قصة رومانسية (همس الروح)

وين بائى الاصة هموس

يلا ياهموسه كملى القصة

يا رجاله هى بس بتتقل عليكو عشان تكتبولها ردود كتير

عليه
النعمه
من نعمة
ربى
انت
مش
فاهم
حاجه
وصبح صبح يا عم الحج

ويبعدين بأه ف الليله اللى مش فايته دى
فين يا عم هموس باءى القصة

فين يا همةسه باقى القصة

باجى الجصة تكفون

براحة علية ياجماعة انا هنزل القصة اهو بس مش كنت بلقى حد بيدخل ويرد علية فاقولت استنة شوية وادينى هنزل تلاتة او اربع تجزاء ليكو عشان متزعلوش منى

الحلقه الثالثه عشر

خالد : أ أ أ ... ايه هو الموضوع التاني اللي كنتي عوزاني فيه ؟

همس : اه ده موضوع كده بس شخصي شويه

خالد : و الله و بقي ليكي شخصيه يا مفعوصه

همس : المفعوصه كبرت و بتحب

اتفاجا خالد بكلمتها و وشه قلب الوان و الابتسامه و الشوق اللي كانوا في عنيه اتقلبوا لخوف و قلق و عصبيه خباها جواه

خالد : بتحبي؟؟؟!!!!!!

همس حست بخجل شديد جدا من نفسها بسبب تسرعها في انها قالت كلمه زي دي

همس : انا ..... انا عطلتك اوي عن المذاكره بعد اذنك

و بسرعه جريت ناحيه الباب

خالد بعصبيه : استني

وقفت همس في مكانها و هي وشها للباب و ضهرها لخالد مقدرتش تنطق و لا ترد

خالد و هو بيحاول يداري عصبيته : تعالي هنا يا همس

رجعت تاني بمنتهي الهدوء و هي وشها في الارض و في قمه خجلها

خالد : اقعدي

قعدت تاني قدامه علي المكتب بدأ يبصلها اوي من غير كلام و الحزن بيقطع في قلبه

خالد * يااااه يا همس بعد كل السنين و الحب ده تيجي تقوليلي بحب ... طب بتحبي مين و ازاي ...و ليه مش انا يا همس ليه

همس : خالد انا ... و سكتت

خالد : كملي انتي ايه ؟؟؟ بتحبي ؟؟؟!!!!!

همس : انا هقولك علي كل حاجه علشان محتاجه رايك

خالد : ........... اتفضلي

همس : انا بحبــ .....

خالد : كملي

همس و هي عنيها في عنين خالد : بحب واحد , و معرفش اذا كان بيحبني و لا لا ....ساعات بحس انه بيحبني زي ما بحبه و يمكن اكتر و ساعات تانيه بحس اني بالنسبه له مش اكتر من اخت او صديقه.... فكرت كتير اعترفله بمشاعري ناحيته بس كنت برجع في قراري في اخر لحظه... كنت بخاف يجرحني و يصد مشاعري

خالد : و بعدين

همس : عيزاك تساعدني

خالد باستغراب : اساعدك !!!

همس: تقولي اعمل ايه اعترفله بحبي و لا استني لما يتكلم هو

خالد * ملقتيش غيري يساعدك يا همس طب اقولك ايه ابعدي عنه و انسيه ابقي اناني و مبفكرش غير في نفسي و بس ....و لا اقولك روحي قوليله بحبك علشان تضيعي من ايدي.... يااااااارب دماغي هتنفجر .... مش هقدر اقولك غير اللي يمليه عليا ضميري

خالد : شوفي يا همس البنت غاليه اوي و لازم تفضل غاليه طول عمرها لانها لو رخصت في عنين حد هتفضل رخيصه طول عمرها... من حقك انك تحبي و تتحبي لكن لازم تحافظي علي كرامتك متسمحيش لحد انه يجرحها و يهينها حتي لو كان الحد ده ....... حب ... حبيبك ... هو لو بيحبك و شاريكي مش هيتردد لحظه في انه يعترفلك بحبه بس اكيد مستني الوقت الصح اللي يقدر يكون فيه جدير بحبك ... اما لو مش بيحبك و رحتي اعترفتيله بمشاعرك ناحيته مش هيجرحك جرح واحد بس لا جرحين جرح قلبك و جرح كرامتك و جرح الكرامه اصعب بكتير من جرح القلب ... فهماني يا همس

همس : فهماك يا خالد

خالد : خلي بالك من نفسك يا همس و خلي بالك من مذاكرتك... مستقبلك دلوقتي اهم من اي حاجه لازم يكون هدفك الاول علشان تقدري توصلي للاهداف اللي بعده و تحققي كل اللي بتتمنيه

همس : كلامك بيريحني اوي

خالد : علشان انتي متاكده ان هو الصح

همس : طبعا الصح و الا مكنتش فكرت اتكلم معاك في موضوع زي ده

خالد : ربنا يوفقك ... و دلوقتي اتفضلي علي مذاكرتك

همس : حاضر يا خالد بعد اذنك

خالد : اتفضلي

مع كل خطوه بتخطيها النار بتزيد في قلبه نفسه يصرخ من الالم نفسه يقول الف ااااه و ااااه .....بعد ما ريحها بكلامه و قاد النار جواه

خالد * ياريتك ما كبرتي يا همس

دخلت همس علي اوضتها اترمت علي سريرها و هي بتفكر في كلامها مع خالد

همس * تفتكري اني اتسرعت ... بالعكس انتي مقلتيش حاجه ... كان نفسي اقول علي كل حاجه بس مكنش ينفع و اديكي سمعتي قال ايه ... بس هو كان هادي اوي انا اتخيلت انه ممكن يديني قلمين و لا حاجه... خالد عاقل و بيخاف عليكي عشان بيحبك ... بيحبني ؟؟؟!!! .... عندك شك ؟؟

تاني يوم

علشان بيحبوا بعض اوي و عمرهم ما افترقوا من صغرهم هدفهم كان واحد و طريقهم كان واحد و دخلوا كليه واحده ( كليه الطب )

خالد و سيف طبعا عارفين سيف ابن عم خالد

بعد المحاضره الاولي في الكافتيريا بيفطروا

سيف : مالك يا خالد ؟

خالد سرحان و تقريبا مش سمعه

سيف : خالد خااااالد

خالد : ها في ايه يا سيف ؟

سيف : انا اللي فيه ايه في ايه انت ؟

خالد : في ايه فايه ؟

سيف : قاعد سرحان طول المحاضره مكتبتش و لا كلمه ورا الدكتور و دلوقتي بكلمك متردش عليا في ايه ؟

خالد : عندي شويه صداع

سيف : الف سلامه عليك تحب اجبلك اسبرين و لا حاجه ؟

خالد : لا انا هشرب الشاي ده و هبقي كويس ان شاء الله

سيف : بس شكلك بيقول في حاجه اكبر من الصداع

خالد :ابدا مخنوق شويه

سيف : من ايه ؟

خالد : ............... ...

سيف : هتخبي عني برده ياابن عمي

خالد : انا عمري ما خبيت عنك حاجه

سيف : طب في ايه ؟

خالد : همس

سيف : مالها ؟؟؟

خالد : بتحب

سيف : نعم ... بتايه ؟ بتحب مين ؟

خالد : معرفش مسالتهاش

سيف : امال عرفت ازاي شفتها مع حد ؟

خالد : لا هي اللي جت حكتلي

سيف :

خالد : اه و الله امبارح جت قالتلي انا بحب و حكتلي علي كل حاجه

سيف : طب ازاي و حكتلك كده عادي علي اساس انك واحده صاحبتها و لا امها اللي مصحباها و مبتخبيش عنها حاجه

خالد : انا بالنسبه لهمس اكتر من اللي بتقوله ده

سيف : ها ...و الدليل اهه بتحب و جايه تحكيلك عن حبيبها كمان

خالد : سيف و حياه ابوك انا ما ناقصك انا حاسس ان في حد ضاربني علي دماغي مش قادر افكر او اركز في اي حاجه

سيف : ما الكلام متناقض اهه يا خالد منين انت اكبر من انك تكون صاحبها و لا صاحبتها و امها كمان و منين جايه تحكيلك عن واحد بتحبه غيرك ؟

خالد : اهه ده اللي حصل يا سيف و كفايه بقي كلام في الموضوع ده انا حاسس اني تعبان اوي .... انا مروح مش هقدر اكمل محاضرات

سيف : طب استني هوصلك مش هتقدر تسوق و انت في الحاله دي

خالد : لا خليك انت احضر المحاضرات و انا هقدر اسوق ان شاء الله

سيف : طيب خلي بالك من نفسك و ابقي طمني عليك لما توصل

خالد : ان شاء الله سلام

سيف : سلام

في كليه تانيه مع اشخاص و ناس تانيه هنعيش في كليه الحقوق مع عمر

من بعيد جايه و متشوقه جدا انها تشوفه و تتكلم معاه

لمحته نادت عليه من وسط شله اصحابه

حنين : عمر ... عمر

عمر : حنين ... انتي ايه اللي جابك هنا ؟

حنين : كنت معديه من قدام كليتك قلت اجي اسلم عليك

عمر : الكليه نورت يا عسل تعالي اعزمك علي حاجه في الكافتيريا

حنين : لا اصلي عندي محاضره بعد نص ساعه يادوب الحق

عمر : ده كلام يعني تكوني عندي و تمشي من غير ما تشربي حاجه عيبه في حقي يا بنت عمي

حنين : خلاص اوك مش هكسفك بس مش هقدر اتاخر

عمر : و انا مش هاخرك يلا بينا

حنين اخت سيف و بنت عم عمر و خالد في كليه اداب الفرقه الاولي بتحب عمر اوي لكن هو عمره ما فكر فيها مع انها بنت زي القمر

في الكافتيريا طلبلها عصير و قاعدين مع بعض يتكلموا

حنين : اخبار عمو مصطفي و طنط ندي ايه ؟

عمر : تمام الحمد لله و انتي عامله ايه و عامله ايه في كليتك ؟

حنين : الحمد لله الكليه حلوه اوي و انا حبتها اوي

عمر : لو احتجتي اي حاجه تعاليلي انا مصاحب نص الكليه عندكوا من فرقتك لتلات دفع اتخرجوا

حنين : ميرسي يا عمر

عمر : الواد سيف اخباره ايه واحشني اوي؟

حنين : المذاكره واخده كل وقته انا تقريبا مش بشوفه

عمر : اه ماااهه طالع دحيح زي الاتنين اللي عندي في البيت

حنين : خالد

عمر : و همس كمان اما البت دي دحيحه بشكل يخربيت كده مبتبطلش مذاكره و لا ليل و لا نهار كل يوم ادخل عليها اوضتها الاقيها مكفيه عالكتاب زي ما يكون بتاكله مش بتذاكر فيه و كذا مره اشيلها انيمها علي سريرها لما تروح في النوم و هي بتذاكر انا عارف مطلعتش زيهم ليه كان زماني فلحت و اتجوزت كمان ههههههههه

حنين كل ده بتبصله بغضب و غيره شديده جدا من كلامه عن همس

حنين : انا ماشيه

عمر :لسه بدري يا بنتي في ايه انتي حتي مشربتيش العصير

حنين : لا عشان متاخرش علي المحاضره سلام يا عمر

عمر : سلام

عمر * مالها البت دي قلبت كده ليه

و شاورلته سوزي من بعيد راحلها

سوزي دي صاحبته الانتيم في الكليه

في البيت روح خالد و هو تعبان جدا لقي همس نازله علي السلم عندها درس

همس : ازيك يا خالد

خالد : الحمد لله

همس : مالك شكلك تعبان؟

خالد : لا ابدا مفيش .. انتي عندك درس دلوقتي ؟

همس : ايوه ..

خالد : طيب خلي بالك من نفسك

همس و هي بتبصله بقلق : حاضر

طلع و سابها من غير ما ينطق كلمه زياده معاها

نزلت همس علي درسها و هي قلقانه جدا علي خالد اللي التعب باين جدا علي وشه

همس * ياتري فيك ايه يا ........

دخل علي اوضته اترمي علي سريره و راح في النوم من غير حتي ما يغير هدومه

دخلت عليه ندي بعد حوالي ساعه لقته نايم بهدومه و متغداش حاولت تصحيه

ندي : خالد ... خالد يا حبيبي اصحي

خالد و هو تقريبا صوته مش طالع من النوم و التعب: نعم يا ماما

ندي : قوم يا حبيبي اتغدي

خالد : مش قادر يا ماما انا تعبان سبيني انام شويه

ندي : تعبان مالك يا حبيبي ؟

خالد : ............... ......

حسست علي راسه لقته سخن جدا

نكمل الحلقه الجايه

الحلقه الرابعة عشر

اتخضت ندي علي خالد اللي حرارته كانت عاليه اوي و جريت تجيب تلج تعمله كمادات و اتصلت بسرعه علي مصطفي في مكتبه و بلغته بتعب خالد و كان بعد نص ساعه وصل البيت و معاه دكتور صديق العيله

مصطفي : طمني يا دكتور ماله خالد؟

الدكتور : مالوش لازمه القلق ده كله يا مصطفي دول شويه تعب بسيطه بس بسبب الارهاق و التعب

ندي : يعني مفيش حاجه تانيه يا دكتور ؟

الدكتور : لا بعد الشر مفيش اي حاجه هو بس محتاج شويه راحه مش اقل من يومين مع الدوا ده و يتعمله كمادات باستمرار لحد لما الحراره ترجع للمعدل الطبيعي و باذن الله هيبقي تمام

مصطفي : ان شاء الله

ندي : يارب

الدكتور : و الله ماله لازمه القلق ده خالص ايه يا جماعه انتوا اول مره عندكوا حد يتعب و لا ايه ده خالد يعني بسم الله ما شاء الله عليه بقي راجل و دكتور قد الدنيا

ندي : خالد ده الغالي حبيب الكل لو منقلقش عليه هنقلق علي مين

الدكتور :ربنا يخليهولكوا و يخليكوا ليه.. استاذن انا بقي و هاجي اطل عليه كمان يومين

مصطفي : ان شاء الله يا دكتور ... اتفضل

داخل عمر من باب الفيلا و الدكتور خارج

الدكتور : ازيك يا عمر

عمر : تمام يا دكتور الحمد لله

الدكتور : السلام عليكم

مصطفي و عمر : و عليكم السلام

عمر : في ايه يا بابا دكتور محمود كان بيعمل ايه هنا ؟

مصطفي : خالد اخوك تعبان شويه

عمر : ايه ؟؟؟ خالد ..!!!

