحدنا شويه؟
حنين : انا مشفتش امنيه النهارده اكيد مجتش
عمر : انا جايلك انتي
ردت عليه بضحكه سخريه
عمر : المره دي و الله جايلك انتي و لازم اتكلم معاكي و تسمعيني
حنين : عايز مني ايه اكون واسطه بينك و بينها ... انا معرفش الاشكال الزباله دي انا واحده متربيه و بنت ناس اصحابي كلهم ناس محترمه
عمر بنظره عتاب : الله يسامحك
حنين بصت الناحيه التانيه و ربعت ايدها : عاوز ايه يا عمر ؟
عمر : عاوز احذرك منها دي بت زباله زي ما قلتي و نويالك علي نيه وحشه و انا خايف عليكي يا بنت عمي
حنين بلخبطه : نيه ايه انا عملتلها ايه اساسا علشان تنويلي علي نيه وحشه او حلوه .. و بعدين مش دي حبيبتك بتحذرني منها علي اي اساس؟
عمر بعصبيه : دي مش حبيبتي و لا زفت دي راميه نفسها عليا ... انا امبارح كنت خلاص نهيت علاقتي بيها اللي مكنتش اكتر من صداقه لكن هددتني بيكي علشان كده طاوعتها و كان لازم احذرك ... خلي بالك من تصرفاتك معاها يا حنين اوعي تقربي منها او من اي حد من الزباله اللي هي تعرفهم خليكي في حالك لحد لما اشوف هعمل معاها ايه
حنين بفرحه و لخبطه و خوف : يعني انت مش بتحبها ؟
عمر بص اوي في عنيها و في سره قال
يارتني انفعك يا بنت عمي
حنين بصتله اوي و استنتجت من سكوته انه بيكدب عليها في حوار الحب ده
عمر بعد تنهيده : و الله ما بحبها
حنين:..........
عمر : و لا بحب اي حد تاني
حنين* يااااااااااه حرام عليك انت غاوي تقطع في قلبي يااخي
عمر : خلي بالك من نفسك يا حنين و لو حصل اي حاجه منها تعالي بلغيني و انا اقسملك هقتلها لو مست شعره منك
حنين : يااااه و ده ليه ان شاء الله ...تقتلها عشاني؟
عمر : عشان ... عشان انتي بنت عمي
حنين بحزن : ربنا يستر يا عمر
عمر : للمره التالته خلي بالك من نفسك علشان خاطري
حنين : حاضر ان شاء الله
قربت ناحيه مكتبه و هي بتقدم رجل و بتاخر عشره عارفه بحالته دلوقتي اللي اكيد ساءت مليون مره اكتر من الاول بعد ماشاف مؤمن واقف معاها
خبطت علي باب المكتب بتردد و دخلت
كان قاعد علي مكتبه سرحان حزين تعبان مسمعش خبطه الباب و لا حس بدخولها عليه
همس : انا اسفه
خرج من شروده و بصلها اوي من غير ما يرد عليها وبص الناحيه التانيه
همس : خالد و الله هو اللي جيه ووقف معايا و انا سبته و مشيت و الله
حاول ينتبهلها
خالد : هو ده اللي جابك تتاسفي؟
همس : انا عايزه اتاسفلك من امبارح و متردده
خالد : التردد ده معناه انك عايزه اه لكن مش مقتنعه بالاسف ده
همس : ما هو بصراحه انت غلطان
خالد : غلطان علشان خايف عليكي .. غلطان علشان بحبك و كل خطوه بتخطيها في حياتك تهمني و بحس انها تخصني قبل ما تخصك
همس : غلطان علشان جرحت سما و هي ملهاش ذنب و كمان شكيت فيا
خالد : انا عمري ما شكيت فيكي و لو كان حصل مكنتش سامحتك من البدايه متفتكريش اني صالحتك علشان تعبتي فصعبتي عليا لا ده علشان حسيت اني قسيت عليكي و اني غيرتي عليكي خلتني غصب عني كبرت الموضوع .. اما سما فانا لو اعرف ان الموضوع كده مكنتش هقرب منها و بعدين دي زي اختي انا ممكن اساعدها في موضوعها ده اكتر من اي حد حتي منك انتي
همس : بجد ؟
خالد : و هو ده بس اللي يهمك ؟
همس :.............
خالد : عارفه انتي عملتي ايه امبارح؟
همس:.........
خالد : لاول مره بتعلي صوتك عليا و مش بس كده لا قدام الناس و كاني عيل من العيال التافهه ماشي معاكي بعاكسك مثلا و لا بلعب بيكي.... عارفه انا كان مفروض رد فعلي ساعتها يكون ايه ؟
همس:..........
خالد : قلمين علي وشك قدام الناس اللي زعقتي فيا قدامهم علشان يفوقوكي
همس:
خالد : مش مصدقاني؟!.. اي واحد مكاني مفروض يكون ده اقل رد فعل للي انتي عملتيه
همس : و مضربتش ليه ؟
خالد : مش عارفه ليه ... علشان بحبك علشان بخاف عليكي و علي منظرك قدام اي حد ايا كان ... علشان انتي همس ...روحي ... مينفعش اعمل في روحي كده و الا مبقاش استحق سكونها جوايا... جوه قلبي
همس بخجل من كلامه : انا اسفه
خالد : و اسفك هيعملي ايه .. هيرجعلي كرامتي اللي بعترتيها قدام الناس و لا هيخليني انسي نبره صوتك اللي بترن في ودني كل دقيقه و انتي بتزعقي فيا ؟!!!
همس : مفيش حد مبيغلطش و دي اول غلطه اغلطها في حقك ...علشان خاطري سامحني
خالد بنظره حزن : خاطرك اغلي عليا من النفس اللي بتنفسه بس حقيقي مش قادر اسامحك
نكمل الحلقه الجايه ان شاء الله | |
|
| | |
NANO
مشرفة المكتبة الاسـلامية
عدد الرسائل : 84
العمر : 38
البــلـد : مـصر
تاريخ التسجيل : 14/06/2009
| | موضوع: رد: قصة رومانسية (همس الروح) الثلاثاء أبريل 13, 2010 4:17 am | |
| يا سلام عليكى يا هموسة حلوة اوى
ها فين الباقى | |
|
| | |
بسانت
عدد الرسائل : 41
العمر : 53
البــلـد : السعودية
تاريخ التسجيل : 19/09/2009
| |
| | |
ندا
عدد الرسائل : 60
العمر : 38
البــلـد : مصر
تاريخ التسجيل : 31/07/2008
| | موضوع: رد: قصة رومانسية (همس الروح) الخميس أبريل 22, 2010 5:08 pm | |
| فينك من زمان يا همس وحشتينا
تسلم ايدك وما تتاخريش علينا اووى كدا | |
|
| | |
بنت ابوها
عدد الرسائل : 12
العمر : 35
البــلـد : كفر الشيخ
تاريخ التسجيل : 13/11/2009
| | موضوع: رد: قصة رومانسية (همس الروح) الخميس أبريل 22, 2010 6:21 pm | |
| تسلم ايدك يا همس وعيزين الباقى | |
|
| | |
سيد
عدد الرسائل : 32
العمر : 48
البــلـد : ام الدنيا ( مصر )
تاريخ التسجيل : 20/09/2009
| | موضوع: رد: قصة رومانسية (همس الروح) الخميس أبريل 22, 2010 6:25 pm | |
| انتى جميله اوووووى ياهمس وياريت ما تحرميناش من الجمال ده
سملت يداك | |
|
| | |
بنت من شوبرا
عدد الرسائل : 27
العمر : 49
البــلـد : egypt
تاريخ التسجيل : 22/09/2009
| | موضوع: رد: قصة رومانسية (همس الروح) الخميس أبريل 22, 2010 6:28 pm | |
| | |
|
| | |
reem
عدد الرسائل : 40
العمر : 37
البــلـد : egypt
تاريخ التسجيل : 23/07/2008
| | موضوع: رد: قصة رومانسية (همس الروح) الخميس أبريل 22, 2010 6:32 pm | |
| مشكورة هموووووسه وياريت ما تتأخريش علينا كده  | |
|
| | |
همس النجوم
عضوه نشطه
عدد الرسائل : 60
العمر : 32
البــلـد : مصر
تاريخ التسجيل : 25/09/2009
| |
| | |
همس النجوم
عضوه نشطه
عدد الرسائل : 60
العمر : 32
البــلـد : مصر
تاريخ التسجيل : 25/09/2009
| | موضوع: رد: قصة رومانسية (همس الروح) الأحد أبريل 25, 2010 8:44 am | |
| الحلقه الرابعة والعشرين
قابله بالصدفه و طلب منه يجيي معاه علي مكتبه
مؤمن : خير يا دكتور في حاجه ؟
خالد : اقعد يا مؤمن
قعد قدامه و في دماغه مليون سؤال محتاجين اجابه سريعه و الا هيتجنن
خالد : انت تعرف همس و سما من امته ؟
مؤمن بلع ريقه و اترعب و خاف تكون همس اشتكتله : من ... من و احنا في اعدادي تقريبا ليه ؟
خالد : عارف ان همس قريب اوي هتكون خطيبتي ؟
مؤمن بحزن : ايوه عرفت
خالد : يعني وقفتك معاها دي و قدامي ملهاش غير تفسير واحد.... انك مش عاملي اي احترام و لا لاني ابن عمتها و لا اني هبقي قريب اوي خطيبها و جوزها .... و لا ايه رايك ؟
مؤمن نزل راسه في الارض و قال : انا اسف يا دكتور الحكايه دي مش هتتكرر تاني
خالد : ما هي مش هتتكرر تاني و ده هيبقي غصب عنك مش برضاك
مؤمن رفع راسه برعب و منطقش
خالد : ده مش تهديد علي فكره ... يعني مش هسقطك في مادتي و اوصي زمايلي يسقطوك الحمد لله ده مش طبعي خالص .