جري علي اوضه خالد لقاه نايم و ندي بتعمله كمادات

عمر بلهفه : خالد

ندي : هوووش بس هتصحيه

عمر : هو في ايه يا ماما خالد ماله ؟

ندي : شويه تعب بسبب الارهاق انت عارف اخوك بيرهق نفسه اوي في المذاكره و السهر طول الليل

عمر : اه .. طب و الدكتور قال ايه ؟

ندي : قال هيبقي كويس بس نعمله كمادات و يستريح يومين

عمر : ده يستريح ده ... ده بيكرها الراحه عمي انا عارف طالع لمين

ندي : بطل رغي يا عمر اخوك نايم

عمر : حاضر بس انا عاوز اطمن عليه

ندي : لما يصحي ابقي تعالي اطمن عليه

عمر : طيب

رجعت همس من درسها دخلت الفيلا ملقتش حد خالص طلعت علي فوق في طريقها لاوضتها قابلت عمر خارج من اوضته

عمر : ازيك يا بت عامله ايه ؟

همس : احسن منك

عمر و هو حاطط ايده علي خدها : مش هتبطلي طوله لسان بقي ؟

همس و هي بتشيل ايده : لا اذا كان عاجبك

عمر و حط ايده علي خدها تاني : عاجبني يا مزه يا قمر

همس و شالت ايده تاني بنرفزه : مزه ؟؟!! دي كلمه تقولها لبنت خالك امال البنات التانيه بتقولها ايه

عمر : تعالي و انا اقولك في ودنك

همس : لا شكرا

و سابته و مشيت

عمر : طب مش تروحي تطمني علي خالودك؟

همس وقفت بسرعه و باهتمام شديد سالته

همس : خالد ؟؟؟؟ ماله خالد في ايه ؟

عمر : ده تعبان خالص و جابوله دكتور و دوا و حقن يالهوووووي بلاوي يابنتي

همس بقلق شديد: انت بتقول ايه خالد ؟

عمر : اقعدي بقي معلقه خالد خالد روحي اطمني عليه بدل الخوته اللي انتي عملهالي دي

جريت همس علي اوضه خالد بسرعه و بلهفه شديده جدا دخلت لقت عمتها معاه و لسه بتعمله في الكمادات

همس : ماله خالد يا عمتو ماله ؟

ندي : شويه سخونيه يا حبيبتي و ان شاء الله هيبقي كويس

همس : طب من ايه ايه اللي حصل ده كان امبارح كويس اوي

ندي : قدر الله و ماشاء فعل

همس : و نعم بالله

ندي : بقالي 3 ساعات بعمله كمادات و الحراره بتنزل بالذق

همس : امال الدكتور عمل ايه مدالوش حاجه تنزل الحراره ليه ؟

ندي : اداله لكن الكمادات اهم بكتير من اي دوا

همس : ربنا يستر

قعدت جنبها و بعد حوالي ربع ساعه

همس : قومي انتي استريحي يا عمتو شكلك تعبتي اوي انا هقعد مكانك

ندي : بس انتي يا حبيبتي عندك مذاكره

همس : لا انا معنديش حاجه مهمه النهارده اتفضلي انتي و متقلقيش

ندي : ماشي يا همس بس لو حصل حاجه تعالي ناديني بسرعه

همس : حاضر

خرجت ندي و قربت همس من خالد قعدت جنبه علي السرير و غصب عنها عنيها دمعت حستت علي شعره بعد ما حطت المنديل علي راسه فضلت ساكته تبصله و هو نايم

بعد كام ساعه

جت عمتها بدلت معاها و باليل جت هي تاني تبدل مع عمتها
بدات الحراره تنزل و تستقر و حست همس بالتعب فنامت غصب عنها علي الكرسي اللي هي قاعده عليه

صحي خالد اخيرا و هو حاسس بصداع في راسه من السخونيه و النوم الكتير بيبص جنبه لقي همس نايمه علي الكرسي قام بسرعه من مكانه و حاول يصحيها لكن

خالد : همــ

رجع في كلامه بعد ما حس انها اكيد نايمه كده من التعب و سابها فضل يبصلها اوي و هو مبسوط جدا بوجودها جنبه

خالد بصوت غير مسموع و هو بيبص لهمس اوي * ياتري بتحبي مين يا همس عمر ؟؟؟ و لا حد تاني ... لو تعرفي انتي ايه بالنسبه لي لو تعرفي بحبك قد ايه عمرك ما هتفكري في حد غيري .. صدقيني يا همس مهما قابلتي ناس هتحبك عمرك ما هتقابلي حد يوصل درجه حبه ليكي نص حبي ليكي و لا هيحافظ عليكي زي ما هحافظ عليكي ... انتي روحي لو بعدتي عني هموت... هموت يا همس

حط ايده علي شعرها و بصوت مسموع : بحبك يا حبيبتي

صحيت همس اول ما حط ايده علي شعرها و سمعت كلمه بحبك يا حبيبتي

همس بلخبطه و فرحه و دهشه : خالد ... خالد بجد اللي سمعته ده انت ... انت يعني بتحبني ... خالد حمد الله علي سلامتك انت بقيت كويس؟ ... انت بجد بتحبني و لا انا كنت بحلم و لا ايه رد عليا عشان خاطري ... طب انت كويس

خالد بابتسامه بعد ما قام من علي سريره وقف قدامها : طب اهدي بس و جمعي انا كويس الحمد لله

همس : طب هو انت بتحبني و لا انا كنت بحلم ؟

خالد : ...........

همس : رد عليا يا خالد عشان خاطري انا بحبك اوي و الله بحبك اوي انت بتحبني و لالا؟

خالد :بتحبيني ؟؟؟ انا ؟

همس : ايوه انت و عمري ما حبيت و لا هحب غيرك انت يا خالد

خالد : مش معقول يعني ... يعني كلام امبارح ده كان عليا

همس : و كنت جايه اعترفلك بيه و اقولك اني بحبك بس انت اللي خوفتني

خالد : مش ممكن انا ازاي مفكرتش في كده .... همس انا بحبك اوي بحبك من قبل حتي ما تتولدي انتي اجمل حاجه في دنيتي انا مش مصدق نفسي

همس بفرحه : انا كنت حاسه كنت حاسه انك بتحبني استنيتك كتير تعترفلي بحبك لكن اتاخرت عليا اوي يا حبيبي

خالد : انا اسف يا حبيبتي سامحيني مكنتش عاوز اعطلك عن مذاكرتك بتفكيرك فيا و في حبي كنت خايف اضيع عليكي حلم حياتك في انك تكوني دكتوره زيي

همس : انت حلم حياتي و اهم حد في دنيتي ميهمنيش هبقي ايه اللي يهمني اني هكون معاك

خالد بفرحه جامده اوي : يااااااااه اخيرا اخيرا هعيش مستقر و مش قلقان اخيرا حبيبتي هتبقي ليا... انا اول مااخلص السنه دي هخطبك من خالك هتصل بيه و اجيبه من السعوديه يجوزنا و لا اقولك هنخلي بابا ما هو زي باباكي برده احنا لسه هنستني خالك ايوه هنتجوز علي طول و هتفضلي معايا لاخر يوم في عمري

همس : انا النهارده اتولدت من جديد لان اخيرا كملت الدايره اللي كان ناقصها حلقه واحده بس و هي انك تبقي حبيبي بعد ما كنت ابويا و امي و اخويا و صاحبي دلوقتي اخيرا لقيت الحلقه الاخيره و هي انك تبقي حبيبي و انا حبيبتك .

قرب منها و اخدها في حضنه و باس راسها

خالد : انا هفضل طول عمري احبك و هبقي بالنسبه ليكي اكتر من باباكي و مامتك و اخوكي و صاحبك و اكتر من حبيبك يا حبيبتي

الحلقه الخامسة عشر

صعب اوي تقابل حبيب يخلصلك و يبقي علي حبك و انت حتي مش عارف انه بيحبك....
الاصعب لما تكون بتحبه قد حبه و مش قادر لسانك ينطق اقل كلمه تفرح قلبه.." كلمه بحبك"..

تاني يوم العصر

علي التليفون سيف بيسال علي خالد ردت عليه همس

سيف : ازيك يا همس

همس : تمام يا سيف الحمد لله انت عامل ايه ؟

سيف : الحمد لله خالد عندك ؟

همس : اها بس هو نايم دلوقتي يا سيف

سيف : هو تعبان مجاش الجامعه ليه ؟

همس: تعب امبارح اوي و عمو مصطفي جابله دكتور بعد ما جيه من الجامعه

سيف : ايه دكتور ؟؟!!! للدرجادي طب و هو عامل ايه دلوقتي؟

همس : لا دلوقتي احسن بكتير الحمد لله

سيف :الحمد لله . طب و الدكتور قال ايه؟

همس : شويه ارهاق بسبب المجهود و السهر و كان عنده سخونيه شديده اوي بس الحمد لله دلوقتي الحراره رجعت لمعدلها الطبيعي

سيف : الحمد لله يارب ... همس

همس : نعم يا سيف

سيف : خالد ....و سكت

همس : ماله خالد كمل يا سيف سكت ليه ؟

سيف : انا عاوز اقولك ان خالد...خالد بيحبك يا همس

همس : و انا بحبه اوي

سيف : انتي بتتكلمي بجد بتحبيه بتحبي خالد ابن عمي ده ؟؟

همس : ايوه بحبه اكتر من نفسي

سيف : حرام عليكي يا مفتريه تصدقي يا بت انتي عايزه قلمين

همس : ليه بس عشان بحبه زي ما بيحبني

سيف : عشان كان هيفطس بسببك

همس : بسببي انا !!! ازاي ؟

سيف : لما قلتيله انك بتحبي كان هيتجنن جيه الجامعه مش شايف قدامه كان خلاص هيعيط مني و هو بيحكيلي علي الحوار اللي دار ما بينكوا

همس : معقوله يعني التعب ده بسببي انا ؟

سيف : ايوه من كتر حبه فيكي مستحملش يسمع انك بتحبي حد غيره كان هيتجنن

همس : يا حبيبي يا خالد .. سلام دلوقتي يا سيف سلام

سيف : روحي قولي للواد انك بتحبيه ريحي قلبه

همس : قلبه ارتاح خلاص و هي سرحانه اوي سلام

و حطت السماعه و

جريت علي اوضه خالد عرفت ان مصطفي و ندي جوه استنت لما خرجوا و دخلتله

وقفت عند الباب و هي بصاله اوي من غير ما تنطق

خالد بابتسامه : وحشتيني

همس برده ساكته و مبحلقه فيه

خالد : مالك يا حبيبتي؟

همس : خالد انت جميل اوي انا .. انا بعشقك

خالد : و انا كمان بعشقك يا حبيبتي بس مالك بتبصيلي اوي كده ليه فيكي حاجه غريبه

همس : انا عرفت سبب تعبك ده ايه ؟

خالد : عرفتي ؟؟؟!!!

همس : للدرجادي بتحبني ؟

خالد : عرفتي ايه ؟

همس : عرفت انك اجمل و اعظم قلب.... عرفت اني لو لفيت الدنيا دي بحالها مش هلاقي حد يحبني قد حبك الجميل اوي ده انت اغلي من نور عنيا انا بحبك اوي يا خالد بحبك

خالد : انا كان عندي استعداد ادفع حياتي كلها تمن لنظره الحب اللي في عنيكي دي

همس : بعد الشر علي حياتك يا حياتي انا كلي ملكك هعيش بس عشان بحبك

خالد : تعالي يا همس اقعدي جنبي انتي بتوحشيني اوي

قربت و قعدت علي الكرسي اللي قصاد السرير

خالد : انا نفسي اغمض عيني و افتحها الاقيكي مراتي حبيبتي اللي هشلها جوه عنيا و احافظ عليها من اي حاجه ممكن تتعبها.. هعيشك ملكه عمري ما ههينك و لا اجرحك

همس : انا بقيت ملكه بيك من يوم ما لبست تاج حبك اللي بيخليني احس بقيمه نفسي و يحببني فيها اوي عشان انت بتحبها

خالد: ياااااااااه يا فرحه قلبي بيكي نفسي اشيلك و الف بيكي

همس : و انا نفسي اعيش في حضنك لاخر نفس فيا

خالد : عارفه يا همس لما قولتيلي كبرت و بحب كنت فرحان .. حسيت ان اخيرا البنت الصغيره اللي كنت بحبها كبرت و بقت عارفه الحب لكن لما فقت و سمعت كلامك للنهايه كنت عامل زي اللي بيتلف حوالين رقبته حبل مشنقه و بايده ممكن يفكه لكن ايده اتشلت عن الحركه مبقتش تقدر تدافع عن اللي يخصها

همس : كان نفسي ساعتها اصرخ بعلو صوتي و اقولك مليون بحبك لكن رد فعلك رعبني خفت اكون عايشه في وهم خفت تجرحني و انت اكدت الخوف ده جوايا

خالد : الكلام اللي قلتهولك كنت بحاول اطفي بيه ناري انا... خفت تعمليها و تروحي تقولي لحبيبك بحبك و تضيعي من ايدي

همس : لو كنت اعرف ان حبيبي بيحبني اوي كده كنت ريحت قلبه و طفيت ناره بحبي

خالد : انا بحمد ربنا الف مره انك جيتي للدنيا و كانك جيتي عشاني عشان احبك و تحبيني كل الحب ده

همس : لولا وجودك في دنيتي كان زماني تايهه و ضايعه.. انت اهم حد في حياتي عوضتني عن كل اللي فارقوني عشت يتيمه بس كان ليا ميه اب يخاف عليا و يحافظ عليا و مليون ام بتحبني و بتحسسني بطعم الحنيه انا من غيرك اموت

خالد : بعد الشر عليكي يا حبيبتي انتي القمر اللي بينورلي طريقي و من غيره اضيع في الدنيا

همس : بحبك

خالد : بحبك

باليل في اوضه خالد معاه سيف

سيف : قلقتني عليك يا واد

خالد : ربنا يخليك يا حبيبي

سيف : هو الحب يعمل كل ده ده علي كده الواحد يخاف يقرب منه بقي

خالد : لا الحب ده اجمل شئ في الوجود مفيش حد يقدر يعيش ابدا من غير حب

سيف : يا راجل انا اعرف ناس صحابنا الحب خلاهم يتعبوا و حرارتهم ترتفع و جابلهم دكتور

خالد : لولا التعب ده مكنتش الفرحه سكنت قلبي ... امبارح ده كان عيد انا عمري ما هنسي اليوم ده ابدا

سيف : يااااااااه كل ده

خالد : و اكتر بكتير انت متعرفش امبارح حصل ايه

سيف : عرفني

حكاله علي كل اللي حصل بينه و بين همس

سيف : يا ولاد الايه ايه الحب الجميل ده يخربيتكوا متحكوش لحد هتتحسدوا

خالد : انا بحبها اوي يا سيف همس بالنسبه لي مش مجرد حبيبه و بس دي روحي اللي لو خرجت مني اموت و الامل اللي انا عايش بيه و ليه ...هي احلي حاجه في دنيتي بحبها بحبها بحببببببها

سيف : ربنا يوفقكوا يا ابن عمي و الله فرحت اوي عشانكوا عقبالي بقي لما احب و اتحب زيكوا كده

خالد : مستحيل

سيف : مستحيل ايه احب ؟

خالد : لا دي ممكن.. المستحيل هو انك تحب زينا لان مفيش لحبنا زي

سيف : يا سلام يا سلام طيب يا سيدي ربنا يهنيكوا يارب

في الوقت ده خبطت همس كانت جايبه عصير لسيف

همس : انا عارفه انك بتحب المانجه قلت اجبهالك بنفسي

سيف : ميرسي يا قمر

خالد : وله

سيف : انا اسف .. ميرسي يا انسه همس

خالد : ايوه كده

همس : ههههههههههه بعد اذنكوا

سيف : رايحه فين تعالي اقعدي معانا

همس : اسيبكوا تكملوا قعدتكوا و كلامكوا مع بعض

سيف : احنا مبنتكلمش في اسرار و لا حاجه ده انتي بطله الحواركله تعالي تعالي بدل ما تشرقي و احنا نازلين نميمه عليكي

خالد : هههههههههه تعالي يا حبيبتي اقعدي معانا

همس : حاضر يا حبـــ

سيف : ياايه ؟

همس بكسوف : يا حبيبي

خالد : بس يا واد متكسفهاش بقي

سيف بدلع : حاضر يا حبيبي

خالد و همس : ههههههههههههههه

في الوقت ده اتفتح الباب بقوه مين اللي جيه هنعرف الحلقه الجايه

الحلقه السادسة عشر

اتفتح باب الاوضه بقوه

ندي و هي بتنهج : همس روحي علي اوضتك بسرعه

خالد : في ايه يا ماما بتنهجي كده ليه ؟

ندي : جدتك تحت و انت عارف .. يلا يا همس

همس : تيته ... بعد اذنكوا

و جريت علي اوضتها

خرجت ندي و نزلت بسرعه لمامتها ترحب بيها

سيف : هو في ايه ؟

خالد : ماانا حاكيلك قبل كده علي موقف تيته من همس

سيف : اها صح .. طب و بعدين

خالد : بعدين ايه ؟

سيف : جدتك دي مش سهله و لو عرفت اللي بينك و بين همس هتطربأها علي دماغكوا انتوا الاتنين

خالد سرح في كلامه و سكت و الحزن اترسم علي وشه

سيف : انا اسف يا خالد شكلي ضيعت فرحتك بكلامي

خالد : لا ابدا يا سيف انت عندك حق

سيف : ان شاء الله ربنا هيحلها من عنده

خالد : ان شاء الله ....بس هي برده مكنتش موافقه علي جواز خالوا رامي من طنط رنا ووافقت بعد شويه دلع و محايله من خالو

سيف : دي تختلف يا حبيبي اللي حكتهولي معناه انها شايفه همس نحس و شؤم زي مامتها

خالد بعصبيه : سيف

سيف : يا حبيبي ده مش رايي ده معني اللي حكتهولي ان كانت وافقت علي جواز خالك فده لانها مكنتش تعرف القدر مخبيلهم ايه لكن دلوقتي الوضع يختلف

خالد : محدش له انه يدخل في حياتي ايا كان انا مش عيل صغير

في الوقت ده دخلت جدته

ام رامي : مين يا حبيبي اللي يقدر يقول عليك عيل صغير و انا ارمهولك من الشباك

خالد : تيته

ام رامي : حبيب تيته مالك يا قلب تيته انا اول ما عرفت انك تعبان جيت جري فيك ايه يا حبيبي

خالد : ابدا يا تيته انا كويس الحمد لله كانوا شويه تعب و راحوا لحالهم ... تعبتي نفسك ليه بس مكنش له لزوم تيجي

ام رامي : ازاي بقي .. اعرف ان الغالي اول حفيد ليا تعبان و مجيش ده انا روحي فيك يا خالودي

خالد متفاجا : خالودي !!!

وسيف بيضحك ضحكه خبث

ام رامي : ازيك يا سيف ياابني عامل ايه ؟

سيف : الحمد لله يا طنط كويس ازي حضرتك؟

ام رامي : و الله ياابني ركبي تعباني اوي و الضغط و السكر مبهدلني علي الاخر ده غير الكبد عامل عمايله معايا

سيف بغيظ : لا الف سلامه عليكي يا طنط ده انتي لسه شباب علي ده كله

** يالهوي و لسه عايشه يخربيتك زي القطط بسبع ترواح

ام رامي : اها و النبي ياابني يلا اتخرجوا بقي عشان اكون اول زبونه عندكوا

سيف : ايه ؟؟؟ ... لا انا ههاجر اول مااشطب الجامعه قصدي اتخرج يعني ..ههاجر و مش راجع مصر تاني

خالد من تحت لتحت هيموت من الضحك علي كلام سيف

ام رامي : ربنا يوفقك يا حبيبي

سيف : ربنا يخليكي يا طنط انا ماشي بقي عاوز حاجه يا خالودي

قالها و هو بيرفعله حواجبه من بعيد

خالد بعصبيه : امشي يله

سيف : ههههههههههه ... سلام يا ..يا خالودي .. سلام يا طنط يا قمر ربنا يشفيكي يارب

سيف ** ربنا ياخدك و تريحي الناس من شرك يا بعيده حد يقول امين

ام رامي : سلام يا حبيب طنط

قعدت ام رامي مع خالد ما يقرب من الساعتين ترغي و تتكلم في تفاهات ملهاش لازمه و اخيرا قامت و قررت تمشي

ام رامي : طب يا حبيبي اسيبك بقي تستريح

خالد : مالسه بدري يا تيته

ام رامي : بدري من عمرك يا حبيبي هبقي اجيلك بكره اطمن عليك

خالد : ايه ؟؟ لا مالوش لازمه تتعبي نفسك يا تيته انا نازل بكره الجامعه بقيت كويس خلاص الحمد لله

ام رامي : لا ازاي جامعه ايه بس يا خالد ياابني استريحلك اسبوع و لا اتنين في البيت

خالد : اسبوع و لا اتنين يااااه ياريت .. مينفعش طبعا يا تيته انا في البكالريوس و طب مش اي كلام

ام رامي : طيب يا حبيبي ربنا يوفقك بس ابقي خلي بالك من نفسك و لو تعبت ترجع جري علي البيت

خالد : حاضر يا تيته ان شاء الله

ام رامي : هيه يلا سلام بقي

خالد : سلام

خرجت اخيرا من الاوضه

خالد** حرام عليكي يا تيته انا دماغي خلاص هتنفجر مالي انا بنبويه جارتك اللي جوزها اتجوز عليها و ابنها ضربه بالشبشب ما يتحرقوا كلهم في بعض .. استغفر الله العظيم ...
سكت شويه و رجع يكلم نفسه تاني

ياتري الكلام اللي قاله سيف ده ممكن يحصل .. ممكن تكوني انتي يا تيته العقبه اللي تقف في طريق سعادتي ... بس لا انا بحب همس و عمري ما هتخلي عنها ابدا .. مستحيل تكوني لغيري يا همس مستحيل

في طريقها للسلم علشان تنزل عليه واحده واحده كالعاده ساعتها همس خارجه من اوضتها عندها درس ماشيه فاتحه الكتاب بتذاكر من ساعه ما خرجت من الاوضه لحد لما قربت علي السلم

قابلتها ام رامي

اترعبت همس اول ماشافتها و كانها شافت عفريت قدامها

ام رامي بصتلها باصه كلها غل و نفخت و بصوت عالي

اللهم اطولك يا روح ياتري ايه اللي هيحصل في اليوم اللي اتنحس ده

همس بصتلها بحزن و عنيها بدات ترغرغ بالدموع و نزلت بسرعه جدا علي السلم في اخر سلمتين اتزحلقت

شايفها عمر اللي كان قاعد علي كرسي قصاد السلم بيتفرج علي التلفزيون جري ناحيتها عشان يسندها تقوم

من فوق

ام رامي : واد يا عمر

اتخض عمر و اتفاجا انه جدته شيفاه

عمر : نعم يا تيته

ام رامي : روح هاتلي كوبايه مايه

عمر : حاضر بس هــ هقوم همس

ام رامي : بقولك هاتلي مايه

عمر : حاضر

همس : روح انت يا عمر انا هقوم مفيش حاجه

عمر بصوت واطي : طب ابقي خلي بالك و انتي نازله

همس : حاضر

ام رامي بصوت عالي و كانت في اخر اربع سلمات :فين المايه يا زفت؟

عمر بنرفزه : حاضر حاضر

قامت همس و خرجت جري من باب الفيلا و الدموع ماليه عنيها

وقفت تاكسي و راحت علي درسها

شافها من بعيد مؤمن بعد ما وصلت المكان اللي فيه الدرس جري ناحيتها

مؤمن : ازيك يا همس

همس بحزن : الحمد لله

و سابته و مشيت .. جري وراها ووقف قدامها

مؤمن : مالك يا همس ؟

همس : مفيش

مؤمن مفيش ازاي شكلك معيطه

همس بعصبيه : قلتلك مفيش مفيش

و سابته و مشيت تاني وقف يبصلها و هو ماشيه

مؤمن زميل همس شاب طموح شاطر جدا ذكي اوي و لماح و شخصيته قويه و بيحب همس جدا وهي دايما مصدراله الوش الخشن طبعا مش بتحب خالودي يا ناس
هنشوفه كتير في الحلقات الجايه

في البيت باليل اتصل احمد بهمس

احمد : ازيك يا حبيبتي وحشتيني اوي

همس بصوت حزين : و انت كمان وحشتني اوي يا خالوا

احمد : مالك يا همس صوتك زعلان؟

همس و بدات تعيط : انا محتجالك اوي يا خالو

احمد : في ايه بس يا حبيبتي بتعيطي ليه اهدي عشان خاطري و فهميني مين اللي مزعلك عمتك و لا جوزها و لا حد من ولادها

همس : لا دول احن ناس عليا

احمد : امال مين ؟

همس : تيته

احمد : تاني تيته هي لسه مماتتش الست دي يخربيتها عملت ايه ؟

همس : كل مره بتشوفني فيها لازم تقول في وشي كلمتين يولعوا في قلبي النار ...النهارده شيفاني بدل ما تسلم عليا و تاخدني في حضنها قعدت تبرطم بكلمتين وجعوني اوي ... انا نحس يا خالو انا نحس

احمد : نحس في عينها .. انا عارف مش بتموت ليه

همس : ...........

احمد : متزعليش يا همس جدتك دي ست معندهاش عقل تفكر بيه اساسا و ربنا هيحسابها علي كل اللي بتعمله فيكي ده اشد حساب .. المهم انتي فكي بقي عشان عاوز اقولك خبر حلو

همس : خبر ايه ؟

احمد : انا نازل مصر الاسبوع الجي

همس : بجد يا خالو؟

احمد : بجد يا حبيبه خالو و اول ما هنزل هاجي عليكي علي طول و هاخدك تعيشي معايا علشان ترتاحي من وش جدتك دي للابد و مش تشوفيه تاني ابدا بعد مااشتري شقه جديده في اي مكان تختاريه يا ست الكل

همس : اعيش معاك

احمد : ايه مش عاوزه تعيشي مع خالو انا خلاص هستقر في مصر

همس : ها .. لا طبعا يا خالو ان شاء الله

بعد ما خلصت المكالمه مع احمد زادت النار في قلبها.. و انهارت اكتر في العياط بعد ما سمعت كلام خالها عن انها تعيش معاه فبعد ما فرحت جدا بقرار رجوعه لمصر اتقلبت الفرحه لحزن و هم فوق الهم

بعد نص ساعه من التفكير و الشرود و الزعل و العياط باب اوضتها خبط ...اول خبطه مش سمعتها لانها كانت سرحانه جدا و دموعها علي خدها
و التانيه سمعت و بسرعه مسحت دموعها و حاولت ترسم البسمه علي وشها

همس : ادخل

خالد : مجتيش تطمني عليا قلت اجي انا اطمن عليكي

همس برعشه بانت في صوتها : حبيبي انت ايه بس اللي قومك من السرير

شاف خالد في عنيها الدموع اللي نزلت علي خدها الرقيق اول ماشافته

خالد : انتي بتعيطي يا همس ؟

غصب عنها جريت بسرعه و اترمت في حضنه و انهارت اكتر في العياط

خالد : مالك يا حبيبتي في ايه ؟

همس : تعبانه تعبانه اوي يا خالد

خالد بقلق : تعبانه مالك يا قلبي تعالي

اخدها علي السرير و قعدها قصاده و هو ماسك ايدها بايد و بيمسح دموعها بالايد التانيه

خالد : اهدي بقي عشان خاطري و فهميني ايه اللي تاعبك؟

همس : انا ليه بيحصلي كده كل ما الدنيا تفرحني شويه تيجيي مليون حاجه تعكر فرحتي و تبدلها باحزان مش حزن واحد ليه يا خالد مش من حقي افرح و اعيش زي الناس .. انا تعبت تعبت اوي و الله تعبت

اخدها في حضنه و بدا يملس علي شعرها و هو هيتجنن مش فاهم اي حاجه لكن محاولش يضغط عليها و سابها تهدي براحتها

ارتاحت همس اوي في حضنه و بدات تهدي مع كل دقه قلب بتسمعها من قلبه و كل حركه ايد بتتحركها ايده علي شعرها

و بعد ما هديت خالص

خالد : مش هتقولي لحبيبك بقي ايه اللي تاعبك ؟

همس و شالت راسها من علي صدره و بصت في عنيه اوي و بدات تتكلم و عنيها بدات تدمع تاني

خالد : لا من غير عياط

همس : ...........

خالد : عشان خاطري و لا خاطر خالودي مش غالي عليكي

بصتله نظره ارتياح و بدات تحكي علي كل اللي في قلبها

خالد بزعل علي زعلها حاول يخفيه في نبره صوته : بصي يا همس بالنسبه لموضوع تيته مش هقولك متزعليش منها بس متزعليش نفسك بسببها تاني... فوتي متعرفيش تفوتي اعملي نفسك مش سامعه و بمنتهي الرقه قوليلها ازيك يا تيته مردتش عليكي خلاص انتي عملتي اللي عليكي و زياده حبتين ..ردت و ردها هيزعلك سبيها و كملي طريقك و اقعدي دندني باي اغنيه تكوني عايزه تهديها لخالودي حبيبك بس بصوت واطي طبعا هي متسمعوش... ودنك انتي اللي تكون سمعاه عشان تشوش علي كلامها

همس بتبصله و هي مبتسمه ابتسامه هاديه مختلطه بدموع رقيقه حزينه

خالدبنبره يأس : اما موضوع خالك ده بقي .. ربنا يسهل و نشوف هنعمل فيه ايه؟؟؟ و بدا يلتفتلها و هو مبتسم معانا اسبوع بحاله نقدر نفكر و نخطط و نتكتك خطه كويسه نظبطه فيه... المهم عندي دلوقتي متبقيش زعلانه و دموعك دي مش عاوز اشوفها ابدا انتي فاهمه؟

همس : هو اللي يسمع كلامك و يدفي في حضنك ممكن يشيل هم تاني للدنيا

خالد : طول ماانا جنبك متشليش هم لاي حاجه انا هفضل جنبك و مش هسمح لدموعك دي تنزل تاني و الا مش هبقي جدير بحبك و مش هسامح نفسي ابدا لاني هعتبرها قصرت فيكي و في حبك

همس : طول ماانت معايا انا هفضل طول عمري اسعد انسانه في الدنيا

خالد : ربنا يخليكي ليا و يخليني ليكي و اقدر اسعدك عمري كله يا حبيبه قلبي

همس : يارب يا حبيبي

مر الاسبوع و خلاص احمد راجع مصر

الحلقه السابعة عشر

قبل ما يوصل احمد مصر خالد كان بيفكر في حل لاكبر مشكله كان خايف من صغره انها تواجهه و ربنا هداه لعمل محاوله مع مامته

دخل عليها اوضتها و هو بيتكلم بجديه اوي

خالد : مساء الخير يا ماما

ندي : مساء الخير يا حبيب ماما خير شكلك كده بيقول ان في حاجه ؟

خالد : عرفتي ان عمو احمد خال همس جاي بكره

ندي : ايوه اتصل بيا و بلغني

خالد : طب و عرفتي كمان انه عاوز ياخدها تعيش معاه

ندي : ياخدها ؟؟!!! .. لا معرفتش مين اللي قالك الكلام ده؟

خالد : همس لما اتصل بيها اخر مره قالها انه هياخدها تعيش معاه علشان معامله تيته ليها

ندي : يا سلام .. يقوم ياخدها تعيش جنبها

خالد : لا ده هيشتري شقه جديده .. المهم ده مش موضوعنا حضرتك موافقه اساسا علي المبدأ؟

ندي : و الله ياابني همس بقت حته مني مقدرش استغني عنها ابدا بس..