مؤمن : امال ده ايه ؟
خالد : اعتبره طلب مؤقتا و الا حسابك هيبقي معايا خارج الحرم الجامعي
مؤمن سكت و هو مخنوق من كلامه
خالد بدء يهدي و يتكلم بالراحه معاه
خالد : انت زي اخويا الصغير و بصراحه انا حاسس ان جواك شخصيه ناجحه و دكتور موهوب و دي صفات مش موجوده في ناس كتير ياريت تخلي بالك من دراستك و تخلي بالك من الناس اللي حواليك ... لان فيه منهم ناس بتحبك اوي و نفسها تحس بيها و بحبها
مؤمن استغرب من كلمته اللي مش اول مره يسمعها
مؤمن : ناس مين ؟
خالد : لو دورت في الناس اللي تعرفهم هتلاقي اللي عنيه بتقولك في كل نظره بحبك و بيتقطعوا كمان علشان... علشان عدم اهتمامك بيهم و اهتمامك بناس تانيه عمرها ما هتفكر فيك
مؤمن * هيكون مين اللي بيتقطع علشاني و بيحبني اوي كده
مؤمن : ربنا يسهل يا دكتور
خالد : اتفضل دلوقتي و ياريت تنفذ الكلام اللي قلتلك عليه في البدايه و الا انا وقت الجد معرفش حد
مؤمن بصله بقلق و منطقش و خرج من سكات
في بيت حنين و سيف
دخلت عليه اوضته تحكيله اللي حصل مع عمر علشان ينصحها
سيف : خير يا حبيبتي عنيكي بتقول ان في حاجه ؟
حنين : عمر جالي الكليه
سيف بعصبيه : جيه يهبب ايه و بعدين تلاقيه كان جاي عشانها مش عشانك
حنين : لا هو كان جاي عشاني انا هو قالي كده
سيف : هو ده اتفاقنا يا حنين هي دي هنساه.. ايه اللي وقفك معاه ها ؟
حنين : محبتش يشوف ضعفي وقفت معاه عادي و كان محصلش حاجه
سيف و خلاص صبره قرب ينفد : و بعدين كان عاوز ايه ؟
حنين عنيها بدات تدمع
سيف : في ايه اتكلمي متقلقنيش يا حنين انا مش ناقص
حنين : حذرني من امنيه
سيف : حذرك منها ازاي يعني و انتي مالك و مالها؟
حنين : قالي انه مبيحبهاش و لا حاجه و نهي علاقتوا بيها لكن هي هددته بيا
سيف بصوت عالي : و انتي مالك انتي و مال حوارتهم دي ؟
حنين و هي بتعيط : معرفش يا سيف هو قالي كده و قالي خلي بالك من نفسك و انا هقتلها لو مست منك شعره
سيف بصوت اعلي : ده انا اللي هقتله هو و هي
و قام بسرعه يلبس هدومه
حنين : هتعمل ايه يا سيف ؟
سيف و هو بيلبس: مالكيش دعوه انتي و اياكي اسمع انك وقفتي مع الزفت و لا الزفته دي انتي فاهمه ؟
حنين : حاضر و الله ما هقف مع حد فيهم بس قولي هتعمل ايه؟
سيف مردش عليها و كان خلص لبس و اخد مفاتيحه و بسرعه مشي و سابها منهاره
في بيت اتملي اخيرا بالسعاده و الحب اللي اتمنعوا عنه بقالهم فتره طويله بيعيش احمد و ميرنا بعد مرور يومين علي جوازهم
ميرنا : تعرف اني لغايه دلوقتي مش مصدقه اللي بيحصل ده
احمد بنظره مليانه حب : و هو ايه اللي بيحصل؟
ميرنا : انا و انت بقينا في ساعه واحده اسعد زوجين في الدنيا ياااااه بجد حاسه اني طايره
احمد : انا كنت محتاجلك اوي.. كنت عايش من غير روح من غير قلب لاني كنت سايبهم معاكي من يوم ما عرفتك
ميرنا : مش عايزين نفتكر الايام دي تاني ابدا احنا خلاص دلوقتي بقينا اسعد اتنين مش عايزين من الدنيا حاجه تاني
احمد : انا عايزك تفضلي تحبيني و تخافي عليا و اوعي يا ميرنا تسبيني هضيع من غيرك
ميرنا : عمري ما هسيبك ابدا يا حبيبي
احمد : ربنا يخليكي ليا يا مراتي يا حبيبتي
ميرنا : و يخليك ليا يا قمر
في البدايه دخل الفيلا بهدوء سال الشغاله مين اللي موجود قالت خالد و عمر و همس
بعدها طلع جري علي اوضه عمر
كان نايم دخل عليه بسرعه من غير ما يخبط
سيف بعصبيه و صوت عالي جدا : نايم و لا علي بالك حاجه طبعا و تفوق ليه .. انت يا بيه يا عمر بيه
عمر قام مفزوع علي صوته : سيف
سيف : ايوه سيف يا محترم فز قوم كلمني
قام عمر و هو مخضوض من اسلوبه و من حده كلامه معاه فاق و انتبهله
عمر : في ايه يا سيف ؟
سيف : شوف يا عمر عايز تبقي صايع واطي حقير ده في الاول و في الاخر هيرجعلك لكن اقسم بالله لو حد مس شعره من اختي لاكون قتله و انت هتكون القتيل التاني
عمر بلبخطه : حد .. حد ازاي يعني ؟
سيف : انت عارف كويس انا بتكلم عن ايه و ده مش كلام هقتلك يا عمر و هقتل الحساله اللي انت ماشي معاها
خالد و همس سمعوا صوت الزعيق جري كل واحد يشوف في ايه
دخل خالد في البدايه
خالد : سيف ...!! ايه يا سيف في ايه ؟
سيف بنظره قرف لعمر : اسال البيه اخوك
خالد : في ايه يا عمر ؟
عمر حط وشه في الارض و منطقش
همس جت في الوقت ده وقفت تتفرج من غير ما تدخل
خالد : حد يفهمني في ايه ؟
مهتمش بكلامه و وجه الكلام لعمر و هو بيبصله بقرف
سيف : انا قلت اللي عندي و هنفذه لو حد لمس حنين اخت او عمل فيها اي حاجه تضرها هقتله ايا كان حتي لو كان ابن عمي
و مشي بسرعه بعد الكلمتين دول
حاول خالد ينده عليه لكن مردش
بعدها قفل عليهم الباب بعد ما طلب من همس تسيبهم لوحدهم
خالد : ممكن اعرف فيه ايه ؟
عمر ساكت
خالد : رد عليا
عمر : هو تحقيق يا خالد ؟
خالد : اظن بعد اللي سمعته ده من حقي اعرف فيه ايه؟
عمر : مشكله بيني و بين حنين
خالد : و انت بتشوف حنين فين ؟
عمر : كنت عندها في الكليه النهارده و امبارح
خالد : بتعمل ايه عندها و ايه اللي حصل ؟
عمر بزهق : امبارح مكنتش رايحلها كنت رايح لبنت تانيه هي تكرتني جايلها جت بسرعه تسلم عليا ... قامت الزفته امنيه شافتنا و افتكرتني جاي اغيظها بيها علشان كده هددتني تسوء سمعتها بس هي دي كل الحكايه
خالد : ايه اللي بتقوله ده مين امنيه دي و ازاي تهددك تهديد زي ده و تسكتلها للدرجادي بتحبها يعني و ضعيف قدامها ؟
عمر : بحبها ايه ... لا طبعا لا بحبها و لا نيله هي اللي راميه نفسها عليا
خالد : و الله و الدليل اهه رايحلهاالكليه و حصلت كل البلاوي دي
عمر اخد نفس طويل : يا خالد هي مش اكتر من صحبتي و عادي رحتلها لاننا كنا اتخانقنا و علاقتي بيها مش اكتر من علاقه صداقه و تعود
خالد بقرف من كلامه : المهم عملت ايه معاها ؟
عمر : ثبتها
خالد : ازاي يعني ؟
عمر : قلتلها اني بحبها و مقدرش استغني عنها علشان تبعد عن حنين و تنسي الحوار ده
خالد : مش فاهم انا فيها ايه لما تقف مع بنت عمك طبيعي لما تشوفها تقف تسلم عليها
عمر : لا مش طبيعي خصوصا لما تكون عارفه ان حنين ... بتحبني
خالد : بتحبك ؟؟!!