خالد : بس ايه يا ماما .. ازاي هياخدها هو مهما كان راجل و هيفضل طول الوقت بره البيت سايبها لوحدها ده غير ان شغل البيت كله هيبقي عليها هي هتذاكر اللي في ثانويه عامه و عايزه تدخل طب دي و لا هتطبخ و تغسل ده غير كمان اننا اتعودنا علي وجودها في وسطنا و انا بذاكرلها كل حاجه هي مش فهمااها و كمان انه مسيره هيتجوز و مراته اكيد هترفض وجود همس

ندي : طب بس ياابني بالراحه شويه في ايه .. كل كلامك ده انا فهماه و مستوعباه كويس بس انا مقدرش امنعه عنها

خالد : انا مقلتش تمنعيه بس حضرتك من حقك ترفضي مبدا انه ياخدها... همس مش من حقه مش بعد السنين دي كلها يطلب انها تعيش معاه

ندي : عندك حق انا مقدرش استغني عن همس ابدا .. خلاص يا خالد وقت الكلام في الموضوع ده انا هتضرف

خالد: ..........

ندي بخبث: خلاص بقي يا عم روميو

خالد : روميو !!!

ندي : ههههههه روح علي اوضتك دلوقتي بعدين نتكلم

خالد بصلها باستغراب و خرج و سابها

دخل علي اوضته قعد علي مكتبه و حط راسه بين كفوفه

* ياتري تقصدي ايه بروميو يا ماما .. تكون عرفت حاجه ؟؟ لا هتعرف منين يعني محدش عارف غيري انا و همس و سيف ... جايز همس تكون قالتلها ... لالالا معتقدش ... يخربيتي اكيد انا اللي وقعت بلساني و انا بكلمها بالعصبيه دي ..... تصدق بقي انك فعلا وقعت بسبب عصبيتك بس مغلطتش.. امك لماحه و اكيد حست من كلامك و عصبيتك دي انك بتحبها .. ياربي كل الناس اللي عايش معاهم لماحين و لا انا اللي مفضوح و لا ايه .... يا سيدي و مزعل نفسك ليه بكره كلهم يعرفوا ... علي رايك

في يوم رجوع احمد لمصر العصر

وفي درس الفيزيا همس واقفه مع سما صاحبتها الانتيم و مؤمن واقف من بعيد منزلش عينه من علي همس

سما : الواد مؤمن مش منزل عينه من عليكي

همس : يتحرق انا هعمله ايه يعني

سما : ده شكله بيموت فيكي

همس : يوووه انا مش نقصاكي يا سما انتي كمان بلا مؤمن بلا زفت

سما : في ايه يا همس مالك بتكلميني كده ليه؟

همس : سوري يا سما انا اسفه مخنوقه شويه

سما : مخنوقه من ايه متخانقه مع خالد ؟

همس : لا طبعا خالد ده ملاك انا عمري ما زعلته و لا هزعله ابدا

سما : امال مخنوقه من ايه ؟

همس : خالو احمد جي النهارده

سما : اوووووووبس و هياخدك معاه؟

همس : معرفش انا قلقانه اوي خايفه يسيطر علي عمتي و يقنعها و ياخدني

سما: هو انتي كيس جوافه مالكيش راي في الليله دي ؟

همس : يابنتي هقوله لا ازاي ده خالي و بعدين هو عاوز يريحني من جدتي مش اكتر هيبقي هو نيته خير وانا ارفضه

سما : هي جدتك دي مقيمه عند عمتك دي كل فين و فين لما تيجي و كمان عمتك بتنبهك قبلها علشان تستخبي الساعتين اللي قعداهم مجتش علي ساعتين يعني

همس : مش عارفه بقي انا قلقانه اوي

سما : ربنا يستر يمكن خالد يقدر يعمل حاجه

همس : يااااارب

بعد ثواني من الصمت

سما : يادي النيله الواد ده مش هيبطل بقي هيفضحنا بتسبيله ده يخربيت كده

همس : انتي شاغله نفسك بيه ليه متبصلوش اصلا

سما : دي جي علينا

همس : اوف بقي

قرب مؤمن ناحيتهم بابتسامه عريضه

مؤمن : ازيك يا همس

همس : الحمد لله

مؤمن : عامله ايه ؟

همس : ما قلنا الحمد لله

مؤمن بزعل : ازيك يا سما ؟

سما : لسه فاكر.. كويسه

مؤمن: ممكن يا همس اتكلم معاكي شويه لوحدنا

همس : لا مش ممكن الدرس خلاص هيبدأ

مؤمن : لسه ربع ساعه نقدر نتكلم فيهم

همس : يا مؤمن قلت لا خلاص بقي

مؤمن : انتي ليه بتعامليني كده يا همس انا عمري ما غلطت في حقك

همس : هو المفروض اعاملك ازاي يعني اول ما اجي اجري عليك و اخدك بالحضن

مؤمن : انا مقلتش كده بس عامليني بطريقه احسن من كده

همس: مفيش بيني و بينك كلام يتقال علشان يبقي في طريقه الطف و احسن من كده .

سما : معلش يا مؤمن هي عصبيه شويه النهارده .. ممكن تتفضل دلوقتي؟

مؤمن : اوك يا سما انا مش زعلان منها ...سلام و خلوا بالكوا من نفسكوا

سما : سلام

همس : اوووووف ده خنيق موت و مبيفهمش

سما : بصراحه انتي كنتي رخمه معاه اوي

همس سكتت شويه و بعدين التفتلها : اوي اوي ؟

سما : اوي اوي

همس : مينفعش اتعامل معاه غير بكده يا سما انا بحب خالد و مقدرش اعمل حاجه من وراه و خصوصا لو كانت مع ولد حتي لو كانت مجرد صداقه معتقدش ان خالد هيقبل بيها

سما : عندك حق بس برده صعب عليا اوي

همس بابتسامه : هنحب و لا ايه ؟

سما بلخبطه : نحب مين ؟

همس : انت ادري يا جميل

سما : احبه ازاي يعني و بعدين ده بيحبك انتي باينه اوي مينفعش احب مؤمن خالص ده اخر حد ممكن افكر فيه

همس : و حد قال مؤمن ؟؟!!

سما : امال تقصدي مين ؟

همس : مؤمن

سما : امشي يا بت من هنا

همس : ههههههههههههه

بعد الدرس روحت همس البيت لقت خالها احمد قاعد مع عمتها و جوز عمتها

همس اول ما شافتهم جريت علي خالها و الدموع سايله علي خدها دموع الفرحه برجوعه و دموع الخوف من الرجوع ده

همس و هي في حضنه * ياتري انت فين يا خالد سايبني لوحدي ليه في الموقف ده حرام عليك

احمد : وحشتيني اوي يا حبيبتي بسم الله ماشاء الله كل سنه بتكبري عن اللي قبلها و تحلوي

همس : ميرسي يا خالو انت كمان وحشتني اوي

احمد : عامله ايه و اخبار مذاكرتك ايه ؟

ندي قاطعته : تمام و البركه في خالد بعد ربنا طبعا

احمد : خالد اشمعنه ؟

في الوقت ده ردت همس

همس : اصله بيذاكرلي كل اللي مبفهموش و بيشرحلي حاجات في الفيزيا يمكن احسن من مدرس المدرسه و الدرس كمان

احمد : بسم الله ماشاء الله هو اتخرج و لا لسه ؟

ندي : لا لسه السنه دي ان شاء الله هو هيتخرج من هنا و همس هتدخل وراه علي طول

احمد : ايه ده انتي عاوزه تدخلي طب يا همس؟

همس : طبعا يا خالو ان شاء الله ناويه علي طب

احمد : ربنا يوفقك يا حبيبتي

جيه خالد بعد العشا من بره جريت همس ناحيته من غير ما حد ياخد باله

همس : اتاخرت ليه يا حبيبي قلقتني عليك

خالد : معلش يا حبيبتي كان عندنا تدريب عملي في مستشفي الدمرداش هو اللي اخرنا ... خالد جيه ؟

همس بنبره حزن : اها و قاعد جوه

خالد : مفتحش الموضوع؟

همس : لا لسه مفتحوش

خالد : ان شاء الله خير متقلقيش انا كلمت ماما امبارح و هي وعدتني هتتصرف

همس : بجد ؟؟ و مقلتليش ليه ؟

خالد : مجتش فرصه كنتي نايمه و صحيت الصبح لقيتك مشيتي علي مدرستك

همس : طب هي هتتصرف تعمل ايه يعني ؟

خالد : هتتصرف و خلاص المهم ان ان شاء الله مش هتخرجي ابدا من باب الفيلا دي غير علي بيت جوزك يا حبيبه قلبي

همس : متكسفنيش بقي

خالد : اموت انا في الخدود الورديه دي لما بتحمر ... وحشتيني اوي علي فكره

همس : و انت كمان وحشتني اوووووي

خالد : يلا بينا ندخل بدل ما حد ياخد باله من وقفتنا دي

همس : يلا يا حبيبي

دخل خالد عليهم اوضه الصالون سلم علي احمد و قعد معاهم

احمد : عامل ايه يا خالد في كليتك ؟

خالد : الحمد لله تمام يا عمو ان شاء الله هبقي معيد فيها

احمد : بسم الله ماشاء الله ده انت شاطر اوي علي كده ؟

خالد : الحمد لله

خالد : ابسطي يا دكتورتنا ابن عمتك هيبقي معيد عليكي

همس : هو انا اطول

خالد : تطولي طبعا يا هموسه و نص كمان مع انك قزعه اوي

الكل في نفس واحد : ههههههههههه

احمد : بكره ان شاء الله هتفضي امته يا همسه ؟

همس بقلق : ليه يا خالو ؟

احمد : علشان ننزل ننقي شقه سوي نعيش فيها انا و انتي

مصطفي : تعيشوا فيها ؟؟!!!

احمد : ايوه بعد اذنك طبعا يا مصطفي هاخد همس تعيش معايا

ندي : بس يا احمد همس دي بقت حته مننا و انك تاخدها بين يوم و ليله كده دي حاجه صعبه اوي عليا انا بالتحديد

احمد : احنا ممكن ناخد شقه في المنطقه هنا و هتبقي قريبه وقت ما تحبوا تشفوها تشرفوا طبعا البيت هيبقي بيتكم

مصطفي : لكن يااحمد المفروض انك راجع تستقر في مصر يعني هتتجوز و تبني اسره و همس مينفعش تنضم لاسره لسه هتنبني

احمد : لا فكره الجواز دي مش في دماغي خالص

ندي : حتي لو مش في دماغك كده الامر هيتعقد اكتر مين هيخدمكوا و يشوف طلباتكوا معتقدش ان همس هتقدر تشيل مسئوليه بيت لوحدها و هي في ثانويه عامه و بعد كده داخله علي جامعه

احمد : احنا ممكن نجيب خدامه ؟

مصطفي : معقول يااحمد خدامه همس لسه صغيره و محتاجه لام مش لخدامه و اكيد مفيش احن من ندي عليها

احمد : يا جماعه انا مش فاهم بصراحه وجهه نظركوا في تمسكوا بهمس .. همس زي ما هي بنت اخوكي يا ندي فهي بنت اختي برده و انا اولي بيها خاصه بعد مااستقريت هنا و هي مش صغيره و لا حاجه دي عروسه اهي و زي القمر و لا ايه يا همس ؟

همس : اانا ااانا ... اللي تشوفه عمتو بعد اذنكوا

جريت همس علي اوضتها و الدموع علي خدها اللي مخدش باله منهم حد غير خالد

ندي : اظن مفيش رد بعد ردها ده يااحمد

احمد : خلاص يا ندي اللي تشوفوه في مصلحه همس اعملوه

مصطفي : دي حاجه متزعلش يااحمد همس بقت اكتر من بنتنا نعرف عنها كل حاجه وقت نومها وقت اكلها وقت دروسها .. و يوم ما بتحتاج حاجه مبنتاخرش عنها يعني مش مقصرين في حقها علشان تاخدها تعيش معاك .. كمان موضوع انك مش عاوز تتجوز ده مش داخل دماغي

قاطعهم خالد : بعد اذنكوا

احمد : اتفضل يا خالد

كمل مصطفي كلامه : ازاي يعني مش عاوز تتجوز انت مبقتش صغير لازم يكون عندك اسره وولاد يملو عليك حياتك و تشوف فيهم مستقبلك امال كل اللي بنيته ده هيروح لمين فكر تاني يااحمد في الموضوع ده مضيعش عمرك هدر

احمد سكت يفكر في كلامه شويه

احمد بعد نفس عميق: عندك حق

مصطفي : الحمد لله .. و متزعلش مننا في موضوع همس.. همس بنتنا و عمرنا ما قصرنا و لا هنقصر في حقها و يوم يا سيدي ما تيجي تشتكيلك ابقي تعالي خدها من ورانا

احمد : هي عمرها ما اشتكت منكوا الصراحه بس هي بتشتكي من ... و سكت و بص لندي

ندي : من ماما مش كده ؟

احمد : ايوه بتقول انها بتعاملها وحش اوي

ندي : انا عارفه و الله يااحمد و بحاول علي قد مااقدر اقلل الاحتكاك ما بينهم كمان و الله ماما مبقتش تقدر تمشي و تيجي كتير زي الاول اغلب الوقت انا اللي عندها و عموما ربنا يهديها

احمد : يارب

في اوضه همس

دخل عليها خالد لقاها بتعيط

خالد : تؤ تؤ كده يا همس مش انا قلتلك مش عاوز اشوف دموعك دي تاني ؟

همس بتبصله اوي و في عنيها الدموع من غير ما تنطق

خالد : صدقيني بابا هيحلها مدام ادخل و مقتنع يبقي هيقدر يقنع خالك انه يسيبك تعيشي هنا

همس : و خالو ؟

خالد : ماله خالو ؟

همس : هسيبه يعيش لوحده هو اكيد محتاجلي

خالد : بس انتي محتاجه لوجودك جنبنا اكتر محتاجه لام زي ماما و اب زي بابا و اخ زي عمر و حبيب زي خالد و لا ايه ؟

همس : محتجالكوا طبعا و مقدرش استغني عنكوا بس هو برده ...

خالد : هو مسيره هيتجوز و هيفتح بيت و ساعتها وجودك معاه مش هينفعك و لا هينفعه

همس : تفتكر هيفكر يتجوز

خالد : اكيد

همس : ياريت علي الاقل يبقي ضميري مستريح من ناحيته

خالد : لا يا حبيبه قلبي ريحي ضميرك بكره هتشوفي خالك اسعد واحد في الدنيا لما يلاقي الانسانه اللي بيدور عليها قلبه السنين دي كلها

همس : يارب يا خالد يارب

خالد : ان شاء الله يا حبيبه خالد فكيها بقي

و مد ايده يمسح الدمعتين اللي علي خدودها قامت همس شالتها من علي خده و باستها و هو ردلها البوسه علي ايديها الاتنين

في شقه احمد القديمه ( بيت والدته )

الباب بيخبط فتح لقاها ميرنا

و

نكمل الحلقه الجايه

اتمنة انكو ماتزعلوش منى عشان اتاخرت عليكو واديننى نزلتلكو خمس اجزاء مش اربعةولا تلاتة واتمنى انهم يعجبوكو
وميرسى كتيييييييييير على ردوتكم الجميلة دى

الكبير .. كبير .. والنص نص .. نص نص .. والصغير .. ما نعرفوش

يخووووووواتى

الحلقه الثامنة عشر

في شقه احمد القديمه ( بيت والدته )

الباب بيخبط فتح لقاها ميرنا

احمد و علامات التعجب مرسومه علي وشه : ميرنا !!!!