عمر : ايوه
خالد : و هي ايه اللي عرفها ؟
عمر : كانت صاحبتها في سنه اولي
خالد : اه .. طب و بعدين هتعمل ايه ؟
عمر : اديني ثبتها و خلاص
خالد : يعني هتفضل مثبتها علي طول مسيرها هتعرف الحقيقه
عمر: اهه حل مؤقت
خالد بقرف : مش عارف امته بقي هتتحمل المسئوليه و تبقي راجل
عمر بغضب : خالد
خالد : بلا خالد بلا بتاع ...الموضوع ده تشوفله صرفه دي بنت عمك يعني لحمك و دمك لو حصلها اي حاجه سيف مش هيرحمك و لا حد هيرحمك
عمر بعصبيه :انا اللي مش هرحم اللي يمس منها شعره و الله لو لمستها لاقتلها
خالد : قتل قتل احنا عايزين حل واقعي مش همجي
عمر : و ايه هو الحل الواقعي ده؟
خالد : و الله انا معرفش صاحبتك دي بتفكر ازاي علشان اقولك علي حلول انت ادري واحد بيها
مردش عليه
خالد : فكر و شوف هتعمل ايه وانا هساعدك بس يكون حل عملي مش همجي
عمر بخيبه امل : ان شاء الله
خرج من عند عمر و في طريقه لاوضته لمح بابا اوضه همس مفتوح لكن مهتمش و كمل طريقه
خرجت بسرعه تنده عليه
همس : خالد
خالد بصلها من غير كلام
همس : ممكن تيجي ثواني
خالد : مش فاضي
همس : ربع ساعه بس مش هعطلك
راح معاها دخل وعلامات الحزن و الغضب مرسومه علي وشه
همس : هو سيف كان بيزعق لعمر ليه؟
خالد : موضوع مالكيش فيه
همس بحزن : مش هتسامحني بقي يا خالد
لف وشه الناحيه التاني و مردش عليها
قربت منه و قعدت علي ركبها قدامه علي الارض و الدموع ملت عنيها من قسوته عليها
همس : علشان خاطري تسامحني بقي انا تعبت اوي مش عارفه انام و لا اذاكر هموت يا خالد هموت
سمع في صوتها صوت الدموع لف عينه ناحيه عنيها و شافهم ماليين عنيها
خالد و عنيه مليانه حب و شوق : بعد الشر عليكي
قام و قومها مسح دمعه نزلت علي خدها و ملس علي شعرها
و باس راسها و سابها و مشي
وقفت متنحه مش فاهمه معني اللي عمله يا تري سامحها كده و لا مسمحهاش ؟؟؟!!!!
في الوقت ده ندي كانت قاعده مع مامتها الست ماجده تكلمها في موضوع همس و خالد
ياتري رد فعلها هيكون ايه
هنعرف الحلقه الجايه | |
|
| | |
همس النجوم
عضوه نشطه
عدد الرسائل : 60
العمر : 32
البــلـد : مصر
تاريخ التسجيل : 25/09/2009
| | موضوع: رد: قصة رومانسية (همس الروح) الأحد أبريل 25, 2010 8:58 am | |
| الحلقه الخمسة و العشرين
في الوقت ده ندي كانت قاعده مع مامتها الست ماجده تكلمها في موضوع همس و خالد
فضلوا يتكلموا في كلام عادي طول القاعده و ندي بتحاول تمهد الموضوع
ندي : ماما كنت عايزه اخد راي حضرتك في حاجه
ام رامي : خير يا حبيبتي ؟
ندي : اصل هـ همس جايلها عريس
ام رامي : و مستنيه ايه جوزيها
ندي : بجد يعني حضرتك موافقه ؟
ام رامي : ايوه علي الاقل ترتاحوا منها و من قرفها
ندي و هي بتبصلها باستغراب: هو ده السبب اللي خلي حضرتك توافقي بالسهوله دي؟
ام رامي : ايوه طبعا و هو في اهم من كده ؟!!
ندي : طب مش تعرفي الاول مين العريس؟
ام رامي : مش مهم ايا كان المهم يخلصنا منها و خلاص
ندي بفرحه علي خوف و قلق حاولت تستغل الموقف : يعني اقوله مبروك؟
ام رامي اترسمت الفرحه علي وشها مش علشان بنت ابنها هتتجوز لا علشان هتخلص منها للابد و مهتمتش تعرف مين هو العريس
ام رامي : يا ستي مليون مبروك المركب اللي تودي
ندي بلؤم * الحمد لله كده اخدت منها موافقه رسمي بس ربنا يستر لما تعرف دي ممكن تتبري مني للابد .... ربنا يستر
روحت ندي البيت دخلت علي خالد اوضته قبل اي شئ
ندي : حبيبي الف مبروك
خالد بخنقه في صوته : مبروك علي ايه يا ماما؟
ندي : تيته وافقت علي جواز همس
خالد اتقلب وشه و اتملي بفرحه و سعاده و احساس جميل اول مره يحس بيه
خالد : بجد يعني نتمم علي طول الجواز ؟
ندي بخبث: مستعجل علي ايه يا واد .. كل ده حب ؟
خالد بكسوف : بصراحه اه و اكتر كمان .. و اخيرا حس بحاجه غلط في كلامها .. ازاي ؟
ندي : هو ايه اللي ازاي ؟
خالد : ازاي تيته وافقت بالسهوله دي؟
ندي : اصل .. اصل انا ... مقلتش انك العريس
خالد و الزهول علي وشه : ايه ؟ امال قلتي مين ؟
ندي : مقلتش لانها مسالتش من اصله
خالد باستغراب : معقول توافق كده علي طول من غير ما تعرف مين اللي هيبقي جوز بنت ابنها!!!!
ندي : اهه اللي حصل المهم انها وافقت و خلاص هنحطها قدام الامر الواقع و كده كده لما نيجي نبلغها ان همس خلاص هتتجوز مش هتهتم تيجي او تشوف مين هو العريس
خالد : مش هتهتم بهمس لكن هتهم بخالد و لا هتقوليلها ان الفرح فرح همس و تتفاجئ باني جوزها بعد كام يوم ؟
ندي بخيبه امل : مفكرتش في كده يا خالد بس يمكن لما تعرف تستسلم للامر الواقع
خالد بحزن : كنت فاكرك جايه تبشريني مش تخوفيني يا ماما ... عموما انا ميهمنيش راي تيته المهم راي حضرتك و بابا و مدام موافقين خلاص
ندي زعلت من كلام خالد لكن مقدرتش ترد عليه لانه عنده حق
في بيت حنين و سيف
حنين مخرجتش من اوضه سيف فضلت مستنياه و هي بتعيط اوي خايفه يعمل حاجه في عمر تخسرها اخوها اقرب حد ليها في الدنيا و تخسرها حبيبها و ابن عمها
دخل سيف اوضته و هو مخنوق و مش طايق حد قدامه لقي حنين قاعده مستنياه و بتعيط
اول ما دخل جريت عليه
حنين : عملت ايه يا سيف طمني ؟
سيف بعصبيه : انتي بتعملي ايه هنا ؟
حنين : مستنياك
سيف : اتفضلي علي اوضتك
حنين بحزن : حاضر بس و حياه اغلي حد عندك طمني عملت ايه في عمر ؟
مسك دراعها بعنف : خايفه عليه اوي ؟؟!!!!!
حنين و هي بتتالم : لا و الله خايفه عليك انت
رمي دراعها بنرفزه و سكت
حنين قربت ناحيته
حنين : انا اسفه يا سيف علشان حطيتك و حطيت نفسي في موقف زي ده بس غصب عني مش بايدي
بصلها بحنيه و حس انه قسي عليها اوي و هي ملهاش ذنب
قرب ناحيتها و حاول يمسح دموعها بحنيه جميله اوي
سيف : بطلي عياط و روحي اغسلي وشك
حنين زادت اكتر في العياط
سيف بدلع : يا بت بقولك بطلي عياط مفيش حد يستاهل دمعه واحده من عنيكي الجميله دي
و ضمها لحضنه
حنين : ربنا يخليك ليا يارب يا احن اخ في الدنيا
سيف : مش عايزك تفكري في الموضوع ده تاني و اوعي يا حنين تكلمي البنت دي او اي حد من البلاوي اللي هي تعرفهم و خلي بالك من نفسك اما عمر ده فانا عايزك تشليه م دماغك خالص الفتره دي و ياريت كمان تحاولي تخرجيه من قلبك لانه ميستحقش ذره حب من القلب الجميل ده .. اتفقنا يا حنين؟
حنين : حاضر يا سيف
سيف : اهه انتي كده اختي حبيبتي بجد .. روحي بقي اغسلي وشك و ذاكري انا عايزك تطلعي بتقدير محترم زي السنه اللي فاتت