ميرنا : وحشتني

احمد : انتي عرفتي منين اني رجعت

ميرنا : طب مش تقولي اتفضلي الاول؟

احمد : تتفضلي فين انتي لسه معقلتيش لا طبعا الناس تقول عليكي ايه و انتي داخله شقه عازب استنيني تحت و انا هلبس و انزلك

ميرناو عنيها مليانه شوق : ماشي مستنياك متتاخرش عليا كفايه تاخير السنين دي كلها

احمد هز راسه بمعني حاضر

في الجامعه بتتمشي حنين و امنيه صاحبتهااللي اتعرفت عليها جديد مع بدايه السنه و هما في طريقهم عدوا علي كليه الحقوق

حنين اول ما قربت من الكليه سرحت معاها و فضلت تتلفت حواليها تدور علي عمر و نسيت خالص وجود امنيه جنبها

امنيه : بس عارفه حاسه ان ايام الثانوي كانت الذ يعني كنا بنخرج اكتر من كده و نلف البلد كلها مره درس في الشرق و مره درس في الغرب كنا عايشين بجد هنا حاسه بـــ

حنين سرحانه و تقريبا مش سمعاها
امنيه : بت ... حنين

حنين: نعم

امنيه : نعم الله عليكي يا ختي هو انا بكلم في نفسي

حنين : لا انا معاكي

امنيه : لا انتي مش معايا خالص في ايه مين اللي في حقوق شاغلك كده؟

حنين : ها .. شاغلني ازاي يعني

امنيه : يا بت عليا انا ده انتي شكلك واقعه لشوشتك

حنين : اممممم يعني

امنيه : يا بنت الايه و ماشيه معايا من اول السنه و محكتيش قري يا بت و اعترفي بسرعه مين هو و اسمه ايه و سنه قد ايه و عرفتيه ازاي و و و

حنين : ايه ايه انتي بالعه راديو لوك لوك اديني فرصه اتكلم

امنيه : طيب يا ستي لوكي

حنين برقه و شبهه توهان : اسمه عمر

امنيه : يا سيدي علي عمر و بعدين ؟

حنين : ابن عمي زي القمر في كليه حقوق بقاله فيها حوالي سبع سنين

امنيه : ههههههههه فاشل يعني

حنين : اتلمي و احترمي نفسك

امنيه : اتلمينا كملي

حنين : بحبه اوي من و انا في اولي ثانوي

امنيه : و هو بيحبك من امته ؟

حنين بحزن : بيحبني ؟؟؟ ياريت

امنيه : ياريت ايه هو مش بيحبك؟

حنين : مش عارفه بس بحس انه و لا علي باله و لا حاسس بيا بيعاملني علي اني اخته و بس ببقي هتجنن لما بشوفه نفسي اترمي في حضنه و اقوله حس بيا انا بحبك بس بيمنعني كسوفي و حيائي

امنيه : الفلسفه هتطلع علينا اهه حياء و كسوف ايه انا لو مكانك هقوله و اللي يحصل يحصل علشان يحس بيا امال هيفضل حمار و اعمي كده لحد امته؟

حنين : امنيه احترمي نفسك انا اساسا غلطانه اني حكتلك

امنيه : انتي زعلتي و لا ايه يابت انا بواعيكي متبقيش خايبه كده لحد لما تيجي واحده تخطفه منك

حنين : يعني اعمل ايه يعني اروح اقوله بحبك وبموت فيك حبني

امنيه : لا بس ولعي فيه النار فلفلي قلبه و حسسيه انك مرغوبه

حنين : مش فاهمه ازاي يعني

امنيه : و لا عمرك هتفهمي علشان غبيه يا بت انتي حلوه وزي القمر صاحبيلك ولدين تلاته و امشي معاهم قدامه هتلاقي النار ولعت فيه و جري عليكي زي الجردل و قالك بحبك و بعشقك كمان

حنين : ايه اللي انتي بتقوليه دي انتي اكيد مجنونه انا عمري مااعمل كده انتي عيزاه بدل ما يحبني اسقط من نظره و يروح يقول لسيف اخويا و لا مش بعيد سيف بنفسه هو اللي يشوفني و ابقي خسرت كل حاجه لا طبعا

امنيه : انتي حره انا نصحتك و اعملي اللي انتي عيزاه في الاول و في الاخر دي حاجه تخصك

حنين : ايوه طبعا تخصني و عمري ما هعمل اللي بتقولي عليه ده ابدا

امنيه : طيب متزقيش

في الوقت ده ظهر عمر في وسط شله ولاد علي بنات واقف بيهزر معاهم بصوت عالي رن في ودن حنين

حنين : عمر

امنيه : هو فين ؟

حنين : استني

بدات تدور بعنيها لحد لما لمحته

حنين : اهه واقف هناك

امنيه : فين يا بنتي؟

حنين : في الوسط الشله اللي واقفين ورانا دول

امنيه : اها اي واحد فيهم ؟

حنين : اللي لابس تيشرت اسود

امنيه : يا ابن الايه ده جامد طحن و زي القمر

حنين : طبعا مش حبيبي

امنيه :

** يخربيت جمال اهلك انت ازاي عايش كده ده انت تتخطف خطف عندها حق البت تحبك و تموت فيك كمان ... ده انت موز اخر حاجه

امنيه : ما تناديله

حنين : اناديله ينفع ؟

امنيه : يوه ايه يا بنتي مش ابن عمك ؟

حنين : طب استني

بصوت هادي حنين زيها نادت عليه

عمر : حنون عندنا يا مرحبا يا مرحبا

حنين : ازيك يا عمر

عمر : الحمد لله يا قمر ازيك انتي ؟

حنين : الحمد لله تمام انا كنت بتمشي في الجامعه انا و صحبتي لمحتك قلت اسلم عليك

عمر : اها

و بص لامنيه

* يا بنت الايه يا جامده ايه الحلاوه و الشياكه دي ده انتي مزه اصلي

عمر : طب مش تعرفينا علي صحبتك ؟

امنيه بكل جرأه و كبرياء : امنيه

عمر : اجمل امنيه ... ااا ااه اقصد منوره حقوق يا امنيه تعالوا اعزمكوا علي حاجه

حنين بغيظ من نظراته لامنيه : لا ميرسي يا عمر ورانا محاضره

امنيه : ما تيجي يا بنتي انا ريقي ناشف و بعدين ده دكتور مسطول مبنفهمش منه حاجه اساسا

حنين : لا بس لازم نحضرها دي ماده مهمه و عليها درجات كتير

عمر : يا بنتي عيشي بقي هي الجامعه كلها محاضرات و قرف

حنين : امال داخلينها ليه ان شاء الله؟؟!!

عمر : اهه شويه محاضرات و شويه فرفشه و نعنشه

امنيه ضحكت ضحكه عاليه جدا

عمر : فله عليكي يا قمر شكلك مالكيش في جو المحاضرات زي حلاتي

امنيه : لا انا ليا في الفرفشه و النعنشه اكتر

عمر : اهه انتي كده تبقي اصلي بجد

امنيه كررت نفس الضحكه و حنين واقفه بتغلي من جوه

حنين : يلا بقي يا امنيه لو سمحتي كده هنتاخر

امنيه : ما تشوف يا عم بنت عمك الخنيقه دي

حنين : انا خنيقه ؟

عمر : بصراحه اها

و ضحك و ضحكت امنيه و مد عمر ايده يسلم بكفه علي كف امنيه علي سبيل الهزار

حنين : طب انا ماشيه عايزه تيجي اهلا و سهلا مش عايزه براحتك

و مشيت و هي خلاص عنيها هتدمع من الموقف

امنيه : استني يا بت انا جايه

ادورت ناحيه عمر و قالت

امنيه : فعلا خنيقه

عمر : هشوفك تاني اكيد

امنيه : شور

عمر : امته و فين ؟

امنيه : بكره هجيلك بعد المحاضرات تكون واقفلي هنا الساعه 2 اوك يا باشا

عمر : اوك يا معلم

امنيه : ههههههههههه

عمر : اموت انا في العسل

ـــــــــــــــ ـــــــــــ

في الكافيه قعدت ميرنا قصاد احمد مش و الشوق و الحب ماليين عنيها

ميرنا : وحشتني اوي يا احمد ؟

احمد بلخبطه : مقلتليش عرفتي ازاي اني رجعت ؟

ميرنا : كل اول شهر كنت بروح مكتبك القديم و اسال زمايلك عنك لحد لما بلغوني الشهر ده انك رجعت و مش هتسافر تاني

احمد : و ليه كنتي بتعملي كده ؟

ميرنا : ياااااااااه لسه بتسال ليه بعمل كده علشان بحبك و وعدتك اني هستناك و مش هكون لحد غيرك

احمد : ماانتي كنتي لغيري

ميرنا : تاني يا احمد بعد السنين دي كلها مش قادر تغفرلي الغلطه الوحيده اللي غلطتها في حقك بتعاقبني و بتعاقب نفسك عليها اكتر من 13 سنه ليه .. ليه كل ده يااحمد ده انا بحبك و انت بتحبني

احمد : اتكلمي عن نفسك ... انا قلبي ملكي لوحدي مش ملك حد تاني ثم ان غلطتك متتغفرش بالسهوله دي... دي غلطه ضيعت مني و منك كل حاجه

ميرنا : مكنتش اعرف ان قلبك بالقساوه دي

احمد : انا اللي قلبي قاسي و لا قلبك انتي هو اللي خاين و غدار ميعرفش يعني ايه اخلاص و حب

ميرنا : حرام عليك انت ليه بتعمل فيا كده 13 سنه مستنياك قلبي مكنش بيفكر غير فيك.. عمري كله ضاع عشانك ..عشان بحبك ..قلت الغربه و الوحده هتحنن قلبك عليا هترجعلي احمد بتاع زمان لكن للاسف لسه زي ماانت ...حرام عليك يا احمد حرام عليك انا بحبك ارحمني بقي

و انهارت في العياط

احمد : قومي يا ميرنا علشان اوصلك

ميرنا قامت جري اول ما سمعت كلمته سابته و مشيت

احمد فضل قاعد لوحده حوالي نص ساعه يفكر في كلامها

جريت حنين علي كليتها و امنيه بتحاول تلحقها

امنيه : استني يا مجنونه بطلي شغل العيال ده

و اخيرا وصلتلها و مسكتها من دراعها

امنيه : ايه يا مجنونه انتي فرجتي علينا الجامعه ايه اللي حصل لده كله؟

حنين : مش عارفه ايه اللي حصل ؟

امنيه : لا مش عارفه

حنين : واقفه عماله ترغي و تهزري معاه و مش عامله اي اعتبار لمشاعري

امنيه: هو ده اللي زعلك ؟

حنين : و ده شويه ؟

امنيه : و الله انتي عبيطه انا بحاول اقربه منك

حنين : و الله .. تقومي تهزري انتي و تضحكي معاه

امنيه : ماانتي واقفه زي الهبله منطقتيش كلمتين علي بعض

حنين : هو انتوا ادتوني فرصه انطق؟

امنيه : اديكي قلتيها هو لما لقاني بضحك و بهزر بقي يعاملني بطريقه حلوه و لطيفه لكن لو كنت وقف زي الهبله زيك كده مكنش عبرني

حنين : و الله ؟

امنيه : خلاص فكك بقي اصلا ابن عمك ده خنيق و دمه يلطش انا كنت بضحك علي كلامه مجامله ليكي مش اكتر

حنين : احترمي نفسك لو سمحتي ياامنيه

امنيه : يا شيخه روحي انا ماشيه مش هحضر المحاضره

حنين : ليه ان شاء الله ؟

امنيه : اهه مزاجي كده

حنين : براحتك انا هحضرها

امنيه : طيب سلام

حنين : سلام

امنيه مقدرتش تستني معادها مع عمر و قررت تروحله دلوقتي

اما حنين فدخلت علي المدرج قابلت صاحبتها ايمان

ايمان بنت عسوله جدا و رقيقه و محترمه اوي هيكون ليها دور مهم الحلقات الجايه

ايمان : ايه اللي اخرك كده ؟

حنين : كنت مع امنيه

ايمان : تاني امنيه يا حنين البنت دي شكلها مش كويسه و هتضيعك معاها

حنين : انا برده بدات احس بكده

ايمان : ابعدي عنها انتي مش زيها

حنين : ربنا يسهل ياايمان

ايمان : ربنا يحفظك يا حنين يارب

رجعت امنيه علي حقوق في المكان اللي قابلوا فيه عمر لكن للاسف مش لقته

* مش هسيبك يا قمر هرجعلك تاني و مسيرك هتبقي بتاعي ها ال حنين ال

بعد العصر خرجت همس من درسها و قررت تروح لخالها احمد تزوره علشان ميحسش ان قربها من عمتها و اولادها و جوزها بعدها عنه

احمد بيفتح الباب لقاها هي

احمد : همس مش معقول؟

همس : مفاجاه مش كده ؟

احمد : اجمل مفاجاه يا حبيبتي تعالي ادخلي

همس دخلت البيت و قعدت تلف فيه

همس : ياااااه البيت ده بيوحشني اوي بحس ان فيه روحي

احمد : البيت ده كان فيه اجمل ذكريات الله يرحم ناسه

همس بحزن : الله يرحمهم .. قولي يا خالو ماما و بابا كانوا بيحبوا بعض من و هما قد ايه ؟

احمد : من و هما صغيرين اوي باباكي اياما كان عنده حوالي 14 سنه و مامتك 11

همس : صغيرين اوي

احمد : اه بس كانوا مخلصين اوي في حبهم

همس : و انتوا كنتوا تعرفوا بالحب ده حضرتك و تيته يعني ؟

احمد : انا كنت حاسس بس متاكدتش الا لما جيه رامي يخطب رنا ... و سرح شويه . كانت ايام

همس : و تيته ؟

احمد : تيته مامتي؟

همس : لا تيته ام بابا

احمد : مالها ؟

همس : كانت بتحب ماما ؟

احمد بحزن : و لا عمرها طاقتها ...كنت بسمع رامي يقول انها كانت عايزه تجوزه لبنت اختها علشان كده مكنتش بتحت مامتك.... الله يرحمها

همس : ده عداء وراثي بقي ليا و لماما من قبلي؟

احمد : يعني تقدري تقولي حاجه زي كده

همس : ربنا يهديها

في الوقت ده رن موبايل همس

بصت في النمره لقتها نمره خالد اتلخبطت

احمد : مش هتردي ؟

همس بلخبطه : ها .. اها ده خالد تلاقي عمتو طلبت منه يتصل يطمن عليا اصلي مقلتش لحد اني جيالك

احمد : طب ردي عليه طمنيه

همس : حاضر

همس : أ ألو

خالد : انتي فين ياحبيبتي قلقتيني عليكي

همس : انا عند خالو احمد

خالد : مقلتيش يعني انك رايحه هناك؟

همس : اصلي خرجت من الدرس لقيت نفسي قريبه من البيت فجيت و هو كان واحشني اوي بصراحه

واقف جنبها احمد رمالها بوسه علي الهوا مع ابتسامه فرحه

خالد : طب انا هعدي عليكي اخدك

همس : لا متتعبش نفسك هاجي لوحدي

خالد : بس يا بت ازاي البرنسيسه همس تمشي لوحدها باليل دي حتي تبقي عيبه في حق خالودك

همس : ها اها طيب ماشي هستناك يا خالد ابقي تعالي كمان ساعتين كده

خالد : وحشتيني

همس : ماشي

خالد : و الله وحشتيني

همس : فهمت و المصحف خلاص بقي

خالد : ههههههههههه عسل و انتي مزنوقه كده .. و برخامه انا بحبك اوي يا همس و بموت فيكي انتي حياتي و دنيتي و كل حاجه ليا

همس : خلالالالالالالا ص فهمت هتعدي عليا بعد ساعتين و ممشيش لوحدي سلام بقي يا رخــ يا خالد سلام

خالد : ههههههههههههههه عسل و بموت فيكي

همس : طيب سلام

خالد : سلام يا روح خالد و قلبه و عنيه و كبدته و كليته و كل ما يملك من اعضاء بشريه

همس مقدرتش تمسك نفسها من الضحك و قفلت في وشه

همس و هي بتضحك اوي : هههههههههه خالد

احمد بيبصلها جامد و ساكت

همس : ايه يا خالو بتبصلي كده ليه ؟

احمد : .............