حنين بابتسامه : ان شاء الله
اتصلت امنيه بعمر و طلبت تقابله بعد ما فكرت في فكره ممتازه هتبينلها اذا كان بيحبها بجد و لا بيثبتها و بيحاول يلعب بيها
وافق طبعا و هو مجبر و نزل يعدي عليها في البيت
نزلتله ركبت معاه العربيه
امنيه بخبث : وحشتني اوي يا قلبي
عمر بقرف : و انتي كمان
امنيه : ها هنروح فين ؟
عمر : ماليش نفس اروح في حته خلينا نلف بالعربيه
امنيه : تيجي نطلع علي القاهره؟
عمر بنرفزه : قاهره ايه انتي هبله
امنيه : امال هنروح فين بس اسكندريه زحمه و الطريق هيقرفنا
عمر : و هي القاهره اللي فاضيه اوي ... هنتمشي في اي مكان هادي و خلاص
امنيه : براحتك
دور العربيه و بدا يتحرك بعصبيه
امنيه : مش عاوز تعرف ايه هو الموضوع اللي انا عيزاك فيه ؟
عمر : امال يعني جاي اشاهد حلاوتك ... خلصيني
امنيه : اولا اتكلم معايا كويس .. انا حبيبتك مش واحده صاحبتك
عمر بدا يحس انه زودها و خاف تحس بحاجه فحاول يهدي
عمر : معلش يا حبيبتي اصلي لسه صاحي من النوم و مخنوق شويه
امنيه : امممم طيب
عمر : ها عيزاني في ايه ؟
امنيه : انا قلت لبابا علي اللي بينا
عمر فرمل بسرعه العربيه
امنيه : ايه يا عمر انت اتجننت ؟
بدا يتماسك بغيظ و كمل سواقه
امنيه : في ايه انا قلت حاجه غلط ؟
عمر : قلتي لابوكي ايه ؟
امنيه : قلتله علي حبنا و قالي انه مستنيك
عمر بنرفزه : نعم ... مستني مين ؟
امنيه و هي بتبصله اوي : مش عارف مستني مين مستني حبيب بنته اللي هيبقي جوزها
عمر : انتي ازاي تتصرفي من دماغك مش مفروض نكون متفقين سوي علي الحوارات دي
امنيه : و الله لقيتك مبتاخدش اي خطوه قلت اخد انا
عمر : انتي اكيد مجنونه
امنيه : مجنونه ليه ان شاء الله مش مفروض كل قصه حب نهايتها الجواز و لا انا غلطانه ؟
عمر بعصبيه و صوت عالي : بس المفروض ان الاتنين بيتفقوا علي كل حاجه مش تتصرفي من دماغك علشان تحطيني قدام الامر الواقع
امنيه : كان نفسي الاقي منك اي خطوه تحسسني بقيمتي عندك لكن واضح جدا انك و لا علي بالك
عمر : بقول ايه من الاخر كده انا لا بتاع جواز و لا غيره
امنيه باستغراب : امال حبك ليا ده ايه ؟
عمر : حب زي اي حب
امنيه : مفيش حاجه اسمها حب زي اي حب ياما تكون بتحبني بجد و النهايه الطبيعيه للحب ده انك تيجي تتقدملي يااما بتضحك عليا و ساعتها هتشوف مني اللي عمرك ما تخيلته و مش انت لوحدك ... لا بنت عمك الاموره و انا عمري ما قلت كلمه و رجعت فيها ابدا
عمر بنرفزه بانت اوي في صوته و في السرعه الجنونيه اللي بقي ماشي بيها
عمر :و الله لو لمستي شعره واحده من حنين لاقتلك يا امنيه و انا برده عمري ما قلت كلمه و رجعت فيها
امنيه : ده كلام جديد اول مره اسمعه يا عمر بيه ... افهم من كده انك كنت بتثبتني و محبتنيش زي ما قلت
عمر : احبك .. ها ده انتي عبيطه شكلك انا اللي عندي قلته و معنديش كلام تاني
امنيه بغل مسكت طفايه الحريق اللي كانت في العربيه و حاولت تضربه بيها
عمر : هتعملي ايه يا مجنونه
في الوقت ده و من السرعه الجنونيه و اللخبطه ظهرت عربيه نقل كبيره قدام العربيه و خبطت فيها
بعد نص ساعه من التفكير و السرحان و التردد قرر يرحلها اوضتها
خبط علي الباب
همس : ادخلي يا داده
فتح الباب بهدوء و البسمه علي وشه
خالد: مينفعش خالودي؟
قامت من مكانها بسرعه و كان الروح اترددت ليها من جديد و جريت ناحيته
وقفت قدامه عنيها في عنيه من غير ما تنطق
خالد : وحشتيني
همس فاقت من الحاله اللي كانت عليها علشان تدخل في حاله تانيه من التوهان : ايه ؟
خالد : بقولك وحشتيني
همس : ده بجد و لا انا بحلم
خالد : لا مبتحلميش يا حبيبه قلبي انتي بجد وحشتيني اوي
همس : ياااااااه مستحيل ... انا قلت خلاص مفيش امل
خالد : ليه يا بت هو انا مش لسه بايس دماغك دي
همس : و سبتني زي الهبله مش فاهمه اي حاجه في اي حاجه
خالد : ههههههه لا حبيبتي مش هبله حبيبتي ست البنات
همس : يعني انت كنت ساعتها خلاص سامحتني
خالد : ده انتي كده مش بس هبله لا و غبيه كمان
همس : يعني بجد كنت سامحتني ؟
خالد : لسه هتستغبي تاني ... يا بت هو انا لو كنت لسه زعلان منك كنت عملت كده ... كنت ابسط حاجه اسيبك و امشي تدعي علي نفسك براحتك
همس : يخربيت غبائي.. و الله لو كنت فهمت كده كنت جريت علي عمتي قلتلها جوزيني ابنك ده بدل ما اولعلكوا في الفيلا دي باللي فيها
خالد : هههههههههههه و نهون عليكي؟
همس : لا طبعا متهنوش عليا يا حبيب قلبي ... بحبك اوي
خالد : و انا بموت فيكي يا روحي .... تعالي نقعد عايزك في موضوع مهم
قربوا عند كرسين جنب المكتب و قعدوا
همس : و ادي قاعده موضوع ايه بقي؟
خالد : ماما كانت عند تيته النهارده و قالتلها انك جايلك عريس
همس : و مقالتش ان العريس ده يبقي انت ؟
خالد : لا للاسف مقالتش .. المهم انا ميهمنيش رايها حتي لو كانت قالت .. انا عاوز رايك انتي
همس : رايي ؟؟!!!!!
خالد : طبعا رايك مش انتي العروسه
همس : و ده سؤال بذمتك طبعا موافقه
خالد : فكري كويس قبل ما تتسرعي
همس : ايه اللي بتقوله ده يا خالد انت عارف كويس انا بحبك قد ايه
خالد : انا مقصدش فكري في انك موافقه تتجوزيني و لالا ... لانك غصب عنك موافقه و الا انا اللي هولع فيكي
همس : امال تقصد ايه ؟
خالد : انا اقصد التوقيت ... هتقدري توفقي بين دراستك و بيتك و لا نستني لما تخلصي ؟
همس : لان حبيبي هيساعدني في دراستي فانا مطمنه .. و حوار البيت ده فاحنا ممكن نعيش هنا مؤقتا لحد لما اخلص دراسه
خالد باندفاع : لا ... مش هنعيش هنا
همس باستغراب: ليه ؟
خالد : اولا لاني عاوز يكون لينا بيت خاص بينا و ثانيا علشان تيته مش عاوزها تدايقك ابدا حتي و لو لمره واحده
همس : يعني هي مش هتيجي تزورنا في بيتنا ؟
خالد : لا معتقدتش ... المهم حوار البيت ده انا هجبلك خدامه تساعدك في شغل البيت ان شاء الله و تبقي كده اتحلت بس اهم حاجه تكوني مقتنعه و ميكنش الجواز هيعطلك عن الدراسه لاني مش هسامح نفسي لو حصلت حاجه زي دي
همس : متقلقش يا حبيبي ... حبيبتك قدها و قدود
خالد بصلها بابتسامه
و في الوقت ده اتفتح الباب بقوه
ندي : الحق اخوك يا خالد
خالد بقلق : ماله عمر يا ماما؟
ندي : عمل حادثه و نقلوه المستشفي
نكمل الحلقه الجايه | |
|
| | |
NANO
مشرفة المكتبة الاسـلامية
عدد الرسائل : 84
العمر : 38
البــلـد : مـصر
تاريخ التسجيل : 14/06/2009
| | موضوع: رد: قصة رومانسية (همس الروح) الأحد مايو 02, 2010 6:37 am | |
| ميرسى يا هموسة على الاحساس الرائع دا | |
|
| | |
Misrya
مـشرفة مميزة
عدد الرسائل : 964
العمر : 41
البــلـد : Cairo
تاريخ التسجيل : 10/03/2008
| | موضوع: رد: قصة رومانسية (همس الروح) الأحد مايو 02, 2010 11:01 am | |
| مشكوره يا همس على المجهود الكبير ده | |
|
| | |
reem
عدد الرسائل : 40
العمر : 37
البــلـد : egypt
تاريخ التسجيل : 23/07/2008
| |
| | |
| | قصة رومانسية (همس الروح) | |
|