و نكمل الحلقه الجايه

الحلقه التاسعة عشر

احمد بيبصلها جامد و ساكت

همس : ايه يا خالو بتبصلي كده ليه ؟

احمد : .............

همس : ياااااااه ده اعجاب بقي

احمد : قلبي حاسس ان تجربه امك هتكرر فيكي

همس : هموت يعني و انا بولد بنتي و اسيبها يتيمه تعاني من الدنيا

احمد : لا الف بعد الشر عليكي انا مقصدتش كده

همس : امال حضرتك تقصد ايه ؟

احمد و هو مدقق النظر ليها : انتي بتحبي خالد يا همس ؟

همس بلخبطه : ها خالد .. حضرتك ليه بتقول كده ؟

احمد : كل كلامك عنه الفتره اللي فاتت كان بيقول كده

همس : كلام .. كلام ايه ؟

احمد : لما كنت مسافر و كنتي تقعدي تحكيلي عن معاملته معاكي كنت بفرح بكلامك و لفرحتك و بقلق احسن يكون حب و لما رجعت مصر و شفتك قريت في عنيكي حب و هو كمان في عنيه نفس الحب ده ليكي... مش كده يا همس؟

همس بكسوف : طب و ايه اللي يخلي حضرتك تقلق لو ده حصل ؟

احمد : جاوبيني الاول احساسي صح و لا غلط ؟

همس و هي وشها في الارض و في قمه خجلها : بصراحه ايوه صح

احمد اخد نفس عميق و قعد علي الكرسي مدد ضهره لوره و افتكر كل الزمن اللي فات بعدها اتخيل المستقبل اللي جي

همس ساكته قلبها بينبض بشده سكوت احمد كان عاملها شلل مؤقت في كل اطارفها مقدرتش تنطق و لا تتحرك من مكانها

و بعد صمت دام حوالي خمس دقايق بدات تتمالك اعصابها و تتكلم

همس : خـ خـ خالو؟

احمد رفع راسه ليها من غير كلام

همس : حضرتك سكت ليه ؟

قام من مكانه و اتجه ناحيه الشباك اللي بيطل علي بيت ام رامي و هو برده ساكت

همس بقلق : خالو بليز رد عليا

احمد : انا معنديش اي اعتراض علي حبك لخالد يا همس انا واثق انه هيكون اكتر واحد جدير بيكي و هيحافظ عليكي اكتر مني انا شخصيا بس .. بس انا افتكرت امك و العذاب اللي كانت بتشوفه من جدتك بكلام يجرح مشاعرها و تصرفات توجع اي قلب رقيق زي قلب امك الله يرحمها .. رامي كان بيحاول يخفف عنها لكن عمره ما قدر يشيل حزنها و زعلها من اللي كانت بتعمله و بتقوله مامته

و بدأ يبصلها بانتباه و يكمل

كانت بتخاف علي زعله اوي لدرجه انها كانت بتكتم كل عمايل امه معاها جواها و في يوم كانت جايه عندنا زياره لوحدها ماما مكنتش في البيت و انا و هي قعدنا لوحدنا حسيت ان في حاجه مزعلاها و لما سالتها لقيت سيل دموع نازل علي خدها دموع هم و حزن و زعل علي نفسها و بدات تحكيلي علي عمايل جدتك معاها قلبي كان بيتقطع و انا شايف اختي في الحاله دي حاولت اخفف عنها بشويه كلام لا قدم و لا اخر ... خايف يتكرر معاكي نفس اللي حصل مع امك

همس و الدموع في عنيها : بس يا خالو عمتو ندي بتحبني عمرها ما هتعمل معايا كده

احمد : مش عمتك اللي هتعمل.. جدتك هي اللي هتعمل بلاوي موقفها منك يختلف تماما عن موقفها من امك . انتي صحيح حفيدتها لكن انتي عارفه انها ...

همس : و هي هتعيش كام سنه يعني ؟

احمد بضحكه سخريه : تصوري انا قلت الكلام ده لامك من 17 سنه و امك ماتت و ابوكي و امي و هي لسه عايشه الله اعلم هتعيش قد ايه و هتعمل ايه في اللي جاي .. طبعا اللهم لا اعتراض بس انا خايف عليكي

همس و بدات تعيط اوي : بس انا يا خالو بحب خالد .. بحبه اوي مقدرش استغني عنه ابدا و هو كمان بيحبني مينفعش اسيبه او ابعد عنه انا روحي فيه هو اللي عوضني عن كل حاجه و كل حد اتحرمت منه مقدرش و خالو مقدرش ...

و اترمت علي كنبه

الصالون اللي قدامها و انهارت في العياط

احمد جري عليها و اخدها في حضنه و حاول يهديها

احمد : اهدي يا حبيبتي عشان خاطري .. انا مش بقولك سبيه او ابعدي عنه بس انا خايف عليكي

همس و هي لسه بتعيط : طب اعمل ايه علشان افضل جنبه و اعمل ايه علشان اطمنك ؟

احمد علشان يهرب من اجابه سؤالها و يهديها : الموضوع ده لسه بدري اوي عليه انتي لسه صغيره و خالد لسه قدامه مشوار طويل بس خلوا الموضوع ده سر اوعوا حد من جوه البيت يحس بيه ماشي يا همس؟

همس و هي بتمسح دموعها : مفيش حد يعرف غير سيف ابن عمه

احمد : طيب تمام كده الموضوع يفضل سر بينا احنا الاربعه تعاملكوا مع بعض يكون عادي جدا علشان محدش ياخد باله ... جدتك لو عرفت يا همس حبكوا هينقلب لجحيم انتي عارفه هي بتحب خالد ازاي يمكن نفس حبها لرامي الله يرحمه و كمان عارفه هي بتكـ .. بتكرهك ازاي اضعاف كرهها لامك

همس : ربنا يستر

احمد : ان شاء الله يا حبيبتي ربنا هيوفقكوا و بابتسامه : و يمكن تحصل المعجزه و نصحي الصبح نلاقيها ودعت و اتحطت في تعداد الاموات

همس بابتسامه : تفتكر ممكن يحصل

احمد : هههههههه يارب

ـــــــــــــــ ــــــــ

بعد ساعتين عدي عليها خالد طلعلها فوق و هو بيحاول يستخبي علشان جدته مش تشوفه
سلم علي احمد و اخد همس و نزل

احمد مفتحش الموضوع خالص مع خالد و لا حتي لمحله انه عرف لحد لما يرتب قاعده ما بينهم هما الاتنين لوحدهم

نزل خالد و همس ركبوا العربيه و همس سا كته منطقتش .. هو كان واخد باله من شرودها علشان كده مخدهاش علي البيت

ووقف قدام مطعم كبير

خالد : يلا يا حبيبتي انزلي

همس : انزل فين ؟

خالد : انزلي بس

همس : احنا فين هنا يا خالد و هننزل ليه؟

خالد : عاوز اعزم حبيبتي علي العشا ممكن ؟

همس : .............

خالد : انا مباخدش رايك علي فكره ده امر اتفضلي انزلي

همس ساكته و بصاله اوي

خالد : يلا يا بت انزلي

نزلت معاه دخلوا و بعد ما طلب العشا بدأ يتكلم

خالد : ممكن اعرف بقي مالك ؟

همس : خالو احمد عرف كل حاجه

خالد : كل حاجه ايه يعني ؟

همس : اللي بينا

خالد باستغراب : عرف ازاي ؟

همس : بعد ما كلمتني في التليفون لقيته بيقولي حاسس ان تجربه امك هتتكرر تاني فيكي

خالد :غريبه محستش في كلامه بحاجه ...طب و بعدين ؟

بدات همس تحكي كل اللي حصل و كل الحوار اللي دار ما بينهم لخالد

............... ............

خالد : اها بس مش لسه بدري و لا حاجه زي ما قال انا اول مااتخرج هطلب ايدك منه

همس بصتله باستغراب اوي

خالد : ايوه مالك مستغربه كده ليه اول مااتخرج ان شاء الله هخطبك منه و هيكون معايا بابا و ماما كمان

همس : و تيته ؟

خالد : انتي شيفاني راجل و لا عيل صغير ؟

همس : طبعا راجل و احسن راجل في الدنيا كمان

خالد : يعني بتثقي فيا و في حبي ليكي؟

همس : ايه الاسئله دي طبعا يا خالد بثق فيك و في حبك

خالد : يبقي مالكيش دعوه بكل الحاجات اللي شاغله دماغك بيها دي انا هقدر احميكي حتي من الحزن و ابعدك عنه و مستحيل هسمح لاي حد انه يزعلك حتي لو اضطردني الامر اني اخدك و نسيب البلد باللي فيها

همس بفرحه : بجد يا خالد ؟

خالد : طبعا بجد . يا همس انتي كل حاجه و اهم حد في دنيتي مستحيل هستغني عنك و لا هسمح لاي حد انه يهينك او يزعلك

همس : بس انت كده بتتكلم في بعد الجواز مسالتش نفسك هيكون قبل الجواز فيه ايه ؟

خالد : سالت نفسي طبعا .. بس ايه اللي ممكن تيته تعمله يعني ؟

همس : ممكن تقوم عمتي علينا

خالد : حتي لو حصل بابا هيبقي في صفنا

همس : بس عمتي مش هتقبل بالوضع بسبب ضغط تيته عليها

خالد : حبيبتي .. انا فكرت كتير في كل الحوارات دي و لقيت ان افضل حل اسيبها لوقتها مش يمكن تتحل من عند ربنا

همس : تيته تموت يعني ؟

خالد : هههههههههه و الله انتي عسل ..

همس : رايق اوي و بتضحك

خالد : بحبك اوي و بموت فيكي ووعد مني ربنا يقدرني و انفذه عمري اللي جي كله اني هحافظ عليكي و عمري ما هستغني عنك ابدا حتي لو السكينه علي رقبتي

همس : ربنا يخليك ليا يارب يا حبيبي

خالد : اخيرااااا افتقدتها اوي الكلمه دي النهارده

همس : ايه ؟

خالد : حبيبي يا حياتي يا قلبي و دنيتي

همس : طبعا حبيبي و كل حاجه ليا انا بعشقك يا خالد

خالد : يا خرابي علي بعشقك لما بتطلع من احلي قلب عن طريق احلي شفايف متجهين ناحيه قلب بيعشقهم اضعاف العشق ده.. ايوووه بتبقي حلوه اوووووي

همس : هههههههه انتي احلي مليون مره يا نور عيني

خالد : ربنا يخليكي يا قلبي .. انا هبقي اروح لخالك و هتكلم معاه في كل اللي قلقه و اطمنه علي بنت اخته و اقوله انها في عنيا و قلبي و روحي

همس : ربنا يطمن قلبك و يخليه ليا

تاني يوم في الجامعه امنيه راحت لعمر بس متاخره شويه عن ميعادهاعايزه تعمل تقيله علشان تحسسه انها مش زي البنات اللي يعرفهم

لقته واقف في انتظارها لكن مش لوحده معاه بنت من صحابه

راحت ناحيتهم و بدات توجهه كلامها لعمر مع بعض نظرات القرف للبنت اللي واقفه معاه

امنيه : ازيك يا عمر

عمر : اهلا ازيك انتي يا موني ايه اللي اخرك كده و اتجه ناحيه البنت :..اخلعي انتي بقي يا قمر ابقي اشوفك بعدين

البنت : ماشي يا دنجوان سلاموووز

عمر : سلاموووز باللوز يا قشطه

بدأوا يتشموا في الجامعه

امنيه : انت كل اصحاب بنات ؟

عمر : لا مين قال كده انا عندي اصحاب من كل نوع

امنيه : اها ..و انا بقي انضميت لفرقه اصحابك البنات؟

عمر : امال عايزه تنضمي لفرقه الولاد ؟

امنيه : خفيف اوي

عمر : هههههههه ماانا عارف ... مالك داخله فيا شمال كده ليه انتي جايه تصاحبيني و لا تحبيني و تحاسبيني

امنيه: احبك .. ها .. احبك ده ايه ان شاء الله انت فاكر نفسك دنجوان بجد؟

عمر : طبعا دنجوان يا بنتي انا نص بنات الجامعه قديم و جديد يعرفوني و بيموتوا فيا

امنيه باستنكار : يا سلا م

عمر و هو بيرفع النضاره الشمس لفوق : طبعا

امنيه : مغرور

عمر :ههههههههههه و الله شكلك جايه تحبيني

امنيه : ياابني انت بتتكلم كده علي اي اساس

عمر : علي اساس اني واد جامد و اموت في المزز اللي زيك و قرب منها

امنيه بعددته بايدها : لالالا انا مش من منهم خالص

عمر : امال انتي من مين ؟

امنيه : بكره تعرف انا مين

عمر : ده انتي داهيه

امنيه : و انت دواهي مش داهيه واحده

عمر : هههههههههههههه طب بعد اذنك بقي يا قمر عندي ميعاد تاني

امنيه : و الله ؟

عمر : اعمل ايه وقتك خلص انتي اللي جيتي متاخر

امنيه : اوك باي

و لسه هتمشي

عمر : علي طول كده مفيش اديني رقمك هنتقابل تاني امته و الاشتغالات اياها دي ؟

امنيه : هو انت كنت طلبت ؟

عمر : مش بقول داهيه اديني رقمك

ملته الرقم و بدات تتحرك و هي ماشيه قالت

امنيه : موبايلات بقي

عمر : ماشي يا .... مزه

* ده انتي بت مش سهله ابدا فاكره نفسك هتوقعيني في حبال حبك التلفان املها.. ده بعينك.. ما عاشت و لا كانت اللي تخلي قلب عمر يتحرك و يتذل بحبها... انا هربيكي

يلا بقا قوقولى اية رايكم فى الحلقتين دول
وميرسى عطعوط وميرسى باسنت

ميرسى ليكى يا همس الحلقة دى جامدة اووووووووى وفعلا دا اللى بيحصل فى الحياة

الحلقه العشرون

اصبحت علاقه امنيه بعمر علاقه صداقه قويه لكنها صداقه غريبه كل واحد شايف التاني ملكه مش من حق اي حد تاني غيره

امنيه كانت بتحاول بكل الطرق تبعد عمر عن نزواته مع البنات التانين و نفسها يقرب منها و يحبها علشان بس تحس انها فازت بقلب دنجوان الجامعه

اما عمر فمكنش في دماغه كل اللي هي بتفكر فيه لكنه اوقات كان بيغير عليها و كان ممكن يوصل لدرجه انه يضربها لو عملت حاجه تستفزه

علاقتهم مش مفهومه بس نقدر نسميها حب امتلاك

حنين في غفله عن كل اللي بيحصل كل اللي عملته انها بعدتت عن امنيه و عن صحوبيتها و مشيها و مبقتش تعرف عنها اي حاجه لانها مبقتش تحضر اي محاضرات
و اتوجدت بينها و بين ايمان صحوبيه كبيره جدا

انتهت السنه الدراسيه و كل واحد عرف مصيره

اما عن بطلتنا همس فكانت من اوائل محافظه الاسكندريه و حققت اول حلم ليها و هو دخولها لكليه الطب

البطل المتيم خالد اتخرج بدرجه جيد جدا مع مرتبه الشرف و اتعين معيد في الكليه

و اخيرا عمر اتخرج من الحقوق و باباه فتحله مكتب محاماه لكن طبعا فاشل محدش بيدخله غير صحابه الفاشلين تقريبا مقلوب كازينوا بيسهروا فيه للصبح ولاد مع بنات

سيف اتخرج لكن متعينش معيد زي خالد و اشتغل في مستشفي خاص

سما صاحبه همس ملحقتش طب مع همس و دخلت علوم

اما مؤمن فللاسف مع همس في الكليه ( كليه الطب )

حنين و ايمان نجحوا و دلوقتي في السنه الدراسيه التانيه

و امنيه واضح انها هتكرر تجربه عمر

من غير ما تسالوا لسه عايشه و زي القرده شكلها هتعمر للنهايه عارفين طبعا بتكلم عن مين

في كليه الطب

بعد اول محاضره لخالد مع همس جريت عليه بعد ما كل المدرج خرج

همس : انا مش مصدقه نفسي حبيب قلبي و نور عيني معيد عليا

خالد بابتسامه : ايه رايك في شرحي؟

همس : انت لسه هتسالني ماانت عارف رايي فيه من زمان .. احسن من اي مدرس فيكي يا اسكندريه

خالد : مدرس ايه يا بت انا معيد و بعد كام سنه هاخد الدكتوراه و ابقي دكتور رسمي

همس : انت بالدكتوراه من غير دكتوراه احسن دكتور في اسكندريه .. عارف انا كنت هعمل خناقه دلوقتي و العيال خارجين بعد ما نهيت المحاضره

خالد : ليه يا شلق؟

همس : سمعت بت بتقول انك زي القمر كنت هاكلها بسناني

خالد : لا هتسمعي من ده كتير

همس : يبقي المشرحه هتتملي قتلي باذن الله

خالد : ههههههههههه للدرجادي بتغيري عليا؟

همس : طبعا بغير عليك انا مش عايزه حد يشوفك و لا يلمسك و يحبك غيري و هي بتضغط علي سنانها و لا اسمع كلمه قمر دي من اي زفته هنا

خالد : هههههههههه انا ميهمنيش اسمعها من اي بنت غير من هموسه روح قلبي و نور عيني

همس برومانسيه وصوت هادي : ااه بحبك اوي

خالد : و انا بموت فيكي يا حبيبه قلبي.. يلا بقي روحي علي محاضرتك زمان الدكتور دخل

همس : حاضر بس خلي بالك من نفسك و اوعي اوعي تسمح لاي بنت تقول عليك قمر ماشي

خالد : بس كده اي بنت هسمعها تقول عليا قمر هبعتهالك تتصرفي معاها

همس : ايوووووه بالظبط كده اصل انا متشوقه اوي ادخل جثث المشرحه علي ايدي

خالد : ههههههههه يلا يا مفتريه علي محاضرتك

همس : ماشي سلام

و هي ماشيه بصوت واطي (وشوشه ) : بحبك

خالد بنفس الطريقه : و انا كمان بحبك

جريت علي المحاضره لقت الدكتور دخل اعتذرتله علي التاخير و دخلت ملقتش اي مكان غير جنب

مؤمن

من بعيد شاورلها علشان تقعد جنبه اضطرت تروح بعد ما الدكتور امرها بكده

قعدت جنبه و هي في قمه خجلها

مؤمن بصوت واطي : حجزتلك لما لقيتك اتاخرتي

همس : ميرسي مكنش له لزوم

مؤمن : لا طبعا و لو مكنتش فكرت في كده و جيتي ملقتيش مكان كنت سبتلك مكاني

همس : ميرسي يا مؤمن علي زوقك

مؤمن : انتي ايه اللي اخرك كده ؟

همس بنرفزه حاولت تخبيها : الدكتور كده هيطردنا

مؤمن : انا اسف

سكتوا و حاولت همس تنتبه للمحاضره لكنها سرحت اكتر من مره في اولها

* انت شكلك مش هتجيبها البر معايا .. كل مااروح في حته تطلعي زي عفريت العلبه ربنا يستر من اللي جي خالد لو خد باله من تصرفاتك دي هيبهدلني و ممكن يقتلك فيها .. اعمل ايه بس احكيله .. لالا انا اخاف .. تخافي من ايه هو حصل حاجه ده عمل فيكي خدمه هو حد طايل يلاقي حد يحجزله .. يعني هو حجزلي كده لوجه الله ما هو علشان الــ.. ال ايه ربنا يهديكي ركزي احسن في المحاضره

بعد المحاضره خرجت همس بسرعه قبل ما يوقفها مؤمن و يفتح معاها اي كلام .. كانت سما وعدتها هتعدي عليها في الوقت ده ويروحوا سوي نزلت تحت لقتها مستنياها عند الكافتيريا و طبعا مؤمن كان ماشي وراها

همس : حبيبه قلبي ازيك

سما : الحمد لله يا قمري ازيك انتي

و حضنوا بعض

همس : الحمد لله حاسه بغربه من غيرك يا بت عمرنا ما افترقنا

سما و علي وشك انها تعبط : انا اللي مش عارفه اروح و لا اجي من غيرك بجد مفتقداكي اوي يا همس

همس : خلاص يا بت انتي هتعيطي و لا ايه

سما : لا يا حبيبتي انا كويسه

همس : طب تعالي اعزمك علي حاجه قبل ما نمشي

سما : هو خالد مش هيروح معاكي ؟

همس : لا قدامه للساعه 7

سما : طب الحمد لله انا عايزه انفرد بيكي وحشتيني اوي

همس : و انتي وحشتيني اوي يا حبيبه قلبي

دخلوا الكافتيريا و فجأه و هما بيرغوا لقوا مؤمن واقف قدامهم

مؤمن : مساء الخير

سما : مساء النور

همس * اوف و بعدين بقي في اليوم

مؤمن : ازيك يا سما منوره طب

سما و هي بتبصله اوي : ميرسي يا مؤمن منوره بيكوا

مؤمن : ممكن اعزم نفسي علي كانز معاكوا؟

همس : لا احنا شربنا الكانز بتاعنا و كنا قايمين حالا سوري يا مؤمن خليها مره تانيه

مؤمن : ده انتي بخيله اوي علي كده دي علبه كانز ب3 جنيه

همس بنرفزه : قولتلك ماشيين

سما : خلاص يا همس.. سوري يا مؤمن احنا فعلا كنا ماشيين خليها مره تانيه

همس : انا هستناكي بره يا سما

سما : اوك يا همس

خرجت همس بسرعه و هي متنرفزه اوي بره الكافتيريا و سما جت تلحقها وقفها مؤمن

مؤمن : سما ممكن ثواني

سما : ممكن يا مؤمن اتفضل

مؤمن : انا كنت عايزك توصلي لهمس رساله هي مش مدياني اي فرصه اوصلهلها

سما بلخبطه :اتفضل

مؤمن : قوليلها مؤمن بيحبك اوي و عمره ما حب و لا هيحب واحده غيرك اطلبي منها تديني اي فرصه اعبرلها عن مشاعري ناحيتها و خليها تدي نفسها فرصه تفكر فيا و لو دقيقه واحده ارجوكي يا سما انا بحبها اوي بجد

سما و الدموع بدات تملي عنيها : و ملقتش غيري تطلب منه طلب زي ده؟

مؤمن : انتي اقرب واحده ليها .. هي بتحبك و اكيد هتسمع منك

سما بعد نفس عميق : بس هي .. هي و سكتت

سما * اقوله انها مرتبطه و بتحب خالد يمكن ينساها و يفكر فيا شويه .. لالا همس امنتني علي سرها و مستحيل هقوله لاي حد ايا كانت الاسباب .. بس ده ممكن يكون في مصلحتك يا سما ... حتي لو علي حياتي مستحيل

مؤمن : سكتي ليه يا سما هي ايه ؟

سما : مفيش يا مؤمن خلاص هبلغها كلامك

مؤمن : بجد

سما : ايوه بجد

مؤمن : طب استني منك الرد امته؟

سما : اعتقد ان رد فعلها هيبان في تعاملها معاك بعد مااقولها مش محتاجه اني ابلغك

مؤمن : عندك حق هتقوليلها امته ؟

سما : هحاول افتح الموضوع معاها دلوقتي

مؤمن : لا يا سما علشان خاطري قولي انك اكيد هتفتحيه دلوقتي

سما بحزن : حاضر هقولها دلوقتي

مؤمن بفرحه : متشكر اوي يا سما

سما بياس : الشكر لله بعد اذنك

مؤمن : اتفضلي

خرجت سما لهمس لقتها مولعه نار

همس : انتوا كنتوا بترغوا في ايه ده كله و رمياني هنا لوحدي

سما بتبصلها و مش قادره تتكلم خايفه تتكلم دموعها اللي حبستها في عنيها تفضحها و تنزل علي خدها

همس : مالك يا سما في ايه ؟

سما : يلا بينا يا همس

همس : مش قبل مااعرف في ايه ؟

اترمت في حضنها و قعدت تعيط جامد اوي

همس : سما .. مالك يا حبيبتي ايه اللي حصل

اخدتها و قعدوا في اقرب مكان

حاولت تهديها و بعد ما بدات تهدي شويه

همس : الزفت ده قالك ايه عمل فيكي كده ؟

سما : قالي انه .. انه

همس : انه ايه ؟

سما : انه بيحبك

همس كانت عارفه كده لانه كان باين اوي عليه لكن لاول مره يتاكد ليها حب سما ليه

همس : و مش قلتيله ليه اني مرتبطه يمكن ..

سما : مقدرتش ده سر امنتيني عليه و مكنش ينفع اقوله لاي حد

همس : بس في حالتك دي كان لازم تقولي و انا مكنتش هزعل

سما بلخبطه : حاله ايه ؟

همس : خلاص يا سما اهدي دلوقتي و انا هتصرف معاه

سما و هي بتمسح دموعها اوي : تتصرفي معاه ازاي يعني همس انتي فهمتي ايه ؟

همس : فهمت اللي فهمته بقي دلوقتي امسحي دموعك و اهدي كده و الامور كلها هتتصلح ان شاء الله

سما : امور ايه انا مش فاهمه حاجه ؟

همس : بعدين هبقي افهمك يلا بقي

سما و هي بتحاول تستوعب كلامها : يلا

باليل في المكتب عند عمر جت امنيه فتحت بالمفتاح اللي ادهولها عمر و دخلت لقت كل حاجه متشقلب حالها زباله علي الارض و التراب في كل حته و عمر نايم علي الكرسي

امنيه : عمر

عمر : اممممم

امنيه : عمر

عمر : ايييييه ؟

امنيه : اصحي

عمر و مفتح نص عين : امنيه انتي جيتي ازاي؟

امنيه : هو ايه اللي جيت ازاي جيت من الباب

عمر : طيب و غمض عينه نام تاني

امنيه : عمممممممممر

عمر : ايييييييه يخربيتك صرعتيني في ايه ؟

امنيه : اصحي ياابني انت نايم ازاي في الزريبه دي؟

عمر و بدأ يقوم اخيرا من مكانه : اهي نومه و السلام .. انما انتي ايه اللي جابك؟

امنيه : مش انتي اللي قلتلي اجيلك هنا النهارده ؟

عمر : اها صح .. طب تعالي اقعدي جنبي هنا

امنيه : اقعد جنبك فين انت اتهبلت

عمر : تعالي بس

و شدها

و نكمل الحلقه الجايه

الحلقه العشرين

عمر : تعالي بس

و شدها

امنيه و هي بتبعد عنه : انت شكلك اتهبلت بجد

عمر : امال انتي جايه ليه ؟

امنيه : هو انت طلبت اجيلك هنا علشان كده ؟

عمر : عيشيلي بقي دور الهبله اللي اتخدعت فيا

امنيه : انت شكلك لسه نايم و عاوز حاجه تفوقك

مسكت ازازه ميه كانت علي المكتبه و دلقتها علي راسه

عمر : بتعملي ايه يا مجنونه ؟

امنيه : بفوقك علشان تفتكر مين هي امنيه

عمر بعصبيه : هتكوني مين يعني امنيه واحده زي اي واحده انتي فاكره نفسك مين يا ماما انتي و لا تسوي في سوق البنات تمن ازازه الميه اللي كبتيها عليا دي

امنيه : بقي هو ده رايك فيا يا عمر اوك بعد اذنك

عمر : في داهيه

خرجت امنيه و هي شايطه من عمر و كلامه و اللي كان في نيته ليها لكن كانت متاكده من جواها انه مسيره هيرجع و يعتذرلها

اما عمر فمكنش فارق معاه حاجه كل اللي بيفكر فيه الميه اللي دلقتها عليه

............... .....

في البيت خالد استغل فرصه رجوع مصطفي من السفر علشان يفاتحه في موضوع خطوبته لهمس

راح علي المكتب اللي في الفيلا و خبط و سمحله مصطفي بالدخول

خالد : مساء الخير يا بابا

مصطفي : مساء الخير يا حبيبي تعالي

دخل و قعد قدامه علي المكتب

كان مصطفي مشغول في قرايه شويه ورق قدامه

خالد : بابا ممكن اخد من وقتك نص ساعه

مصطفي : طبعا يا حبيبي ممكن بس ثواني هخلص اللي في ايدي

خالد : لو مشغول ارجع لحضرتك وقت تاني

مصطفي : لا انا خلصت خلاص و قفل الورق اللي قدامه و انتبهله . ها خير يا خالد ؟

خالد : كنت عاوز اخد راي حضرتك في موضوع يخص مستقبلي

مصطفي : موضوع ايه ؟

خالد بلخبطه و خجل : كنت عاوز ا ااه اخطب

مصطفي بفرحه : بجد مبروك يا حبيبي و دي مين بقي اللي خلت قلب دكتورنا يدق و يترسم علي وشه الفرحه اللي شايفها دي ؟

خالد بخجل زياده من كلام والده : همس

مصطفي و علامات الاستغراب علي وشه : همس !!!!

خالد : ايوه همس بصراحه يا بابا انا و همس بنحب بعض اوي و انا وعدتها اني هخطبها من حضرتك اول ما اتخرج و استنيت حضرتك لما ترجع من السفر علشان اتكلم معاك

مصطفي : انا معنديش اعتراض يا حبيبي علي كلامك ده بس ...

خالد بقلق : تيته مش كده؟

مصطفي : تيته مش هتتحكم فينا و في اختياراتنا بس انا خايف علي امك منها

خالد : ازاي يعني؟

مصطفي : جدتك طبعها صعب و مامتك طيبه مبتقدرش تقولها لا .. احنا لما جبنا همس تعيش معانا متعرفش مامتك كانت قلقانه ازاي لولا اني اصريت مكنتش همس دخلت بيتنا و عاشت في وسطنا

خالد : بس يا بابا اللي يهمني راي حضرتك و راي ماما طبعا و معتقدش انها هيبقي عندها اعتراض علي همس

مصطفي : مش هيبقي عندها اعتراض علي همس لكن هتخاف تقول لجدتك حاجه زي دي .. علي الرغم من عمايل جدتك و طبعها الا ان امك بتبحها جدا و بتخاف جدا علي زعلها و خصوصا انها ست مريضه و طبعا ده من حقها

خالد : طب و احنا ذنبنا ايه في ده كله ؟

مصطفي : ملكمش ذنب طبعا يا حبيبي و انا مقدرش اقولك لا و في نفس الوقت مقدرش اقول اه علي الاقل دلوقتي .. بس ممكن ناجل التفكير في الموضوع ده لحد لما افاتح والدتك و اخليها تفتح الموضوع مع جدتك بالراحه و ربنا يسهل الامور

خالد بحزن : اللي تشوفه حضرتك يا بابا بس انا اسف لو تيته موافقتش انا هتجوز همس و ساعتها مش هيهمني زعلها مينفعش ادمر مستقبلي و مستقبل همس علشان خاطر جدتي و خصوصا ان موقفها مش مقبول من اي حد

مصطفي بخيبه امل : مقدرش الومك ساعتها يا خالد بس علشان خاطري اجل الموضوع ده شويه و انا اوعدك انا هبذل كل جهدي علشان احققلك اللي بتتمناه

خالد : ان شاء الله يا بابا

تاني يوم في الجامعه

مؤمن ملهوف جدا يسمع رد همس طول الوقت من اول ما بدء اليوم و هو بيحاول يقري تعابير وشها لكن مش قادر يحكم و بعد نهايه المحاضره الاولي راحت همس ناحيته

همس : ازيك يا مؤمن

مؤمن بفرحه : تمام اوي ازيك انتي يا همس

همس : انا الحمد لله .. سما قالتلي علي الموضوع اللي كلمتها فيه امبارح

مؤمن : و انتي رايك ايه يا همس ؟

همس بتنهيده : بص يا مؤمن انا بعتبرك اخ عزيز عليا و عمري ما فكرت انك تكون بالنسبه لي اكتر من كده خاصه و اني .. اني مرتبطه بحد تاني

مؤمن الدموع ملت عنيه و مبقاش عارف يرد عليها و لا ينطق و لا نص كلمه

همس : انا عارفه ان كلامي هيزعلك بس هي دي الحقيقه انا اسفه يا مؤمن

مؤمن و هو بيحاول يتلم علي اعصابه و ينتصر علي ضعفه قدامها : اسفه علي ايه يا همس دي حياتك و انتي حره فيها بس ممكن اعرف مين هو ؟

همس : و لو اني شايفه انها مش هتفرق معاك كتير لكن انا هقولك هو يبقي ابن عمتي .. سكتت شويه و بعدين كملت انا و هو بنحب بعض اوي عمرنا ماافترقنا .. من صغري مبشوفش غيره و لا كنت عايزه اشوف او اعرف او احب حد غيره و هو يبقي... دكتور خالد مصطفي معيد علينا السنه دي

مؤمن بصدمه : دكتور خالد ؟!!!

همس : ايوه هو

مؤمن بصوت حزين مكسور : ربنا يوفقكوا يا همس ..

همس : مؤمن قبل ماامشي عايزه اقولك علي حاجه مهمه اوي .. بص حواليك في ناس بتحبك اوي يمكن قد ما بتحبني و اكتر محتاجين لقلب يحتويهم زي قلبك

مؤمن : ناس مين ؟

همس : لو دورت في الناس اللي تعرفهم هتلاقي و صدقني هيعوضوك عني و عن حبي بحب جميل اوي في قلبهم...

و من بعيد شافت خالد بيبص عليها و عنيه كلها غضب

همس : بعد اذنك يا مؤمن لازم امشي حالا

مؤمن مردش عليها و مهتمش باخر كلام قالته لكن حاول يداري دموعه و روح من غير ما يكمل محاضراته

جريت همس علي خالد اللي اول ماشافها جايه ناحيته مشي بسرعه ناحيه مكتبه سرعت همس بخطواتها لحد لما وصلتله ووقفت قدامه

همس : خالد استني

خالد بيبصلها و عنيه مليانه عتاب من غير ما يتكلم

همس : بلاش نظره العتاب اللي بتوجعني دي افهم الموضوع الاول

خالد بعصبيه : ممكن اعرف مين ده يا هانم و بمناسبه ايه تقفي معاه في وسط الكليه كده؟

همس : ده مؤمن زميلي

خالد : و من امته بنقف مع زمايلنا في وسط الجامعه كده عادي ؟

همس : طب اسمع الحكايه الاول و بعد كده اتعصب و ازعل

خالد : و هو الموضوع في حكايه كمان دي حاجه كويسه اوي

همس : حبيبي متحكمش عليا قبل ما تفهم

خالد : طب فهميني يا همس هانم

همس : و احنا واقفين كده ؟

خالد : اتفضلي معايا نقعد في مكتبي

راحوا علي المكتب و الحمد لله مكنش فيه اي حد غيرهم

خالد : اتفضلي اتكلمي

همس : مؤمن ده زميلي و .. و بي ... بيحبني

خالد بنظره دهشه : نعم مسمعتش قولتي ايه حضرتك؟

همس : بيحبني من و احنا في ثانوي و لسه امبارح موصلي انه بيحبني مع سما صاحبتي و كان لازم اقف معاه علشان احط حد للموضوع

خالد : انتي بتستهبلي ازاي تعملي كده و ليه انتي اللي تحطي حد للزفت الموضوع امال انا لزمتي ايه في حياتك كيس جوافه ؟

همس فكرت تحكيله علي سبب وقوفها معاه و هو انها تحاول توصله حب سما ليه بطريقه متصغرش صاحبتها لكن لقت انها كده هتصغرها اكتر في نظر خالد لو حكتله علي الحقيقه و فضلت تسمع عتاب خالد و تستحمل زعله علي انها تصغر صاحبتها في عيون اي حد حتي لو كان حبيبها خالد

همس : انا كنت بقوله اني مرتبطه و حكتله علي اللي بينا

خالد : و مش خدتيه ليه الكافتيريا تتغدوا سوي و لا كنتوا خرجتوا احسن في اي مطعم شيك و عزمتيه علشان تحكوا في هدوء بدل دوشه الجامعه و اللي رايح و اللي جي

همس و هي وشها في الارض و الدموع في عنيها : خالد لو سمحت كفايه كده

خالد : كفايه ايه يا همس انا مش مصدق اللي بتقوليه ده ازاي تعملي كده ازاي انتي معملتيش اي احترام ليا و لا لاني حبيبك و لا حتي لاني ابن عمتك .. حتي لو مكنتيش حبيبتي و مفروض انك بتحترميني مفروض مشفش بنت خالي في موقف زي ده ابدا و كمان مش زميل عادي لا ده بيحبك و انت رايحه تحكيله قصه حياتك المطلوب مني اعمل ايه افرح بيكي

همس : طب و كنت هعمل ايه ؟

خالد : تيجي تقوليلي يا هانم من وقت ما صاحبتك بلغتك و انا هتصرف لكن مترحيش تتصرفي من دماغك

همس : انا اسفه

خالد بعد نفس عميق سكت لثواني و بعدين قال : اتفضلي يا همس علي محاضرتك

همس و بدات تعيط جامد : خالد سامحني انا اسفه

خالد مش قادر يشوف دموعها و باي طريقه كان عاوزها تمشي من قدامه : امشي يا همس لو سمحتي

همس : يا خالد علشان خاطري

خالد : يوووووووه همشي انا

خرج من المكتب و سابها منهاره في العياط مش عارفه تعمل ايه تعترفله بالسبب الحقيقي و لا تستحمل زعله منها

اما خالد فدموعه غصب عنه غلبته مقدرش يشوفها بتعيط قدامه و خصوصا انه وعدها دموعها متنزلش و متزعلش ابدا طول ما هي معاه و المره دي الدموع بسببه و عشانه...

دخل علي اول حمام قابله علشان محدش ياخد باله منه

خالد * يااااه يا همس اخر حاجه كنت اتوقعها انك تحطيني في موقف زي ده

كان صعب عليه اوي موقفها صعب يحس انها مش عملاله اي اعتبار و حتي مااخدتش رايه في موضوع اكيد يخصه زي ما بيخصها

خرجت همس من المكتب مش عارفه رايحه فين و لا هتعمل ايه و لقت رجليها وخداها علي كليه علوم اتصلت بسما نزلتلها
مسحت دموعها و حاولت تتماسك علشان سما متحسش بحاجه

سما : منوره كليتي يا حبيبتي

همس ساكته

سما : مالك يا همس في ايه ؟

همس : مفيش يا سما اتخنقت شويه قلت اجيلك

سما : نورتيني يا حبيبتي تعالي نقعد

قعدوا و كملوا كلامهم

سما : في ايه بقي ايه اللي خنقك؟

همس : عادي مفيش حاجه معينه خنقتني لوحدي كده حسيت اني اتخنقت قلت اجي نتكلم شويه

سما حست في كلامها حاجه مش طبيعيه : اه بس باين ان الموضوع مش كده انتي كلمتي مؤمن؟

همس : ها .. اها كلمته من شويه

سما و علامات القلق علي وشها : اوعي تكوني قلتليه حاجه يا همس

همس : حاجه ايه ؟

سما : همس متخبيش عليا انا عارفه ان عنيا فضحتني امبارح و دموعي سبقتني و شرحتلك كل اللي في قلبي

همس حطت ايدها علي كتفها : متقلقيش يا سما انا عمري مااصغر صاحبتي ابدا في عيون اي حد و سرحت شويه و اتنهدت و كملت حتي لو كان خالد

سما : ربنا يخليكي ليا يا حبيبتي .. و بلهفه : طب قولتيله ايه ؟

همس : حكتله علي حبي انا و خالد و اعتذرتله و حاولت المحله من بعيد ان في حد تاني بيحبه

سما بنرفزه : ليه كده يا همس ؟

همس : علشان بحبك يا سما و صدقيني و الله ما جبت سيرتك خالص كل اللي قلته ان في حد بيحبك من الناس اللي حواليك

سما : طب و بعدين ؟

همس : خالد شافني و انا واقفه معاه

سما : ايه ؟ شافك و حصل ايه ؟

همس : ابدا زعل شويه

سما : محاولتيش تفهميه انك عملتي كده عـ .. وودت وشها الناحيه التانيه و كملت : عشاني

همس : لا طبعا انا عمري ما اعمل كده قلتلك مستحيل هصغرك قدام حد يا سما مستحيل

سما : بس خالد مش حد ده حبيبك

همس : حبيبي لو بيحبني بجد مفروض ثقته فيا تبقي اكبر من كده

سما : الكلام ده من وره قلبك يا همس انتي عارفه كويس اوي ان خالد بيعشقك مش بس بيحبك

همس : متشغليش بالك انتي بالموضوع ده ان شاء الله هيتحل

سما :.............

في كليه الاداب

سيف كان وعد حنين يعدي عليها ياخدها بعد ما يخلص ورديته في المستشفي علي الساعه 2

اتصل بيها اول ماوصل و بلغها انه قدام الكليه

كانت ماشيه مع ايمان و مجبتلهاش سيره ان سيف هيجيي ياخدها و ده كان لغرض في دماغها هنعرفه بعدين

خارجين من الباب و حنين بتتلفت بعنيها تدور علي سيف من غير ما ايمان تاخد بالها

سيف لمحها قبل ما هي تشوفه و جري عليها و غمي عنيها بايده

ايمان اتعصبت جامد عليه خصوصا انها متعرفوش

ايمان : ايه اللي بتعمله ده يا اخ انت .. انت اتجننت شيل ايدك

حنين : يا واد شيل ايدك بقي هتعميني

ايمان:

شال ايده و قعدوا يضحكوا ( سيف و حنين )

وايمان واقفه مبلمه مش فاهمه حاجه

حنين : اعرفك سيف اخويا .. ايمان انتيمتي

ايمان بكسوف : اهلا بيك

سيف : اهلا يا ايمان ازيك حنين كلمتني عنك كتير

ايمان و خلاص هتموت من الكسوف : و كلمتني عنك برده

سيف : قلتي ايه عني يا مفضوحه؟

حنين : كل خير طبعا يا دكتور

سيف : طب تعالوا اعزمكوا علي سندوتشين اكيد واقعين من الجوع زي حلاتي

حنين : سندوتشين يا بخيل ده بدل ما تقول عزومه في اي مطعم محترم؟

سيف : و الله لو ايمان هتوافق انا معنديش مانع

ايمان : لا طبعا مش هينفع كده و لا كده انا لازم اروح

سيف : شوفي صاحبتك بقي اهي هي اللي طلعت بخيله

ايمان : لا و الله ما بخل و لا حاجه انا فعلا لازم اروح

حنين : لا بجد و الله ياايمي هزعل منك

ايمان : معلش ياحنين بجد مش هينفع صدقيني

سيف : واضح ان صاحبتك مكسوفه مني عموما انا عندي مشوار هعمله هنا في طب نص ساعه و اكون عندكوا تكونوا رسيتوا علي حل هنتغدي و لا نروح و نوفر تمن العزومه

حنين : ههههههه لا ده بعينك .. متتاخرش و تنسي نفسك و ابقي سلملي علي خالد و انا هقنعها باي طريقه انا اقدر برده اضيع عزومه زي دي

سيف : ههههههههه ماشي يا مفجوعه .. و بص لايمان بابتسامه : ياريت توافقي تيجي معانا و اهه يبقي عيش و ملح و لا عيزاني اقول عليكي بخيله بجد

ايمان مردتش عليه غير بابتسامه

و مشي و سابهم راح لخالد علي الكليه

دخل اوضه المعيدين لقي خالد قاعد سرحان

سيف : خالود حبيب قلبي

خالد : سيف

خالد قام من مكانه و جري عليه يحضنه

سيف : واحشني يا واد ووحشتني اوي الكليه

خالد : و انت كمان واحشني اوي .. كنت لسه بفكر فيك

سيف : خير و مالك كده وشك متغير

حكاله خالد علي كل اللي حصل مع همس

سيف بعد شويه تفكير : همس لسه صغيره يا خالد و يمكن تكون دي اول مره تتعرض لموقف زي ده علشان كده تفكيرها هداها تعمل كده من غير ما تاخد رايك

خالد : لا مش صغيره يا سيف همس كبيره و عقلها كبير جدا بيستوعب كل كبيره و صغيره هي متاكده اني هزعل لو عرفت حاجه زي دي و لو مكنتش شفتها مكنتش هتجبيلي سيره

سيف : مين اللي قالك كده اكيد كانت هتقولك

خالد : كانت قالت من الاول خالص مش تخبي عني و كاني ماليش اي وجود في حياتها

سيف : طب اهدي بس يا صاحبي اكيد هي متقصدش كده صدقني

خالد : متحاولش تدافع عنها مهما حصل انا مش هقدر اغفرلها غلطه زي دي دي معملتليش اي اعتبار علي الاقل تحترمني كابن خالها و معيد عليها و علي البيه زميلها ده في الكليه مش تروح تقف معاه في وسط الجامعه

سيف : مش عارف اقولك ايه يا خالد انت عندك حق مقدرش اقولك متزعلش و صالحها لانها المفروض تتعلم من غلطها ده و تحس بزعلك و متكرروش و برده مش قادر اقولك خاصمها و ابعد عنها لاني عارف ان ده صعب عليكوا انتوا الاتنين

خالد : قفل بقي علي الموضوع ده كفايه كده كلام فيه المهم هتتغدي معايا النهارده اكيد مش كده؟

سيف : كان بودي ياابن عمي بس انا عازم حنين علي الغدي.. هي بتسلم عليك علي فكره

خالد : الله يسلمها ماشي يا سيف و لو اني كنت محتاج اقعد معاك اكتر من كده بس تتعوض مره تانيه بقي و سلملي علي حنين

سيف : الله يسلمك يا خالد .. و اهدي كده و روق دي مهما كان همس

خالد اتنهد تنهيده خفيفه و رجع ضهره لوره من غير كلام

سيف : سلام يا حبيبي

خالد : سلام

و نكمل الحلقه الجايه

مرسى كتير نانو على رديك على القصة

السلام عليكم فينك يا هموسة فين باقى القصة انا بقالى كتير مش بدخل المنتدى لظروف بس فين القصة

ازايك يا نونا عاملة اية والله وحشانى موت بس انا نزلت الحلقتين دول وماحدش رد عليا خالص غيرك دلوقتى يعنى وعغشان خاطرك هنزل حلقتين تانى
thank u